মনোৰঞ্জনৰ জগত মানে সপোনৰ জগত। এই পৃথিৱীত প্ৰতিষ্ঠিত সকলক চাই আমি ভাবো তেওঁলোকৰ কাম কিমাননো সহজ! বহুতে খ্যাতি আৰু সৌভাগ্যৰ পিছত দৌৰিছে। কিন্তু সকলোৰে ভাগ্য ভাল নহয়। সফলতাৰ বাবে কঠোৰ পৰিশ্ৰম আৰু প্ৰতিভাৰ প্ৰয়োজন। তেনে এগৰাকী গায়িকাৰ কথাই ক’ব খোজা হৈছে যাৰ শৈশৱ অতি সংঘাতপূৰ্ণ আছিল।
এই গায়িকাৰ পিতৃয়ে আগতে চিঙৰা বিক্ৰী কৰিছিল। গায়িকাগৰাকীয়ে জীৱনত এটা সময়ত দিনটোত মাত্ৰ ৫০ টকা উপাৰ্জন কৰিছিল। কিন্তু আজি গায়িকগৰাকীয়ে এটা গান ৰেকৰ্ডিং কৰিবলৈ লাখ লাখ টকা লয়। নেহা কক্কৰৰ কথাই কোৱা হৈছে। আজি বলীউডৰ অন্যতম সফল কণ্ঠশিল্পী নেহা কক্কৰ। ইটোৰ পিছত সিটো হিট গানেৰে তেওঁ দৰ্শকৰ হৃদয় জয় কৰিছে।
অৱশ্যে এই স্থান নেহাই সহজে পোৱা নাছিল। তেওঁৰ সফলতাৰ আঁৰত নিহিত হৈ আছে সুদীৰ্ঘ সংঘাতৰ কাহিনী। ৩৫ বছৰীয়া নেহাই বৰ্তমান এটা গীতৰ বাবে ১৫ লাখ টকা লয়। কিন্তু এসময়ত নেহাই বিয়াৰ অনুষ্ঠানত ভজন গাই টকা উপাৰ্জন কৰিছিল। ১৯৮৮ চনৰ ৬ জুনত উত্তৰাখণ্ডৰ ঋষিকেশত জন্মগ্ৰহণ কৰে নেহা কক্কৰে।
নেহাৰ গানৰ সপোন পূৰণৰ বাবে ১৯৯০ চনত নেহাৰ পৰিয়াল দিল্লীলৈ গুচি যায়। চাৰি বছৰ বয়সৰ পৰাই স্থানীয় বিভিন্ন অনুষ্ঠান আৰু ধৰ্মীয় অনুষ্ঠানত গান গাবলৈ আৰম্ভ কৰে নেহাই। নৱৰাত্ৰি চৌকীত ভাতৃ আৰু ভগ্নী সোনু কক্কৰ আৰু টনি কক্কৰৰ সৈতে কণ্ঠদান কৰে নেহাই। এই অনুষ্ঠানটো কৰি তেওঁ দিনটোত মাত্ৰ ৫০ টকাহে পাইছিল।
২০০৪ চনত ভাতৃ টনিৰ সৈতে মুম্বাইলৈ গুচি যায় নেহা। ইয়াৰ পিছত তেওঁ ইণ্ডিয়ান আইডলৰ বাবে অডিচন দিছিল আৰু তাত তেওঁক নাকচ কৰা হৈছিল। কিন্তু আজি নেহা বলীউডৰ অন্যতম ধনী কণ্ঠশিল্পী। দৰিদ্ৰতা আৰু বাধাই যে কেতিয়াও সপোন পূৰণৰ বাটত বাধাৰ সৃষ্টি কৰিব নোৱাৰে, সেই কথা প্ৰমাণ কৰিছে এই গায়িকাগৰাকীয়ে।
