ডিগবৈৰ ডি এফ অ’ৰ নেতৃত্বত টিৰাপ নদীত শিল মাফিয়াৰ দপদপনি

অভিযোগ অনুসৰি বিগত সময়ত টিৰাপত শিল খণ্ডাৰ ফলত সৃষ্টি হোৱা দ’ গাঁতত পৰি কেইবাজনো লোকৰ মৃত্যু পৰ্য্যন্ত হৈছে যদিও বন বিভাগে কেৱল কমিছনৰ অংকত বিভাগটোকে বন্ধকত ৰাখি শিলৰ চোৰাং বেহাৰ ভূস্বৰ্গ লৈ পৰিণত হোৱা ডিগবৈ বন সংমণ্ডলৰ অধীনৰ লেখাপানী বনাঞ্চলিক কাৰ্যালয়টোক শিল মাফিয়াৰ ঘাটিলৈ পৰিণত কৰিছে।

ডি এফ অ’ বিপুল বৰাৰ আশীৰ্বাদ লাভ কৰি চোৰাং বেহা চলাই অহা অসাধু চক্ৰটোৱে এতিয়া গুৰু গোহাঁই নমনা হৈছে। ডি এফ অ’ বিপুল বৰাৰক তাৎক্ষণিকভাৱে শাস্তিমূলক বদলিৰো দাবী উত্থাপন হৈ আহিছে যদিও একাংশ বিজেপি নেতাৰ আশীৰ্বাদ থকাৰ তেওঁৰ বিৰুদ্ধে এই পৰ্যন্ত কোনো ব্যৱস্থা গ্ৰহণ কৰা হোৱা নাই।

উল্লেখযোগ্য যে শিল কঢ়িওৱা ডাম্পাৰে অঞ্চলটোত বিভিন্ন সময়ত দুৰ্ঘটনা সংঘটিত কৰি অহাৰ লগতে গধুৰ বাহনসমূহৰ যাতায়তৰ ফলত গ্ৰামাঞ্চলৰ বহুকেইটা পথ ইতিমধ্য জৰাজীৰ্ণ হৈ ৰাইজক যথেষ্ট অসুবিধাৰ সন্মুখীন কৰাইছে।

আনহাতে এই ক্ষেত্ৰত একাংশ দল সংগঠনে গ্ৰহণ কৰি অহা মৌনতাই সচেতন ৰাইজৰ মনত প্ৰশ্নৰ সৃষ্টি কৰিছে। দুৰ্নীতি অভিযোগ উত্থাপন হৈ অহা ডি এফ অ’ বৰাৰ বিৰুদ্ধে বন মন্ত্ৰী পৰিমল শুক্লবৈদ্যই এতিয়া কি ব্যৱস্থা হাতত লয় সেয়া লক্ষণীয় হ’ব।