শিৱসাগৰত অবৈধ মাটি খনন অব্যাহত; বন বিভাগৰ নিৰ্বিকাৰ ভূমিকাৰ বিপৰীতে কঠোৰ জিলা প্ৰশাসন
শিৱসাগৰত অবৈধ মাটি খননৰ বিৰুদ্ধে কঠোৰ পদক্ষেপ গ্ৰহণ কৰিছে শিৱসাগৰ জিলা প্ৰশাসনে।
বৃহস্পতিবাৰে এক খবৰৰ ভিত্তিত শিৱসাগৰ জিলা উপায়ুক্তৰ নিৰ্দেশত ফাকুম কুমাৰ ফদিয়া অঞ্চলত অবৈধ মাটি খনন কৰি থকা অৱস্থাত দুখন ট্ৰাক জব্দ কৰে জিলা প্ৰশাসনে।
উপায়ুক্তৰ নিৰ্দেশ মৰ্মে জিলা দণ্ডাধীশে খননস্থলীত উপস্থিত হৈ দুয়োখন গাড়ী জব্দ কৰে।
উপায়ুক্ত ডাঃ এম এছ লক্ষ্মীপ্ৰিয়াই শিৱসাগৰত অবৈধ ভাৱে চলি থকা মাটি মহল সমুহ বন্ধ কৰিবলৈ কঠোৰ নিৰ্দেশ দিয়ে।
আনহাতে, জিলা প্ৰশাসনৰ কঠোৰ স্থিতিৰ বিপৰীতে ভূ মাফিয়াৰ প্ৰতি নৰম স্থিতি গ্ৰহণ কৰা দেখা গৈছে শিৱসাগৰ বন সাংমণ্ডলিক প্ৰাধিকাৰী (ডি এফ অ)ৰ কাৰ্যালয়ৰ বিষয়া কৰ্মচাৰী সকলে।
বন বিভাগৰ চকুৰ আগতেই ভূ মাফিয়াই জেচিবি, পকলেন ব্যৱহাৰ কৰি দৈনিক শ শ গাড়ীৰে অবৈধভাৱে মাটি খনন কৰি ব্যৱসায় চলাই অহা দেখিবলৈ পোৱা গৈছে।
শিৱসাগৰৰ কোঁৱৰপুৰ টোপ, শালমৰা, লাহিঙ্গীয়া, অফলা, বেতবাৰীৰ চেতিয়া কৈৱৰ্ত, শ্মশানঘাট আদিকে ধৰি বহু কেইটা স্থানত অবৈধ মাটি মহলত মাটি খনন কৰি আছে শাসকীয় দলৰ বহু নেতা পালি নেতাৰ লগতে একাংশ লোকে।
উল্লেখযোগ্য যে, শিৱসাগৰৰ দিখৌ, দিচাং দৰিকাৰ বালিচৰত অবৈধ পলস মাটি খনন জৰিয়তে নৈ পৰীয়া জীৱন আৰু সম্পতিলৈ ভাবুকি কঢ়িয়াই আনিছে।
এই অবৈধ মাটি খনন প্ৰক্ৰিয়াৰ বিৰুদ্ধে শিৱসাগৰৰ বিভিন্ন দল সংগঠনে জাঙোৰ খাই উঠিছে।
সদৌ শিৱসাগৰ জিলা ছাত্ৰ সন্থাৰ সভাপতি সমীৰণ ফুকন, বীৰ লাচিত সেনাৰ সভাপতি চিতু বৰুৱা আৰু অনুসূচীত জাতি ছাত্ৰ সন্থাৰ বেতবাৰী আঞ্চলিকে অতি শীঘ্ৰে অবৈধ মাটি মহল সমূহ বন্ধ কৰিবলৈ প্ৰশাসন তথা জিলা উপায়ুক্তক আহ্বান জনাইছে।