চীনলৈ উভতিছে কোভিডৰ আতংক! হাস্পাতালৰ আইচিইউ ভৰ্তি; শ্মশানত দীঘলীয়া শাৰী
কোভিডৰ দ্বিতীয় ঢৌৱে বিশ্বব্যাপী হাহাকাৰ সৃষ্টি কৰিছিল। ব্যাপক সংক্ৰমণৰ লগতে মৃত্যুৰ তালিকাও আছিল যথেষ্ট দীঘল। শেহতীয়াকৈ চীনত কৰোনাৰ নতুন আতংকই সেই স্মৃতি পুনৰ জাগৃত কৰিছে। সংক্ৰমণ দ্ৰুতগতিত বৃদ্ধি পাইছে। যাৰ আঁৰত আছে কোভিডৰ উপ প্ৰজাতি বিএফ.৭।
যোৱা অক্টোবৰত এই উপ প্ৰজাতিটোৱে আমেৰিকা যুক্তৰাষ্ট্ৰ আৰু ইউৰোপৰ দেশবোৰত আধিপত্য বিস্তাৰ কৰিছিল। সেই সময়ত আমেৰিকা যুক্তৰাষ্ট্ৰত মুঠ সংক্ৰমণৰ ৫ শতাংশ এই উপপ্ৰজাতিৰ দ্বাৰা সংক্ৰমিত হৈছিল। ব্ৰিটেইনত হৈছিল ৭.২৬ শতাংশ।
লগতে পঢ়ক: হোৱাইট হাউচ পালেগৈ জেলেনস্কি, সাক্ষাৎ কৰিলে বিডেনক; কি কথা পাতিলে দুই ৰাষ্ট্ৰপতিয়ে?
কোভিডৰ এই প্ৰজাতিটো এইবাৰ চীনতো বিয়পি পৰিছে। ফলস্বৰূপে সংক্ৰমণৰ মাত্ৰা হঠাতে বহুগুণে বৃদ্ধি পাইছে। এই পৰিস্থিতিৰ পৰিপ্ৰেক্ষিতত চীনা স্বাস্থ্য বিশেষজ্ঞৰ একাংশই আশংকা কৰিছে যে পৰৱৰ্তী বছৰত ১০লাখতকৈও অধিক লোকৰ মৃত্যু হ’ব পাৰে।
চীনে বিভিন্ন ধৰণৰ অ’মিক্ৰনৰ সৈতে যুঁজিবলৈ ভেকছিনৰ ৰোগ প্ৰতিৰোধ প্ৰণালীৰ মানদণ্ড উন্নত নকৰাৰ বিষয়টোৱে সেই উদ্বেগ বহুগুণে বৃদ্ধি কৰিছে। ইয়াৰ ফলতে সংক্ৰমণৰ মাত্ৰা বৃদ্ধি পাইছে বুলি স্বাস্থ্য বিশেষজ্ঞসকলে দাবী কৰে ।
কেইবাটাও সংবাদ মাধ্যমৰ প্ৰতিবেদনত দাবী কৰা হৈছে যে চীনত সংক্ৰমণৰ মাত্ৰা বৃদ্ধি হোৱাৰ লগে লগে চিকিৎসালয়ত ভৰ্তি হোৱা ৰোগীৰ সংখ্যাও বৃদ্ধি পাইছে। আইচিইউবোৰ ৰোগীৰে ভৰি পৰিছে। অৱশ্যে চীনে ইয়াক অস্বীকাৰ কৰাৰ অভিযোগ উত্থাপিত হৈছে।
বিশ্ব স্বাস্থ্য সংস্থাৰ জৰুৰীকালীন বিভাগৰ বিষয়া মাইক ৰিয়ানে বুধবাৰে কয়, “চীনে দাবী কৰিছে যে আইচিইউত ভৰ্তিৰ সংখ্যা অতি কম। কিন্তু বাস্তৱত চিকিৎসালয়ৰ আইচিইউবোৰ কোভিড ৰোগীৰে পৰিপূৰ্ণ। মই কোৱা নাই যে চীনে ইচ্ছাকৃতভাৱে আমাক এই তথ্য দিয়া নাই। তেওঁলোকে ইয়াক নিয়ন্ত্ৰণ কৰিবলৈ সক্ষম নহ’ব পাৰে।”
লগতে পঢ়ক: এইয়া কি পিন্ধিলে নৰেন্দ্ৰ মোডীয়ে!
বাতৰি মতে, বেইজিঙৰ বহু বাসিন্দাই তেওঁলোকৰ আত্মীয়সকলৰ মৃতদেহ সৎকাৰ কৰিবলৈ শ্মশানত ভিৰ কৰিছে। তেওঁলোকে তাতো অপেক্ষা কৰিব লগীয়া হৈছে। কাৰণ শ্মশানবোৰোতো দীঘলীয়া শাৰী আছে। কোভিড নিয়ম শিথিল কৰাৰ পিছত চীনত সংক্ৰমণৰ মাত্ৰা বৃদ্ধি পাইছে। মৃত্যুও বৃদ্ধি পাইছে। বাতৰি অনুসৰি, বেইজিং, চংকিং আৰু গুয়াংঝৌৰ শ্মশানসমূহত স্বাভাৱিকতকৈ বহু বেছি ভিৰ হৈছে।