প্ৰযুক্তিবিদ্যাৰ উচ্চ স্তৰীয় শিক্ষাৰ প্ৰতিষ্ঠান আৰু গোটেই দেশৰ ভিতৰতে সুনাম থকা গুৱাহাটী আই আই টিৰ গৰিমাত কালিমা সানিলে প্ৰতিষ্ঠানটোৰে এজন অধ্যাপকে। গণিত বিভাগৰ অধ্যাপকজনে এগৰাকী মহিলাক ধৰ্ষণৰ চেষ্টা কৰি আৰক্ষীৰ জালত পৰিব লগীয়া ঘটনা ঘটিছে।
“যোৱাকালি অৰ্থাৎ ৪ জানুৱাৰিত এগৰাকী মহিলাই তেওঁক ধৰ্ষণৰ চেষ্টা কৰা বুলি গুৱাহাটী আই আই টিৰ এজন অধ্যাপকৰ বিৰুদ্ধে এখন এজাহাৰ দাখিল কৰিছে। আমি তাৰ ভিত্তিত গোচৰটো পঞ্জীয়ন কৰিছো আৰু তদন্ত চলি আছে।” উত্তৰ গুৱাহাটী আৰক্ষী চকীৰ ভাৰপ্ৰাপ্ত বিষয়াই কয়।
“মহিলাগৰাকীয়ে এজাহাৰত অভিযোগ কৰামতে গণিতৰ অধ্যাপকজনে তেওঁক ধৰ্ষণৰ চেষ্টা কৰিছিল।” আৰক্ষী বিষয়াজনে কয়। অনা অসমীয়া অধ্যাপকজনৰ নাম কে ভি শ্ৰীকান্ত আৰু তেওঁ দক্ষিণ ভাৰতৰ বুলি জানিবলৈ দিয়ে আৰক্ষীয়ে। তেওঁৰ বিৰুদ্ধে চাংসাৰি আৰক্ষী থানাত ৭/১৯ নম্বৰৰ এটা গোচৰ ৰুজু হৈছে। “বৰ্তমান আমি তেওঁক সোধা-পোছাৰ বাবে আটক কৰিছো, তদন্ত চলাই নিয়া হৈছে।” বিষয়াজনে কয়।
আনহাতে, মহিলাগৰাকীৰ ভাষ্যমতে, তেওঁক ঘটনাৰ দিনা অধ্যাপক শ্ৰীকান্তে এটা ‘বীমাৰ পলিচি খুলিম’ বুলি প্ৰলোভন দি নিজৰ বাসগৃহলৈ মাতে। পিছত বাসগৃহৰ পৰা দুয়ো ওলাই অহাৰৰ সময়তে বাহিৰৰ আন্ধাৰ থকা এডোখৰ ঠাইত তেওঁক টনা-আঁজোৰা কৰি কাপোৰ পৰ্য্যন্ত ফালে। অধ্যাপকজনৰ ধৰ্ষণৰ চেষ্টাক কোনো মতে ব্যৰ্থ কৰে মহিলাগৰাকীয়ে।
আৰক্ষীৰ খবৰ মতে মহিলাগৰাকীৰ ঘৰ কলকাতাত আৰু তেওঁ বৰ্তমান ৰাণীত থাকে। দুয়োজনৰ মাজত পূৰ্বৰ চিনাকি আছিল। “তেওঁলোক আগৰ পৰাই পৰস্পৰৰ চিনাকি আছিল”, আৰক্ষী বিষয়াজনে কয়।
ঘটনাটোৱে ইতিমধ্যে প্ৰযুক্তিবিদ্যাৰ গৰিমামণ্ডিত প্ৰতিষ্ঠানটোৰ চৌহদত একপ্ৰকাৰৰ চাঞ্চল্যৰ সৃষ্টি কৰিছে।
