নাগৰিকত্ব সংশোধনী বিধেয়কৰ বিৰুদ্ধে ‘কঠোৰ বাৰ্তা’ প্ৰেৰণ কৰি প্ৰতিবাদ কৰি থকা মিজোৰামৰ দল-সংগঠনে ৰাজ্যখনত ৭০ সংখ্যক গণৰাজ্য দিৱস অভাৱনীয়ভাৱে সীমাবদ্ধ কৰি পেলোৱাৰ পিছত এই পৰিস্থিতি বিৱৰি এজন আই এ এছ বিষয়াই কেন্দ্ৰীয় গৃহ মন্ত্ৰ্যালয়লৈ লিখা এখন পত্ৰই চাঞ্চল্যৰ সৃষ্টি কৰিছে।
২৬ জানুৱাৰিত গণৰাজ্য দিৱসৰ চৰকাৰী কাৰ্য্যসূচীত অংশগ্ৰহণ কৰিবলৈ যোৱা ভূপেশ চৌধুৰী নামৰ ভাৰতীয় প্ৰশাসনিক সেৱাৰ বিষয়াজনে সতীৰ্থৰ সৈতে প্ৰতিবাদী দল-সংগঠনে ওভতাই পঠোৱাৰ কেইঘণ্টামানৰ পিছতে নিজৰ ক্ষোভ প্ৰকাশ কৰি গৃহ মন্ত্ৰ্যালয়লৈ চিঠিখন লিখে।
“যিটো ঘটিল সেয়া এখন স্বাধীন ৰাষ্ট্ৰত অভাৱনীয় কথা”, দিৱসৰ কাৰ্য্যসূচীস্থলীৰ গেইটৰ পৰা ঘূৰি আহিব লগীয়া পৰিস্থিতিটোক এইদৰে কয় বিষয়াজনে।
তেওঁ পত্ৰখনত গোটেই ঘটনাৰ বিৱৰণ দি কয় যে তেওঁ আৰু তেওঁৰ লগতে আনকেইজন সতীৰ্থ বিষয়া পুৱা ৭ বজাতেই গণৰাজ্য দিৱসৰ কাৰ্য্যসূচীত উপস্থিত থকাৰ বাবে আইজলস্থিত আছাম ৰাইফলছ গ্ৰাউণ্ডৰ নৰ্দাৰ্ন গেইটত উপস্থিত হয়।
কিন্তু তেওঁলোকক হতভম্ব আৰু বিব্ৰত কৰি মূল প্ৰৱেশদ্বাৰত জইণ্ট এন জি অ’ ক’অৰ্ডিনেশ্যন কমিটীৰ সদস্যই তেওঁলোকক বাধা দি ৰখাই থয়।
“আমাক কোৱা হয় যে আমি গণৰাজ্য দিৱসৰ কাৰ্য্যসূচীত উপস্থিত থাকিব নোৱাৰিম। আৰু সেইবাবে অপ্ৰীতিকৰ পৰিস্থিতি নহওঁতেই আমি ঘূৰি যাব লাগে।” চিঠিখনত বিষয়াজনে পৰিস্থিতিটো বিৱৰি এইদৰে লিখে।
“যেতিয়া আমি তেওঁলোকৰ সৈতে যুক্তি-তৰ্ক কৰো, সদস্যকেইজনে কয় যে ‘মিজোৰাম চৰকাৰ তেওঁলোকৰ সৈতে এটা চুক্তিত উপনীত হৈছে যে কেৱল মিজোৰাম চৰকাৰৰ সচিবসকলক আৰু তাতকৈ উচ্চ পৰ্য্যায়ৰ বিষয়াকহে গণৰাজ্য দিৱসৰ কাৰ্য্যসূচীটোত ভাগ ল’বলৈ অনুমতি দিয়া হ’ব।’” চিঠিখনত কোৱা হয়।
উল্লেখ কৰিব পাৰি যে নাগৰিকত্ব সংশোধনী বিধেয়ক, ২০১৬-ৰ বিৰোধিতাত দুদিনমান পূৰ্বে এন জি অ’ ক’অৰ্ডিনেশ্যন কমিটীয়ে সমগ্ৰ মিজোৰামতে গণৰাজ্য দিৱস বৰ্জনৰ সিদ্ধান্ত লৈছিল।
বিষয়াজনে চিঠিখনত লিখে, “আমি তেওঁলোকক কওঁ যে বিধেয়কখনৰ বিৰোধিতা কৰাৰ যিকোনো সংগঠনৰে গণতান্ত্ৰিক অধিকাৰ থাকিলেও এইদৰে চৰকাৰৰ বিষয়াক গণৰাজ্য দিৱসৰ কাৰ্য্যসূচীৰ পৰা বাৰণ কৰাটো বেআইনী কথা।”
কিন্তু বুজোৱাৰ পিছতো কোনো কামত নাহিল। ফলত গেইটৰ বাহিৰতে এঘণ্টা অপেক্ষা কৰি আইন-শৃংখলাৰ পৰিস্থিতিৰ কথা চিন্তা কৰি তেওঁলোক ক্ষোভ-অপমান লৈ উভতি আহিবলৈ বাধ্য হয়। বিষয়াজনে আৰক্ষী প্ৰশাসনৰ পৰাও সহায় নোপোৱাৰ অভিযোগ আনে চিঠিখনত।
তেওঁ জনোৱামতে, তাত উপস্থিত থকা কোনো এজন দণ্ডাধীশ অথবা আৰক্ষীয়ে এন জি অ’ ক’অৰ্ডিনেশ্যন কমিটীৰ সদস্যকেইজনৰ বাধাৰ পৰা তেওঁলোকক সকাহ দিবলৈ আগ বাঢ়ি নাহিল। “উচ্চ পৰ্য্যায়ৰ আৰক্ষী বিষয়াকেইজনেও নিজৰ অসাহয়তাহে প্ৰাকশ কৰিছিল”, বিষয়াজনে অভিযোগ কৰে।
“য’ত প্ৰতিজন নাগৰিকে যাতে গণৰাজ্য দিৱস উৎসাহ-উদ্দীপনা আৰু মুক্তমনে উদযাপন কৰিব পাৰে সেইটো নিশ্চিত কৰা চৰকাৰৰ দায়িত্ব, তাত এনেকুৱা ঘটনাই প্ৰমাণ কৰে যে আমি আমাৰ নিম্নতম দায়িত্ব পালনত ব্যৰ্থ হৈছো।” চৰকাৰৰ অক্ষমতাক সমালোচনা কৰি চৌধুৰীয়ে চিঠিখনত উল্লেখ কৰে।
তেওঁ লগতে এই পৰিস্থিতিটোৰ বাবে দায়ী সকলো পক্ষৰ বিৰুদ্ধে কঠোৰতম ব্যৱস্থা লোৱাৰ বাবে সংশ্লিষ্ট পক্ষক দাবী জনায়।
