ঝাৰখণ্ডৰ ৰামগড় জিলাৰ এটা পৰিত্যক্ত কয়লা খনিত অবৈধ খননৰ সময়ত সংঘটিত ভূমিস্খলনত এজন শ্ৰমিকে প্ৰাণ হেৰুৱাৰ লগতে বহু লোক খনিত আৱদ্ধ হৈ থকাৰ আশংকা প্ৰকাশ কৰিছে। শনিবাৰে পুৱাৰ ভাগতে অবৈধ খননৰ সময়ত খনিটোৰ চালৰ এটা অংশ ভাঙি পৰে। ইয়াৰ বাবে বহু শ্ৰমিকক সমাধিস্থ হোৱাৰ আশংকা কৰা হৈছে।
স্থানীয় আৰক্ষী বিষয়াসকলৰ মতে, এতিয়ালৈকে এজন লোকৰ মৃতদেহ উদ্ধাৰ কৰা হৈছে আৰু উদ্ধাৰ অভিযান চলি আছে। কুজু আৰক্ষী চকীৰ ভাৰপ্ৰাপ্ত বিষয়া আশুতোষ কুমাৰ সিঙে সংবাদ মাধ্যমৰ আগত প্ৰকাশ কৰা অনুসৰি বহু লোক আবদ্ধ হৈ থাকিব পাৰে, সেয়ে উদ্ধাৰ অভিযান অব্যাহত ৰখা হৈছে।”
উল্লেখ্য যে বিগত এক দশক ধৰি বহু অবৈধ খনিৰ চাল ভাঙি পৰাৰ ঘটনাই বহু লোকে প্ৰাণ হেৰুৱাইছে। স্থানীয় লোকে অভিযোগ কৰে যে, আৰক্ষী আৰু ইষ্টাৰ্ণ কোল ফিল্ডছ লিমিটেড (ECL)-ৰ বিষয়াসকলৰ মিলিভাগত পৰিত্যক্ত কয়লা খনিসমূহত নিৰ্বিঘ্নে অবৈধ খনন চলি আহিছে।
ৰামগড়ৰ উপ-আয়ুক্ত ফৈজ আহমদ মুমতাজে জানিবলৈ দিয়ে, “এই দুৰ্ঘটনাৰ তদন্তৰ বাবে এটা বিশেষ প্ৰশাসনিক দল গঠন কৰি উদ্ধাৰকাৰী দলৰ সৈতে ঘটনাস্থললৈ প্ৰেৰণ কৰা হৈছে। প্রাথমিক তদন্তত পোৱা তথ্য অনুসৰি স্থানীয় গাঁওবাসীৰ এটা অংশ এই অবৈধ খনন কাৰ্যকলাপৰ সৈতে জড়িত বুলি সন্দেহ কৰা হৈছে।”
প্ৰসংগক্ৰমে কিছুদিনৰ পূৰ্বে অসমত চলি থকা অবৈধ কয়লাখনিতো এনেধৰণৰ ঘটনাৰ বাবে কেইবাজনো শ্ৰমিকে প্ৰাণ হেৰুৱাই…।
