আদানী বিতৰ্কক লৈ শেহতীয়া কিছুদিন ধৰি তোলপাৰ লাগি আছে সংসদ। সদনৰ মজিয়াত আদানীৰ প্ৰসঙ্গৰে প্ৰধানমন্ত্ৰী নৰেন্দ্ৰ মোদী আৰু বিজেপি চৰকাৰক ধাৰাবাহিক আক্ৰমণ চলাই আহিছে বিৰোধীয়ে। এইবাৰ এই বিষয়ক লৈ মোদী চৰকাৰক লক্ষ্য কৰি বাক্যশেল প্ৰয়োগ কৰিছে এআইএমআইএমৰ মুৰব্বী আছাদুদ্দিন ওৱাইছিয়ে।
প্ৰধানমন্ত্ৰী মোদী আৰু বিজেপি চৰকাৰক আক্ৰমণ কৰি ওৱাইছিয়ে কয় যে আদানীৰ জালিয়াতি ফাদিল কৰা হিণ্ডেনবাৰ্গ যদি ভাৰতৰ হ’ল হয়, নিশ্চিতভাৱে হিণ্ডেনবাৰ্গ এতিয়া বেআইনী কাৰ্যকলাপ (প্ৰতিৰোধ) আইন (UAPA) ৰ সন্মুখীন হ’লহেঁতেন।
সংসদত অব্যাহত থকা বিতৰ্কৰ মাজতে ওৱাইচিয়ে কয়, “হিণ্ডেনবাৰ্গ ভাৰতত থকা হ’লে আদানী গোটৰ বিষয়ে প্ৰতিবেদন জাৰি কৰাৰ বাবে বেআইনী কাৰ্যকলাপ (প্ৰতিৰোধ) আইন (UAPA)ৰ সন্মুখীন হ’লহেঁতেন।”
গৌতম আদানীৰ সৈতে প্ৰধানমন্ত্ৰী মোদীৰ সম্পৰ্কক কটাক্ষ কৰি ওৱাইছিয়ে লগতে কয়, “এয়া আপোনাৰ বাবে অত্যন্ত দুৰ্ভাগ্যজনক। এতিয়া সমগ্ৰ বজাৰখন ৫ ম স্থানলৈ নামি আহিছে।”
ওৱাইছিয়ে নিজ ভাষণত বিজেপিৰ লগতে কংগ্ৰেছকো তীব্ৰ সমালোচনা কৰে। ওৱাইছিৰ মতে “ভাৰতত কংগ্ৰেছ আৰু বিজেপিয়ে অত্যন্ত ধনৱন্ত কিছু লোকৰ জন্ম দিছে। এই সকল হৈছে বিপুল ধন-সম্পত্তি লৈ দেশৰ পৰা পলায়ন কৰা লোক।” “সেই তালিকাত মোগলৰ নাম সন্নিবিষ্ট হৈছে নেকি” বুলিও ওৱাইছিয়ে কটুক্তি কৰে।
নিজ ভাষ্যত হায়দৰাবাদৰ সাংসদগৰাকীয়ে লগতে মোদী চৰকাৰে দেশৰ ৰাষ্ট্ৰীয় পতাকাৰ পৰা সেউজীয়া ৰং আঁতৰাই পেলাব নেকি বুলিও এক বিস্ফোৰক প্ৰশ্ন উত্থাপন কৰে। সেউজীয়াক লৈ চৰকাৰৰ ইমান সমস্যা কিয় বুলিও বিজেপি চৰকাৰক আক্ৰমণ কৰে ওৱাইছিয়ে।
তেওঁ লগতে প্ৰধানমন্ত্ৰী মোদীয়ে চীনৰ অনুপ্ৰৱেশৰ কথা ক’বনে বুলি প্ৰশ্ন কৰাৰ লগতে বিলকিছ বানোৰ ন্যায়ৰ প্ৰসঙ্গও উত্থাপন কৰে। ২০২৩ চনৰ কেন্দ্ৰীয় বাজেটত সংখ্যালঘু আঁচনিৰ ধন কৰ্তন কৰাৰ বাবে বিজেপি চৰকাৰক তীব্ৰ সমালোচনা কৰে আছাদুদ্দিন ওৱাইছিয়ে।
