ৰাজ্যৰ বনাঞ্চল সমূহ এতিয়া বন মাফিয়াৰ চৰণীয়া পথাৰলৈ ৰূপান্তৰিত হৈছে৷
অসমৰ বনাঞ্চল সমূহৰ ধ্বংসযজ্ঞ চলি থকাৰ মাজতেই তিনিচুকীয়া জিলাৰ ডিগবৈ বন সংমণ্ডলৰ অধীনৰ তথা লেখাপানী আঞ্চলিক বন বিষয়া কাৰ্যালয়ৰ অন্তৰ্গত লিডু মোলাং পথত লেখাপানী বন বিভাগে অভিযান চলাই শুকুৰবাৰে নিশা চোৰাং কাঠ ভিৰ্তি এখন বলেৰে পিক জব্দ কৰিবলৈ সক্ষম হয়।
লেখাপানী বন বিভাগৰ এটা দলে শুকুৰবাৰে নিশা প্ৰায় ১১.০০ বজাত এক আকস্মিক অভিযান চলাই গাড়ীসহ চোৰাং কাঠখিনি জব্দ কৰে৷
অৱশ্যে জব্দ হোৱা চোৰাং কাঠখিনিৰ সৈতে কোনো লোকক বন বিভাগে আটক কৰিবলৈ সক্ষম নহ’ল৷ বন বিভাগে জব্দ কৰা এই চোৰাং কাঠখিনি অবৈধ কয়লাখনিৰ ভূ-গৰ্ভ খনিৰ ভিতৰত ঠেকা দিবলৈ অনা বুলি জানিব পৰা গৈছে৷
এ এছ ২৩ চি চি ২০৪৭ নম্বৰৰ বলেৰ’ পিকআপ ভানখনেৰে আনি থকা অৱস্থাত বন বিভাগে কালি জব্দ কৰা অপৈণত গছৰ কুণ্ডা সদৃশ এই ঠেকাসমূহ ডিগবৈ বন সংমণ্ডলৰ আপাৰ দিহিং বনাঞ্চলৰ পূৱ খণ্ডৰ পৰা দিহিং নৈৰে লিডুৰ মোলাঙলৈ বুলি আনি গাড়ীৰে সৰবৰাহ কৰোতে ধৰা পৰে৷
ডিগবৈ আৰু ডুমডুমা বন সংমণ্ডলৰ অন্তৰ্গত বিশেষকৈ মাৰ্ঘেৰিটাৰ মাকুমকিল্লা, মিৰিকা মাজুলী, নৰালতা, ডিৰক, ইনথেম-উলুপকে আদি কৰি সংৰক্ষিত বনাঞ্চলসমূহৰ পৰা অপৈণত গছসমূহ কাটি সংৰক্ষিত বনাঞ্চল কেইখনত ধ্বংসযজ্ঞ চলাই অবৈধ ভূ-গৰ্ভৰ কয়লা খনিৰ ঠেকাৰ নামত দীৰ্ঘদিনৰ পৰা অঞ্চলটোলৈ এনে ধৰণৰ অবৈধ কাঠ আমদানি হৈ আহিছে৷
আনহাতে, শুকুৰ বাৰে দিনৰ ভাগত লেখাপানী সংৰক্ষিত বনাঞ্চলত চোৰাং কাঠ বিৰোধী অভিযান চলাই লেখাপানী বন বিভাগে জাৰ্মানত নিৰ্মিত এটা অত্যধুনিক কাঠ ফলা মেচিন জব্দ কৰিবলৈ সক্ষম হয়৷
উল্লেখ যে দিহিং পাটকাই অভায়াৰণ্য তথা পশ্চিম মাৰ্ঘেৰিটা বনাঞ্চলিক আৰু পূৱ বনাঞ্চলিক কাৰ্যালয় অধীনৰ সংৰক্ষিত বনাঞ্চল সমূহত প্ৰতিদিনে চোৰাং কাঠ মাফিয়াৰ হাতুৰা পৰি আহিছে যদিও এইক্ষেত্ৰত বন বিভাগে গোপন অংকৰ বিনিমিয়ত চকু মুদা কুলি ভাও ধৰাৰ গুৰুতৰ অভিযোগ উত্থাপন হৈছ৷
অন্যহাতে সাধাৰণ দুই এখন ডি আই মেক্স জাতীয় চোৰাং কাঠ সৰবৰাহ কৰা গাড়ী ধৰিছে যদিও প্ৰতিদিনে মাৰ্ঘেৰিটা মহকুমাৰ জাগুন আৰু অসমৰ সীমামূৰীয়া জয়ৰামপুৰৰ লগতে মেওৰ পৰা ১২-১৪-১৬ চকীয়া ট্ৰাকেৰে বৃহৎ সংখ্যক কাঠৰ চোৰাং গাড়ী জাগুন, লেখাপানী আৰু মাৰ্ঘেৰিটা পশ্চিম বনাঞ্চলিক কাৰ্যালয়ৰ সন্মুখেদি ৩১৫নং ৰাষ্ট্ৰীয় ঘাইপথেদি সৰবৰাহ হৈ আহিছে যদিও কোনো এটা বনাঞ্চলিক বিষয়াই এক্ষেত্ৰত চোৰাং কাঠ ভৰ্তি ট্ৰাক জব্দ নকৰি চোৰাং কাঠ ব্যৱসায়ীৰে গোপন বুজাবুজিৰে অবৈধ বৃহৎ কাঠৰ ব্যৱসায় চলাই যোৱাত সাৰ পানী যোগোৱাৰ গুৰুতৰ অভিযোগ উত্থাপন হৈ আহিছে৷
এইক্ষেত্ৰত স্থানীয় একাংশ দল সংগঠনৰ নেতাকো কাঠ মাফিয়াই নিজৰ পকেটত ৰাখিছে বুলি সূত্ৰত প্ৰকাশ৷
এইক্ষেত্ৰত বন বিভাগে পুঠি খলিহনা ধৰিছে যদিও ৰৌ বৰালী জালত পেলাবলৈ সক্ষম হ’ব কেতিয়া ইয়াকে লৈ সচেতন প্ৰকৃতি প্ৰেমীৰ মাজত ব্যাপক চৰ্চা চলিছে৷
