সমগ্ৰ দেশৰ দৃষ্টি নিৱদ্ধ হৈ থকা অসম, পশ্চিমবংগ, তামিলনাডু, কেৰালা আৰু কেন্দ্ৰীয় শাসিত অঞ্চল পুডুচেৰীৰ বিধানসভা নিৰ্বাচনৰ দিন আজি আনুষ্ঠানিকভাৱে ঘোষণা কৰা হৈছে। নতুন দিল্লীৰ বিজ্ঞান ভৱনত আয়োজিত এক গুৰুত্বপূৰ্ণ সংবাদমেলত মুখ্য নিৰ্বাচনী আয়ুক্ত জ্ঞানেশ কুমাৰ আৰু নিৰ্বাচনী আয়ুক্ত সুখবীৰ সিং সান্ধু আৰু বিবেক যোশীয়ে এই নিৰ্বাচনী সূচী প্ৰকাশ কৰে। এই ঘোষণাৰ লগে লগে আটাইকেইখন নিৰ্বাচনী ৰাজ্যতে নিৰ্বাচনী আদৰ্শ আচৰণ বিধি তাৎক্ষণিকভাৱে বলৱৎ কৰা হৈছে।
অসমৰ ১২৬ খন বিধানসভা আসনৰ বাবে অহা ৯ এপ্ৰিলত ভোটগ্ৰহণ অনুষ্ঠিত হ’ব। নিৰ্বাচন আয়োগে জানিবলৈ দিয়া মতে, কাইলৈ অৰ্থাৎ ১৬ মাৰ্চত নিৰ্বাচনী অধিসূচনা জাৰি কৰা হ’ব। ইয়াৰ লগে লগেই আৰম্ভ হ‘ব মনোনয়ন দাখিলৰ প্ৰক্ৰিয়া। মনোনয়ন পত্ৰ দাখিলৰ অন্তিম দিন ধাৰ্য কৰা হৈছে ২৩ মাৰ্চ। দাখিল কৰা মনোনয়ন পত্ৰসমূহৰ পুনৰীক্ষণ (Scrutiny) অহা ২৪ মাৰ্চত সম্পন্ন কৰা হ’ব আৰু মনোনয়ন পত্ৰ প্ৰত্যাহাৰৰ অন্তিম দিন হ’ব ২৬ মাৰ্চ।
অসমৰ লগতে কেৰালা আৰু পুডুচেৰীৰ বিধানসভা নিৰ্বাচনো ৯ এপ্ৰিলতে একেটা পৰ্যায়ত সম্পন্ন কৰা হ’ব। আনহাতে, তামিলনাডুৰ ২৩৪ খন আসনৰ বাবে ২৩ এপ্ৰিলত আৰু পশ্চিমবংগৰ ২৯৪ খন আসনৰ বাবে ২৩ এপ্ৰিল আৰু ২৯ এপ্ৰিলত দুটা পৰ্যায়ত ভোটগ্ৰহণ অনুষ্ঠিত হ’ব। সমগ্ৰ দেশতে এই আটাইকেইখন ৰাজ্যৰ ভোট গণনা আৰু ফলাফল ঘোষণা অহা ৪ মে’ত একেলগে সম্পন্ন কৰা হ’ব। নিৰ্বাচন আয়োগৰ নিৰ্দেশ মৰ্মে অহা ৬ মে’ৰ ভিতৰত সমগ্ৰ নিৰ্বাচনী কাম-কাজ সম্পূৰ্ণ হ’ব লাগিব।
সংবাদমেল সম্বোধন কৰি মুখ্য নিৰ্বাচনী আয়ুক্ত জ্ঞানেশ কুমাৰে কয়, “আমি এক মুক্ত, নিৰপেক্ষ আৰু হিংসামুক্ত নিৰ্বাচন অনুষ্ঠিত কৰিবলৈ সম্পূৰ্ণৰূপে দায়বদ্ধ।” আয়োগে জনোৱা তথ্য অনুসৰি, এইবাৰৰ নিৰ্বাচনত মুঠ ১৭.৪ কোটি ভোটাৰে নিজৰ ভোটাধিকাৰ সাব্যস্ত কৰিব। নিৰ্বাচন সুচাৰুৰূপে পৰিচালনা কৰিবলৈ মুঠ ২.১৮ লাখ ভোটগ্ৰহণ কেন্দ্ৰ স্থাপন কৰা হ’ব আৰু আটাইকেইটাতে ১০০ শতাংশ ৱেবকাষ্টিং ব্যৱস্থা থাকিব। ৮৫ বছৰৰ ঊৰ্ধৰ ভোটাৰ আৰু শতায়ু গৰকা ব্যক্তিসকলৰ বাবে এইবাৰ ঘৰৰ পৰাই ভোটদান কৰাৰ বিশেষ সুবিধা আগবঢ়োৱা হ’ব।
নিৰাপত্তাৰ খাতিৰত কেন্দ্ৰীয় অৰ্ধসামৰিক বাহিনীৰ (CAPF) প্ৰায় ১.৪ লাখ জোৱান মোতায়েন কৰাৰ পৰিকল্পনা হাতত লোৱা হৈছে। অসমৰ প্ৰেক্ষাপটত এইবাৰো মূল যুঁজখন শাসকীয় বিজেপি নেতৃত্বাধীন এন ডি এ (NDA) আৰু বিৰোধী কংগ্ৰেছৰ মাজতে সীমাবদ্ধ থাকিব বুলি ধাৰণা কৰা হৈছে। নিৰ্বাচনী সূচী প্ৰকাশৰ লগে লগে ৰাজনৈতিক দলসমূহৰ মাজত ব্যাপক তৎপৰতা আৰম্ভ হৈছে আৰু ৪ মে’ৰ ফলাফলেহে স্পষ্ট কৰিব ৫ খন ৰাজ্যৰ ভৱিষ্যত কাৰ হাতত ন্যস্ত হ’ব।
