ভাৰত আৰু বাংলাদেশে মঙলবাৰে আন্তঃৰাষ্ট্ৰীয় সীমান্তত সতৰ্কতা বৃদ্ধিৰ বাবে সহমতত উপনীত হয়।
সীমান্ত সুৰক্ষা বাহিনী আৰু বাংলাদেশ বোৰ্ডাৰ গাৰ্ডে কাইটীয়া তাঁৰ নথকা অঞ্চলসমূহত যুটীয়া পহৰাৰ ব্যৱস্থা আৰু অধিক সংখ্যক পহৰা চকী স্থাপন কৰাৰ সিদ্ধান্ত গ্ৰহণ কৰে।
মিজোৰামৰ লগতে দক্ষিণ-পশ্চিম বাংলাদেশৰ ৰঙামাটি আৰু বান্দৰবন পাহাৰীয়া জিলাৰ জিলা ন্যায়াধীশ আৰু জিলা উপায়ুক্ত, বি এছ এফ আৰু বি জি বিৰ শীৰ্ষ বিষয়াৰ উপস্থিতিত অনুষ্ঠিত হোৱা বৈঠকত এই সিদ্ধান্ত গ্ৰহণ কৰা হয়।
বৈঠকত দুয়োখন দেশৰ গৃহ, বৈদেশিক মন্ত্ৰালয়, বাণিজ্য বিভাগৰ প্ৰতিনিধিসকলো উপস্থিত থাকে।
ম্যানমাৰৰ সৈতে মিজোৰামৰ ৪০৪ কিলোমিটাৰ আৰু বাংলাদেশৰ সৈতে ৩১৮ কিলোমিটাৰ সীমান্ত বৰ্তমানো মুক্ত অৱস্থাত আছে।
বি এছ এফে বাংলাদেশ সীমান্তত পহৰা দিয়াৰ বিপৰীতে অসম ৰাইফলছে ম্যানমাৰ সীমান্তত পহৰা দিয়ে।
বৈঠকত সীমান্তত পহৰা ব্যৱস্থাৰ উপৰিও প্ৰতিবেশী দেশ দুখনৰ মাজৰ ব্যাৱসায়িক সম্বন্ধৰ বিষয়ে আলোচনা কৰা হয়।
আনহাতে, বৈঠকত মহিলা আৰু শিশুৰ সৰবৰাহ, নিচাযুক্ত দ্ৰব্য আৰু পশুধনৰ সৰবৰাহ ৰোধ কৰাৰ ক্ষেত্ৰতো ভাৰত আৰু বাংলাদেশৰ মাজত বিভিন্ন সিদ্ধান্ত গ্ৰহণ কৰা হয়।
তদুপৰি, অবৈধ অনুপ্ৰৱেশকাৰী আৰু অপৰাধীসকলক ৰখাৰ বাবে নিৰ্বাসন কেন্দ্ৰ স্থাপন কৰা আৰু সীমান্ত অঞ্চলৰ মাটি কালিৰ জৰীপৰ প্ৰসংগতো আলোচনা কৰা হয়।
