অসমতে বাথৰুমৰ ভিতৰত কিলবিলাই ফুৰিছে ৩০ টা সাপ! দেখি গা শিয়ৰি উঠা দৃশ্য; ভাইৰেল ভিডিঅ’

জংঘলত সাপ দেখাটো সিমান আতংকৰ কথা নহয়। কিন্তু ঘৰৰ দুৱাৰমুখত যদি জংঘলৰ সেই বিভীষিকা দেখা দিয়ে, তেন্তে সেয়া হাৰ্ট ফেইল কৰাৰ দৰে ঘটনা। অসমতো ঘটিছে এনে এক ঘটনা। বাথৰুমৰ দুৱাৰ খুলি ঘৰৰ মালিকে কিলবিলাই ফুৰা সাপবোৰ দেখি একপ্ৰকাৰ মূৰ্চা যোৱা অৱস্থা। এটা বা দুটা নহয়, এটা এটাকৈ উদ্ধাৰ কৰা হ’ল ৩০টা সাপৰ পোৱালি। সেই ঘটনাৰ ভিডিঅ’ ভাইৰেল হৈ পৰিছে ছ’চিয়েল মিডিয়াত। য’ত দেখা গৈছে তাত বেৰৰ ফাটবোৰৰ পৰা কেইবাটাও নতুনকৈ ফুটা সাপৰ পোৱালি ওলাই আহিছে।

নগাঁও জিলাৰ কলিয়াবৰত সংঘটিত হৈছে এই ঘটনা। এটা ঘৰৰ বাথৰুমত বহু সাপ দেখি ঘৰৰ মালিকে ঘৰৰ পৰা ওলাই আহিল। এই খবৰ শুনি স্থানীয় ৰাইজে সাপ চাবলৈ ভিৰ কৰিলে। দেখা গৈছে যে বাথৰুমৰ বেৰৰ ফাটবোৰত অসংখ্য সাপৰ পোৱালি ইটোৱে সিটোৰ লগত বান্ধ খাই আছে। বাথৰুমৰ মজিয়াত কিছুমানে ঘূৰি ফুৰিছে।

এই দৃশ্য দেখি স্থানীয় ৰাইজে সঞ্জীৱ ডেকা নামৰ প্ৰসিদ্ধ সাপ উদ্ধাৰকাৰীজনক খবৰ দিয়ে। অঞ্চলটোত তেওঁক ‘সৰ্প মানৱ’ বুলি জনা যায়। সেই ঘৰৰ পৰা এটা এটাকৈ ৩০ টা সাপ উদ্ধাৰ কৰা হয়। সঞ্জীৱে কয়, নতুনকৈ কণীৰ পৰা ফুটা প্ৰতিটো সাপ বিষহীন। মানুহৰ বাবে বিপদজনক নহ’লেও এই সাপটো অতি আক্ৰমণাত্মক। স্থানীয়ভাৱে তেওঁলোকক ঢোৰাসাপ বুলি জনা যায়।

বিশেষজ্ঞসকলৰ মতে, গ্ৰীষ্মৰ পিছত বাৰিষাৰ আৰম্ভণিৰ এই সময়খিনি সাপৰ প্ৰজননৰ বাবে আদৰ্শ সময়। ফলত অৰণ্যৰ ওচৰৰ অঞ্চলত এই সময়ছোৱাত সাপৰ প্ৰাদুৰ্ভাৱ অলপ বাঢ়ি যায়। সেই বুলি ঘৰৰ সকলোৰে অলক্ষিতে বাথৰুমত সাপৰ কণী পৰা আৰু সেই কণী ফুটি পোৱালি ওলোৱাটো সঁচাকৈয়ে আচৰিত কথা।

উল্লেখ্য যে কলিয়াবৰত এয়াই প্ৰথমবাৰৰ বাবে সাপ উদ্ধাৰৰ ঘটনা নহয়, কিছুদিন পূৰ্বে এই অঞ্চলৰ চাহ বাগিচাৰ পৰা উদ্ধাৰ হৈছিল এটা বাৰ্মিজ পাইথন। প্ৰায় ১৪ ফুট দীঘল আৰু ৫৫ কিলোগ্ৰাম ওজনৰ পাইথনটো চাবলৈ অঞ্চলটোত ভিৰ হৈছিল। সৰ্প মানৱ সঞ্জীৱ ডেকাই উদ্ধাৰ কৰিছিল সেই বিশাল সাপটো।