বংগোপসাগৰত পুনৰ সৃষ্টি হোৱাৰ পথত নতুন ঘূৰ্ণীবতাহ। ভাৰতীয় বতৰ বিজ্ঞান বিভাগে জানিবলৈ দিয়া মতে দক্ষিণ-পূব বংগোপসাগৰত যি গভীৰ নিম্নচাপ সৃষ্টি হৈছিল, সেইটোৱে অধিক শক্তি সঞ্চয় কৰি ভয়াৱহ ঘূৰ্ণীবতাহলৈ পৰিণত হৈছে। ইয়াৰ নাম ৰখা হৈছে ‘মোন্থা’ ।
বতৰ বিজ্ঞান বিভাগে জনোৱা মতে, অহা ১২ ঘণ্টাত এই ঘূৰ্ণীবতাহ অধিক প্ৰবল হ’ব। দক্ষিণ-পশ্চিম আৰু পশ্চিম-মধ্য বংগোপসাগৰত ই ক্ৰমান্বয়ে তীব্ৰ ৰূপ ধাৰণ কৰিব পাৰে। পূৰ্বাভাস অনুসৰি মঙলবাৰে পুৱাৰ ভিতৰত ই অতি তীব্ৰ ঘূৰ্ণীবতাহৰ ৰূপ ল’ব পাৰে।
এই ঘূৰ্ণীবতাহৰ নিৰ্দিষ্ট গতিপথ এতিয়াও স্পষ্ট হোৱা নাই। কিন্তু বতৰ বিজ্ঞানীসকলৰ মতে মান্থাই শক্তি সঞ্চয় কৰি উত্তৰ-পশ্চিম দিশলৈ গতি কৰিব পাৰে। ইয়াৰ বাবে আগন্তুক কেইদিনমানৰ ভিতৰত অন্ধ্ৰ প্ৰদেশ, ওড়িশা, পশ্চিম বংগ আৰু বাংলাদেশৰ উপকূলীয় অঞ্চলত প্ৰবল বৰষুণ আৰু ধুমুহা সৃষ্টি হ’ব পাৰে।
বতৰ বিজ্ঞান বিভাগে মাছমৰীয়াসকলক আগন্তুক কেইদিনমানৰ বাবে সাগৰলৈ নাযাবলৈ পৰামৰ্শ দিছে। ইয়াৰ উপৰিও উপকূলীয় অঞ্চলত ইতিমধ্যে সতৰ্কবাণী জাৰি কৰা হৈছে।
যদি মঙলবাৰৰ ভিতৰত ‘মোন্থা’ অতি ভয়াৱহ ঘূৰ্ণীবতাহলৈ পৰিণত হয়, তেন্তে ঘণ্টাত ১২০-১৩০ কিলোমিটাৰ পৰ্যন্ত ধুমুহা-বতাহৰ সম্ভৱনা আছে। ইয়াৰ ফলত গছ-গছনি উভালি পেলোৱা, বিদ্যুৎ বিচ্ছিন্ন হোৱা, শস্যৰ ক্ষতি আৰু ঘৰ-দুৱাৰৰ ক্ষতি হ’ব পাৰে।
ইতিমধ্যে সংশ্লিষ্ট এলেকাসমূহত সতৰ্কতা জাৰি কৰা হৈছে আৰু সজাগ হৈ থাকিবলৈ জিলা প্ৰশাসনক নিৰ্দেশ দিয়া হৈছে।
তদুপৰি, ৰাজ্য আৰু কেন্দ্ৰীয় চৰকাৰে ৰাষ্ট্ৰীয় দুৰ্যোগ সঁহাৰি বাহিনীক সাজু কৰি ৰাখিছে। উপকূলীয় অঞ্চলত সাহায্য আৰু উদ্ধাৰ কামৰ বাবে বিশেষ দল নিয়োগ কৰা হ’ব পাৰে।
বংগোপসাগৰৰ ঘূৰ্ণীবতাহ ‘মোন্থা’ই কিমান শক্তি বৃদ্ধি কৰে আৰু আগন্তুক ২৪ ঘন্টাত কোন দিশলৈ গতি কৰে সেইটো উপকূলীয় ৰাজ্যসমূহে এতিয়া নিৰীক্ষণ কৰি আছে। ইতিমধ্যে বতৰ বিজ্ঞান বিভাগ আৰু প্ৰশাসনে সতৰ্কতামূলক ব্যৱস্থা আৰম্ভ কৰিছে।
এই ঘূৰ্ণীবতাহৰ প্ৰভাৱ অসমত বিশেষ পৰাৰ সম্ভাৱনা নাই যদিও বতৰ ডাৱৰীয়া হোৱাৰ লগতে সাধাৰণ বৰষুণ হোৱাৰ সম্ভাৱনা নুই কৰিব নোৱাৰি।
