বিশ্বৰ আগশাৰীৰ প্ৰযুক্তি কোম্পানী চিচকোৱে শেহতীয়াকৈ এক ডাঙৰ সিদ্ধান্ত গ্ৰহণ কৰিছে। কোম্পানীটোৰ মুখ্য কাৰ্যবাহী বিষয়া ছাক ৰবিন্সে কৰ্মচাৰীসকললৈ প্ৰেৰণ কৰা এখন পত্ৰত জানিবলৈ দিয়া মতে, বিশ্বজুৰি প্ৰায় ৪,০০০ কৰ্মচাৰীক চাকৰিৰ পৰা বৰ্খাস্ত কৰা হ’ব। মেটা, আমাজন আৰু অৰেকলৰ দৰে ডাঙৰ কোম্পানীৰ পিছত এতিয়া চিচকোৱেও নিজৰ কৰ্মচাৰী হ্ৰাস কৰাৰ পথ বাছি লৈছে।
আচৰিত কথাটো হ’ল যে কোম্পানীটোৱে লোকচানৰ সন্মুখীন হৈ এই সিদ্ধান্ত লোৱা নাই। বৰঞ্চ শেহতীয়া ত্ৰৈমাসিকত কোম্পানীটোৱে ১৫.৮ বিলিয়ন ডলাৰৰ এক বৃহৎ ৰাজহ অৰ্জন কৰিছে, যিটো যোৱা বছৰৰ একে সময়ৰ তুলনাত ১২ শতাংশ বেছি। তথাপিও কৰ্মচাৰী কিয় ছাঁটাই কৰা হৈছে তাৰ কাৰণ দৰ্শাই মুখ্য কাৰ্যবাহী বিষয়াগৰাকীয়ে কয় যে কৃত্ৰিম বুদ্ধিমত্তা বা এ আইৰ এই নতুন যুগত আগবাঢ়ি যাবলৈ কোম্পানীটোক কিছুমান কঠোৰ সিদ্ধান্ত ল’বলগীয়া হৈছে। ভৱিষ্যতৰ সুযোগ আৰু প্ৰয়োজনীয়তাবোৰৰ প্ৰতি লক্ষ্য ৰাখি কোম্পানীটোৱে নিজৰ বিনিয়োগৰ দিশ সলনি কৰিবলৈ এই পদক্ষেপ হাতত লৈছে।
এই ছাঁটাই প্ৰক্ৰিয়াত কোম্পানীটোৰ মুঠ কৰ্মচাৰীৰ ৫ শতাংশতকৈয়ো কম লোকে চাকৰি হেৰুৱাব। বৰ্তমান বিশ্বজুৰি চিচকোত প্ৰায় ৮০,০০০ কৰ্মচাৰীয়ে কাম কৰে। অৱশ্যে কোনবোৰ বিভাগৰ কৰ্মচাৰী বেছিকৈ প্ৰভাৱিত হ’ব সেই কথা এতিয়াও স্পষ্ট কৰা হোৱা নাই। কোম্পানীটোৱে ১৪ মে’ৰ পৰা প্ৰভাৱিত কৰ্মচাৰীসকলক এই বিষয়ে আনুষ্ঠানিকভাৱে অৱগত কৰিবলৈ আৰম্ভ কৰিব। উল্লেখযোগ্য যে কৰ্মচাৰী ছাঁটাইৰ এই খবৰ ওলোৱাৰ পিছতে চিচকোৰ শ্বেয়াৰৰ মূল্য ১৭ শতাংশ বৃদ্ধি পায়।
চাকৰি হেৰুওৱা কৰ্মচাৰীসকলক কোম্পানীটোৱে উপযুক্ত আৰ্থিক সাহায্য আৰু প্ৰাপ্য বোনাচ প্ৰদান কৰিব বুলি আশ্বাস দিছে, যাৰ বাবে কোম্পানীটোৰ প্ৰায় ১ বিলিয়ন ডলাৰ খৰচ হ’ব। ইয়াৰ উপৰিও প্ৰভাৱিত কৰ্মচাৰীসকলক নতুন চাকৰি বিচৰাত সহায় কৰা হ’ব আৰু এবছৰৰ বাবে চিচকোৰ বিভিন্ন পাঠ্যক্ৰমৰ বিনামূলীয়া সুবিধা দিয়া হ’ব যাতে তেওঁলোকে নিজৰ দক্ষতা বৃদ্ধি কৰিব পাৰে। ছাক ৰবিন্সে জনোৱা মতে, কোম্পানীটোৱে এতিয়া চিলিকন, অপটিক্স, চাইবাৰ নিৰাপত্তা আৰু কৃত্ৰিম বুদ্ধিমত্তাৰ প্ৰসাৰৰ ক্ষেত্ৰত অধিক গুৰুত্ব আৰু বিনিয়োগ প্ৰদান কৰিব।
