আজি ২৬ জানুৱাৰী। সমগ্ৰ দেশৰ লগতে অসমতো যথোচিত মৰ্যাদাৰে ভাৰতৰ ৭৭ সংখ্যক গণতন্ত্ৰ দিৱস উদযাপন কৰা হৈছে। ১৯৫০ চনৰ আজিৰ দিনটোতে বিশ্বৰ বৃহত্তম লিখিত সংবিধানখন কাৰ্যকৰী কৰা হৈছিল। ইয়াৰ জৰিয়তে ভাৰতে এখন সাৰ্বভৌম, সমাজবাদী, ধৰ্মনিৰপেক্ষ আৰু গণতান্ত্ৰিক প্ৰজাতন্ত্ৰ হিচাপে বিশ্ব দৰবাৰত স্থিতি নিশ্চিত কৰিছিল। ভাৰতীয় নাগৰিকৰ সাংবিধানিক অধিকাৰ আৰু মৰ্যাদা প্ৰতিষ্ঠাৰ এক গুৰুত্বপূৰ্ণ মাইলৰ খুঁটি হিচাপে এই ঐতিহাসিক দিনটো পৰিগণিত।
দেশৰ ৰাজধানী দিল্লীৰ ‘কৰ্তব্য পথ’ত এক মৰ্যাদাপূৰ্ণ কাৰ্যসূচীৰে এই দিৱস পালন কৰা হৈছে। ৰাষ্ট্ৰপতিৰ উপস্থিতিত অনুষ্ঠিত এই অনুষ্ঠানত ভাৰতীয় সামৰিক বাহিনীৰ প্ৰতিৰক্ষা শক্তি আৰু দেশৰ সাংস্কৃতিক বৈচিত্ৰ্য প্ৰদৰ্শিত হ’ব। এইবাৰৰ নিৰ্ধাৰিত বিষয়বস্তু হৈছে “বন্দে মাতৰমৰ ১৫০ বছৰ”।
গণতন্ত্ৰ দিৱস উদযাপনৰ মূল লক্ষ্য হৈছে সংবিধান প্ৰদত্ত মৌলিক অধিকাৰ আৰু কৰ্তব্যসমূহৰ প্ৰতি সজাগতা সৃষ্টি কৰা। ভাৰতীয় সংবিধানে প্ৰদান কৰা ন্যায়, স্বাধীনতা, সমতা আৰু ভ্ৰাতৃত্ববোধৰ নীতিসমূহ বাস্তৱ ক্ষেত্ৰত ৰূপায়ণ কৰাটো প্ৰতিজন নাগৰিকৰে নৈতিক দায়িত্ব। সমাজৰ প্ৰতিটো শ্ৰেণীৰ লোকে যেতিয়া সংবিধানৰ সুৰক্ষা আৰু সম-অধিকাৰ লাভ কৰিব, তেতিয়াহে গণতন্ত্ৰৰ ভেটি অধিক শক্তিশালী হ’ব।
এই পবিত্ৰ ক্ষণত স্বাধীনতা সংগ্ৰামীসকলৰ ত্যাগ আৰু সংবিধান প্ৰণেতাসকলৰ দূৰদৰ্শিতাক স্বীকৃতি প্ৰদান কৰাটো অপৰিহাৰ্য। দেশৰ অগ্ৰগতিক অধিক সৰ্বাংগীণ আৰু সুদূৰপ্ৰসাৰী কৰি তুলিবলৈ হ’লে জাতি, ধৰ্ম, বৰ্ণ আৰু ভাষা নিৰ্বিশেষে দেশৰ ঐক্য বজাই ৰখাটো প্ৰয়োজন। ৭৭ সংখ্যক গণতন্ত্ৰ দিৱসত এখন উন্নত আৰু বৈষম্যমুক্ত ৰাষ্ট্ৰ গঢ়াৰ লক্ষ্যৰে প্ৰতিজন নাগৰিকে নিজৰ দায়িত্ব পালনৰ সংকল্প গ্ৰহণ কৰা উচিত।
