উচ্চতম ন্যায়ালয়ে আজি মণিপুৰত দুগৰাকী মহিলাই উলংগ হৈ পেৰেড কৰা ভিডিঅ’টোক “গভীৰ বিপদজ্জনক” বুলি অভিহিত কৰিছে। ভাইৰেল হোৱা ভিডিঅ’টোক গৰিহণা দি উচ্চতম ন্যায়ালয়ে ভিজুৱেলসমূহে সাংবিধানিক ব্যৰ্থতাৰ বীৎভসতাকে প্ৰতিপন্ন কৰা বুলিও মন্তব্য কৰিছে।
ভাৰতৰ মুখ্য ন্যায়াধীশ ডি ৱাই চন্দ্ৰচুড়ে চৰকাৰক এই ক্ষেত্ৰত কঠোৰভাৱে ব্যৱস্থা গ্ৰহণ কৰিবলৈ নিৰ্দেশ দিয়াৰ লগতে মণিপুৰৰ মহিলাসকলৰ সুৰক্ষা নিশ্চিত কৰাৰ বাবে লোৱা চৰকাৰী পদক্ষেপসমূহ আদালতক অৱগত কৰি থাকিবলৈও নিৰ্দেশ দিছে।
যদি চৰকাৰে কোনো ব্যৱস্থা গ্ৰহণ নকৰে তেনে উচ্চতম ন্যায়ালয়ে নিজাববীয়াকৈ ব্যৱস্থা গ্ৰহণ কৰিব বুলি মুখ্য ন্যায়াধীশগৰাকীয়ে সকীয়াই দিছে। মুখ্য ন্যায়াধীশ চন্দ্ৰচূড়ে লগতে কয় যে উচ্চতম ন্যায়ালয়ে এই গোচৰটোৰ পৰৱৰ্তী শুনানি অহা ২৮ জুলাইত গোচৰটো গ্ৰহণ কৰিব।
ভিডিঅ’টো ভাইৰেল হোৱা কথাই আমাক গভীৰভাৱে বিচলিত কৰা বুলি মুখ্য ন্যায়াধীশগৰাকীয়ে কয়। আমি গভীৰ উদ্বেগ প্ৰকাশ কৰিছো। চৰকাৰে পদক্ষেপ লোৱা আৰু ব্যৱস্থা লোৱাৰ সময় আহি পৰিছে। এয়া কেতিয়াও গ্ৰহণযোগ্য নহয়। মুখ্য ন্যায়াধীশ চন্দ্ৰচূড়ে কয়।
উল্লেখ্য যে, বিগত দুমাহতকৈ অধিক সময় ধৰি উত্তপ্ত হৈ থকা মণিপুৰৰ পৰিস্থিতিয়ে দেশব্যাপী উদ্বেগৰ সৃষ্টি কৰাৰ সময়তে ৰাজ্যখনত সংঘটিত এক নৃশংস নাৰী নিৰ্যাতনৰ কাণ্ড পোহৰলৈ অহাৰ পিছতে সমগ্ৰ দেশকে জোকাৰি তুলিছে। এই নৃশংস কাণ্ডই অধিক ৰূপত প্ৰতিফলিত কৰি কৰি তুলিছে মণিপুৰৰ পৰিস্থিতিৰ ভয়াৱহতা।
শেহতীয়াকৈ ভাইৰেল হৈ পৰিছে মণিপুৰত সংঘটিত হোৱা নাৰী নিৰ্যাতনৰ এই ঘৃণনীয় কাণ্ডৰ ভিডিঅ’। ভাইৰেল এই ভিডিঅ’টোত মেইটেই সম্প্ৰদায়ৰ একাংশ লোকে দুগৰাকী কুকি মহিলাক পথত উলংগ কৰি সমদল কৰোৱাৰ দৃশ্য দেখা গৈছে। পিছত উক্ত মহিলা দুগৰাকীক দলবদ্ধ ধৰ্ষণ কৰাৰ অভিযোগো উত্থাপন হৈছে।
উচ্চতম ন্যায়ালয়ে এই গোচৰ শুনানি গ্ৰহণ কৰি চৰকাৰে ব্যৱস্থা গ্ৰহণ নকৰিলে নিজববীয়াকৈ গোচৰ ল’ব বুলিও ঘোষণা কৰিছে।
