কেজিয়ে কেজিয়ে সোণ, পাহাৰসম নোটৰ বাণ্ডিল! ১৭০ কোটি টকাৰ অবৈধ সম্পত্তি জব্দ আয়কৰৰ
১৭০ কোটি টকাৰ সম্পত্তি! মহাৰাষ্ট্ৰৰ নান্দেড়ত আয়কৰ বিভাগৰ অভিযানৰ সময়ত উদ্ধাৰ হৈছে বিপুল পৰিমাণৰ নগদ ধন, কেজিয়ে কেজিয়ে সোণ। সূত্ৰৰ পৰা জানিব পৰা মতে, ভাণ্ডাৰী ফাইনেন্স আৰু আদিনাথ সমবায় বেংকত ৭২ ঘণ্টীয়া অবিৰত ‘অভিযান’ চলিছিল। কেবল নগদ ধন গণনা কৰিবলৈকে ১৪ ঘণ্টা সময় লাগে!
আয়কৰ বিভাগৰ তথ্য অনুসৰি ভাণ্ডাৰী পৰিয়ালৰ নান্দেড়ত ব্যক্তিগত বিনিয়োগৰ ব্যৱসায় আছে। সেই ব্যৱসায়ত কৰ ফাঁকিৰ অভিযোগ উত্থাপন হৈছিল। তাৰ ওপৰত ভিত্তি কৰি মহাৰাষ্ট্ৰৰ ছখন জিলা যেনে পুনে, নাচিক, নাগপুৰ, পাৰভানী, ছত্ৰপতি শম্ভজিনগৰ, নান্দেড়ত শতাধিক আয়কৰ বিষয়াই তালাচী চলায়।
লগতে পঢ়কঃৰাজহ আহৰণৰ বাবে বাহিৰৰ প্ৰতিষ্ঠানক মাটি লিজত দিব কটন বিশ্ববিদ্যালয়ে
আয়কৰ বিভাগৰ সূত্ৰ অনুসৰি নান্দেড়ত ভাণ্ডাৰীৰ ‘গুদামৰ’ৰ পৰা মুঠ ১৭০ কোটি হিচাপবিহীন সম্পত্তি জব্দ কৰা হৈছে। ইয়াত ১৪ কোটি নগদ ধন আছে। টকা গণনা কৰিবলৈ বেংকৰ পৰা অনা হয় টকা গণনা কৰা মেচিনটো। সেই মেচিনটো ব্যৱহাৰ কৰি সকলো টকা গণনা কৰিবলৈ প্ৰায় ১৪ ঘণ্টা সময় লাগে!
ইয়াৰ উপৰিও অভিযানত উদ্ধাৰ হৈছে ৮ কেজি সোণ আৰু বহু নথি-পত্ৰ। যিবোৰ নথি-পত্ৰ আয়কৰ কৰ্তৃপক্ষই ব্যক্তিগতভাৱে পৰীক্ষা কৰি আছে। তেওঁলোকৰ সন্দেহ যে নথি-পত্ৰত আৰু অধিক অবৈধ সম্পত্তিৰ তথ্য পোহৰলৈ আহিব পাৰে।
সূত্ৰৰ পৰা জানিব পৰা মতে, ২৫খন বাহনেৰে নান্দেড়ত উপস্থিত হয় ১০০ৰো অধিক আয়কৰ বিষয়া। আয়কৰ বিভাগে নান্দেড়ৰ আলী ভাই টাৱাৰ নামৰ অট্টালিকাটোত থকা ভাণ্ডাৰী ফাইনেন্স প্ৰাইভেট লিমিটেডৰ কাৰ্যালয়লৈ গৈ তালাচী আৰম্ভ কৰে। জনা গৈছে যে আয়কৰ বিভাগে ভৱিষ্যতেও নিৰ্দিষ্ট তথ্যৰ ভিত্তিত এনেদৰে তালাচী অভিযান অব্যাহত ৰাখিব।