স্বচ্ছ ৰাজনীতিৰ প্ৰতিশ্ৰুতি দি তামিলনাডুৰ শাসনভাৰ গ্ৰহণ কৰিছিল থালাপথী বিজয়ে। কিন্তু মুখ্যমন্ত্ৰীৰ চকীত বহিয়েই তেওঁ আন সাধাৰণ ৰাজনীতিবিদৰ দৰেই কাম কৰিবলৈ আৰম্ভ কৰিছে। ক্ষমতা হাতলৈ অহাৰ লগে লগে তেওঁ বিৰোধী শিবিৰত বিভাজন অনাৰ চেষ্টা চলাইছে। শেহতীয়া পৰিস্থিতিৰ প্ৰতি লক্ষ্য ৰাখিলে দেখা যায় যে প্ৰয়াত নেত্ৰী জয়ললিতাৰ দল এ আই এ ডি এম কে এতিয়া দুটা ভাগত বিভক্ত হোৱাৰ দিশে আগবাঢ়িছে। দলটোৰ এটা বৃহৎ অংশই বৰ্তমানৰ মুৰব্বী ই পালানিস্বামীৰ বিৰুদ্ধে গৈ বিজয়ক সমৰ্থন কৰাৰ কথা ঘোষণা কৰিছে।
তামিলনাডু বিধানসভাৰ মুঠ আসন হৈছে ২৩৪ খন আৰু ইয়াত চৰকাৰ গঠন কৰিবলৈ ১১৮ খন আসনৰ প্ৰয়োজন হয়। শেহতীয়া নিৰ্বাচনত বিজয়ৰ দল টিভিকে একক বৃহত্তম দল হিচাপে আত্মপ্ৰকাশ কৰিছিল যদিও চৰকাৰ গঠনৰ বাবে প্ৰয়োজনীয় মেজিক নাম্বাৰ লাভ কৰিবলৈ সক্ষম হোৱা নাছিল। নিৰ্বাচনত তেওঁৰ দলে ১০৮ খন আসন লাভ কৰিছিল যদিও বিজয়ে নিজে দুটা সমষ্টিৰ পৰা জয়ী হোৱাৰ বাবে তেওঁলোকৰ বিধায়কৰ সংখ্যা ১০৭ জনলৈ হ্ৰাস পায়। পৰৱৰ্তী সময়ত কংগ্ৰেছৰ ৫ জন, বাওঁপন্থী দলৰ ৪ জন, ভি চি কে আৰু মুছলিম লীগৰ সমৰ্থন লাভ কৰি বিজয়ে মুখ্যমন্ত্ৰী হিচাপে শপত গ্ৰহণ কৰে। বৰ্তমান বিজয়ৰ হাতত চৰকাৰ চলাবলৈ প্ৰয়োজনীয় সংখ্যা আছে যদিও এই অৱস্থাটো তেওঁৰ বাবে একেবাৰে সুৰক্ষিত নহয়।
সেয়েহে চৰকাৰখন সুৰক্ষিত কৰিবলৈ বিজয়ে বিৰোধী শিবিৰৰ পৰা সমৰ্থন আদায় কৰাৰ চেষ্টা চলাইছে। সূত্ৰৰ পৰা জানিব পৰা মতে, জয়ললিতাৰ দলৰ প্ৰায় ৩০ জন বিধায়কে এতিয়া বিজয়ক সমৰ্থন কৰিবলৈ সাজু হৈছে। এই বিদ্ৰোহী বিধায়কসকলৰ নেতৃত্ব দিছে চি ভি ছানমুগাম আৰু এছ পি ভেলুমণিয়ে। তেওঁলোকে দাবী কৰিছে যে দলটোৰ প্ৰায় দুই তৃতীয়াংশ বিধায়ক তেওঁলোকৰ লগত আছে। তেওঁলোকে দলটো ভাঙিব নিবিচাৰে যদিও মুৰব্বী পালানিস্বামীক বিজয়ক সমৰ্থন কৰিবলৈ হেঁচা প্ৰয়োগ কৰিছে। আনকি তেওঁলোকে বিধানসভাত দলৰ নেতা হিচাপে পালানিস্বামীৰ সলনি এছ পি ভেলুমণিক বাছনি কৰাৰো প্ৰস্তাৱ দিছে। এই সকলোবোৰ ঘটনাই জয়ললিতাৰ দলত এক ডাঙৰ বিভাজনৰ ইংগিত দিছে।
