লৰ্ডছ টেষ্টৰ চতুৰ্থ দিনৰ অন্যতম কৃতিত্ব আছিল ইংলেণ্ডক ১৯২ ৰানতে অল আউট কৰা। বুমৰহৰ নেতৃত্বত ছিৰাজ, আকাশ, নীতিশ, ৱাশ্বিংটনৰ সৌজন্যত এই কাম সম্ভৱ হৈছিল। অৱশ্যে দিনটোৰ শেষত ভাৰতীয় বেটছমেনৰ প্ৰদৰ্শনে টেষ্ট জয়ৰ ওপৰত শংকাৰ সৃষ্টি কৰিবলৈ যথেষ্ট।
চতুৰ্থ দিনৰ শেষত মাত্ৰ ৫৮ ৰান সংগ্ৰহ কৰিয়েই ৪টা উইকেট হেৰুৱায় ভাৰতে। প্ৰথম ইনিংছৰ পিছত দ্বিতীয় ইনিংছতো ব্যৰ্থ হয় শুভমন গিল। যশস্বী জয়ছোৱাল আৰু কৰুণ নায়াৰেও ৰান সংগ্ৰহত ব্যৰ্থ হয়। ভাগ্যৰ বলত বৰ্তি থাকিল লোকেশ ৰাহুল।
লৰ্ডছ টেষ্টত জয়ী হৈ শৃংখলাত আগবাঢ়ি থাকিবলৈ ভাৰতক আৰু ১৩৫ ৰানৰ প্ৰয়োজন। আনহাতে ইংলেণ্ডক প্ৰয়োজন ৬টা উইকেটৰ। পঞ্চম দিনটোত গম পোৱা যাব ভাগ্যই কাক সংগ দিয়ে।
তৃতীয় দিনৰ শেষত লৰ্ডছত শুভমন গিলক ভাল মুডত দেখা গৈছিল। চতুৰ্থ দিনতো সেই দমনীয় মেজাজ বজাই ৰাখিলে টিম ইণ্ডিয়াৰ ক্ৰিকেটাৰসকলে। ইংলেণ্ডে মাত্ৰ ১৯২ ৰানত অল আউট হোৱাৰ সময়তে ভাৰতে জয়ৰ গোন্ধ পাইছিল। মধ্যাহ্ন ভোজন বিৰতিৰ পূৰ্বে চাৰিটা উইকেট হেৰুৱাই ইংলেণ্ড হেঁচাত পৰিছিল।
মধ্যাহ্ন ভোজন বিৰতিৰ পিছতো তেওঁলোকৰ দুৰ্দশা শেষ নহ’ল। ইংলেণ্ডৰ হৈ জো ৰুটে (৪০) সৰ্বাধিক স্ক’ৰ কৰে। অধিনায়ক বেন ষ্টোকেছে ৩৩ ৰান সংগ্ৰহ কৰে। ৱাশ্বিংটন সুন্দৰে টিম ইণ্ডিয়াৰ হৈ বলিংত ব্যতিক্ৰমী প্ৰদৰ্শন আগবঢ়ায়। তেওঁ ২২ ৰানত ৪ টা উইকেট দখল কৰে।
আনহাতে, বুমৰাহ আৰু ছিৰাজে ২টাকৈ উইকেট দখল কৰে। আকাশ দীপ আৰু নীতিশ ৰেড্ডীয়ে ১ টাকৈ উইকেট দখল কৰে। এনে দলীয় বলিঙৰ প্ৰদৰ্শনো বহুদিনৰ মূৰত দেখা গ’ল। লিডছ টেষ্টত বুমৰাহৰ আধিপত্য দেখা গৈছিল। এজবাষ্টনত আকাশ দীপ আৰু মহম্মদ চিৰাজে ভাল প্ৰদৰ্শন কৰিছিল। লৰ্ডছত প্ৰথম ইনিংছত পুনৰ দুৰ্দান্ত ফৰ্ম দেখা গৈছিল। আৰু এইবাৰ ইংলেণ্ডৰ ইনিংছটো পাঁচজন বলাৰৰ সমূহীয়া প্ৰদৰ্শনে স্তব্ধ কৰিলে। ভাৰতৰ সন্মুখত লক্ষ্য আছিল ১৯৩ ৰান।
ইয়াৰ পিছত ছন্দপতন ঘটিছিল। যশস্বী জয়ছৱালে জোফ্ৰা আৰ্চাৰৰ অফ ষ্টাম্পৰ বাহিৰত বাউন্সাৰত আঘাত কৰি শূন্য ৰানতে উভতি আহে। মেচ বিজয়ী পৰিস্থিতিত এনে শ্বট খেলাটো ‘অক্ষমণীয় অপৰাধ’। ৰাহুলকো আৰম্ভণিতে অলপ শিথিল যেন লাগিছিল। ৫ ৰানত নিজৰ বলত ৰাহুলৰ সহজ কেচ ড্ৰপ কৰে ৱ’কেছে।
ইয়াৰ পিছতে ব্ৰাইডন কাৰ্টিছৰ বল এৰিবলৈ গৈ ১৪ ৰানৰ পিছত এলবিডব্লিউ আউট হয় কৰুণ নায়াৰ। এই টেষ্টৰ শ্ৰেষ্ঠ বেটছমেন ভাৰতীয় অধিনায়ক শুভমন গিলেও বেছি সময় বৰ্তি থাকিবলৈ সক্ষম নহ’ল। ফলত ৰাহুলক সংগ দিবলৈ ক্ৰীজলৈ আহিছিল নৈশ প্ৰহৰী আকাশ দীপ। কিন্তু কাম নিসিজিল।
ভাৰতক জয়ী হ’বলৈ আৰু ১৩৫ ৰানৰ প্ৰয়োজন। হাতত ৬টা উইকেট আছে। ৩৩ ৰানত বেটিং কৰি আছে ৰাহুলে। অৰ্থাৎ পঞ্চম দিনৰ আৰম্ভণিতে তেওঁৰ কান্ধত ডাঙৰ দায়িত্ব।
সংক্ষিপ্ত স্কোৰঃ
প্ৰথম ইনিংছ
ইংলেণ্ড-৩৮৭ (ৰুট ১০৪, বুমৰা ৫/৭৪)
ভাৰত- ৩৮৭ (ৰাহুল ১০০, ৱকছ ৩/৮৪)
দ্বিতীয় ইনিংছ
ইংলেণ্ড-১৯২ (ৰুট ৪০, ৱাশ্বিংটন ৪/২২)
ভাৰত-৫৮/৪ (ৰাহুল ৩৩ নট আউট, কাৰ্ছ ১১/২)
