আফগান বৈদেশিক মন্ত্ৰী আমিৰ খান মুত্তাকিক আদৰিবলৈ গৈছিল স্বামী। সেই সুযোগতে দুস্কৃতিকাৰীয়ে মছজিদত প্ৰৱেশ কৰি মৌলৱীৰ পত্নী আৰু দুই শিশুকন্যাক নিৰ্মমভাৱে হত্যা কৰে।
উত্তৰ প্ৰদেশৰ বাঘপট অঞ্চলৰ গাংগলনী গাঁৱত সংঘটিত হৈছে এই শিহৰণকাৰী ঘটনা। ঘটনাটো পোহৰলৈ অহাৰ লগে লগে চাঞ্চল্যৰ সৃষ্টি হয়। আৰক্ষীয়ে সমগ্ৰ ঘটনাৰ তদন্ত আৰম্ভ কৰিছে।
আৰক্ষী সূত্ৰৰ পৰা জানিব পৰা মতে, মুজাফ্ফৰনগৰৰ চুন্না গাঁৱৰ বাসিন্দা মৌলৱী ইব্ৰাহিমে গাংগলনী গাঁৱৰ মছজিদত নামাজ পঢ়াইছিল। তেওঁৰ পত্নী ইছৰানা, দুগৰাকী কন্যা ছফিয়া আৰু ছুমায়া তাত থকা মছজিদতে বাস কৰিছিল। কন্যাদুটিৰ বয়স ক্ৰমে ৫ আৰু ২ বছৰ।
স্থানীয় ৰাইজৰ মতে, শনিবাৰে মছজিদত নামাজ পঢ়াৰ সময়ত স্থানীয় ৰাইজে মৃতদেহকেইটা পৰি থকা দেখিছিল। লগে লগে আৰক্ষীক খবৰ দিয়া হয়। খোদ মীৰাটৰ ডি আই জিয়ে সেই স্থানত গৈ সকলো তদন্ত কৰে।
আৰক্ষীয়ে দাবী কৰিছে যে ইব্ৰাহিমে আফগান বৈদেশিক মন্ত্ৰীক আদৰিবলৈ গৈছিল। সেই সুযোগতে সংঘটিত কৰা হৈছিল এই হত্যাকাণ্ড। কেৱল সেয়াই নহয়, প্ৰাথমিক তদন্তত আৰক্ষীয়ে জানিব পাৰিছে যে হত্যাকাণ্ড সংঘটিত কৰিবলৈ মছজিদৰ সকলো চিচিটিভি আগতীয়াকৈ বন্ধ কৰি দিয়া হৈছিল।
অনুমান কৰা হৈছে যে পৰিয়ালটোৰ কোনোবা ঘনিষ্ঠ ব্যক্তিয়ে এই হত্যাকাণ্ড সংঘটিত কৰিছে। আৰক্ষীয়ে দোষীক বিচাৰি উলিয়াবলৈ সকলো দিশ সামৰি তদন্ত কৰি আছে।
স্থানীয় ৰাইজে জনোৱা মতে, আন দিনৰ দৰে স্থানীয় ৰাইজে পুৱা ১১ বজাত নামাজ আদায় কৰিবলৈ মছজিদলৈ আহিছিল। যদিও মৌলবীজনক কেইবাবাৰো তলৰ পৰা মাতিছিল, তথাপিও তেওঁ নাহিল। এনে অৱস্থাত একাংশ লোকে জানিবলৈ ওপৰলৈ উঠি গ’ল। তেওঁলোকে দেখিলে যে মৌলবীৰ পত্নী আৰু দুগৰাকী কন্যাৰ মৃতদেহ তাত পৰি আছে।
এই হত্যাকাণ্ড কোনে সংঘটিত কৰিলে সেই সন্দৰ্ভত তদন্ত অব্যাহত আছে। ঘটনাস্থলীত উপস্থিত হয় ফৰেনছিক দল আৰু কুকুৰৰ দল। মৌলবী ইব্ৰাহিমৰো জেৰা অব্যাহত ৰাখিছে আৰক্ষীয়ে।
