ৰাষ্ট্ৰীয় ঘাইপথ নিৰ্মানেৰে উন্নয়নৰ বতৰা অনাৰ বিপৰীতে দক্ষিণ কামৰূপত ব্যাপক হাৰত কৃষিভূমি ধংসৰে খেতিয়ক পৰিয়াললৈ ভাবুকি কঢ়িয়াই আনিছে একাংশ অসাধু ব্যৱসায়ীয়ে।
যোৱা কিছুদিন ধৰি জীয়াকুৰ, জেজাবৰী গাঁৱত এফালে কলহী (কুলশী) নদী আৰু আনফালে দৰাবিলৰ মাজত বাচি থকা সেউজ কৃষি ভূমিৰ মাটি দুখীয়া কৃষকৰ পৰা কিনি অবাধে খনন চলাই বৃহৎ বৃহৎ গাঁতৰ সৃষ্টি কৰিছে।
দুই এজন সচেতন গঞাই ইয়াৰ বিৰোধ কৰাত সাময়িকভাবে যোৱা দুই তিনি দিনত মাটি কঢ়িওৱা দাম্পাৰৰ চলাচল ব্যাহত হৈছে যদিও এই অসাধু চক্ৰই আৰক্ষী-প্ৰশাসন, বনবিভাগ আৰু খনি বিভাগৰ একাংশ বিষয়া আৰু কৰ্মচাৰীক মেনেজ কৰি পুনৰ সক্ৰিয় হোৱাৰ যোজা চলাইছে।
খনি বিভাগে মাটি খননৰ অনুজ্ঞাপত্ৰ প্ৰদান কৰে যদিও উক্ত গাঁও দুখনৰ ক্ষেত্ৰত সেই অনুজ্ঞাপত্ৰ লোৱা হৈছে নে নাই সেয়া সন্দেহজনক বুলি প্ৰকাশ কৰিছে স্থানীয় লোকসকলে।
দুই এজন গঞাই আপত্তি দৰ্শোৱাৰ পিছতেই সেইসকল ব্যৱসায়ীয়ে মাটি খনন কৰিবলৈ শংকিত হৈ খনন কাৰ্য সাময়িকভাৱে বন্ধ কৰাৰ বাবে স্থানীয় লোকসকলে তেওঁলোকৰ অনুজ্ঞাপত্ৰ সন্দৰ্ভত সন্দেহ প্ৰকাশ কৰিছে।
স্থানীয় ৰাইজৰ অভিযোগ, বহু পৰিয়ালৰ কৃষিভূমি ডাম্পাৰ চলাচলৰ ফলত ইতিমধ্যেই নষ্ট হৈছে। ভুক্তভোগী কিছু পৰিয়ালে তেওঁলোকৰ কৃষিভূমি পুনৰ কৃষি-উপযোগী কৰি দিবলৈ দাবী জনাইছে যদিও এই সকল ব্যৱসায়ীৰ এতিয়া কৃষক পৰিয়ালৰ দাবীৰ প্ৰতি ভ্ৰুক্ষেপ নাই।
জেজাবৰী আৰু জিয়াকুৰ গাঁৱৰ জৈৱ বৈচিত্ৰৰে ভৰা পথাৰৰ মাজেৰেই দুষ্প্ৰাপ্য শিহুৰ বাসস্থান কলহী নদী আৰু দৰাবিলৰ সংযোগৰ সুঁতি। তেনে স্থলত প্ৰায় ১০ হাজাৰ বিঘাৰ এই সুবিশাল পথাৰত দাম্পাৰৰ দৌৰাত্মই জৈৱবৈচিত্ৰ আৰু দুখীয়া খেতিয়ক পৰিয়াল উভয়লৈ প্ৰবল ভাবুকি কঢ়িয়ায় আনিছে।
মাটি খননেৰে কৃষিভূমি খেতিৰ অনুপযোগী কৰি এই মাটি industrial belt লৈ পৰিবৰ্তন কৰাৰ গভীৰ সড়যন্ত্ৰ আজি কেইবাবছৰৰ ধৰি চলি আছে দক্ষিণ কামৰূপত, যাৰ পৰিপ্ৰেক্ষিতত সচেতন ৰাইজে আৰক্ষী-প্ৰশাসনক চোকা নজৰ ৰাখিবলৈ দাবী জনাইছে।
সংগ্ৰামী কৃষক শ্ৰমিক সংঘৰ সাধাৰণ সম্পাদক দীনেশ দাসে কয় যে অবৈধ খননৰ ফলত সৃষ্টি হোৱা এনে অসংখ্য পুখুৰী সদৃশ গাতত পৰি দক্ষিণ কামৰূপত ইতিমধ্যে ২৫ জনতকৈ অধিক মানুহ মৃত্যুখত পৰিছে।
“বহুজাতিক কোম্পানীৰ স্বাৰ্থৰ লগতে স্থানীয় একাংশ দালাল আৰু অসাধু ব্যৱসায়ীৰ নেতৃত্বত চলা এনে অবৈধ খনৰ ফলত এফালে চৰকাৰে ৰাজহ হেৰুৱাইছে আৰু আনফালে বহুলোক মৃত্যমুখত পৰিছে কিন্তু পৰিয়ালে আজিকোপতি কোনো ক্ষতিপুৰণ নাপালে।”- দাসে কয়।
উন্নত মানৰ শালি ধান আৰু সৰিয়হ উৎপাদনেৰ শ্ৰমজীবি কৃষকে স্বাৱলম্বিতা নতুন নিদৰ্শন দাঙি ধৰাৰ সময়তে জধেমধে চলোৱা এনে পথাৰ খনন ভৱিষ্যত প্ৰজন্মৰ বাবেই এক অশনি সংকেত বুলি দোহাৰে কৃষক নেতা আৰু স্থানীয় বাসিন্দা দেবজিত চৌধুৰীয়ে।
কৃষিৰ সম্ভাৱনা প্ৰতি লক্ষ ৰাখি কৃষি বিভাগে এই পথাৰত যোৱা কেইবছৰত কেইবাটাও সৌৰ শক্তি চালিত পানী যোগান আঁচনিত অনুমোদনও জনাইছে এই পথাৰতেই।
