আইচিচি প্ৰতিযোগিতাত অষ্ট্ৰেলিয়া এক ভয়ংকৰ প্ৰতিদ্বন্দ্বী। আইচিচি প্ৰতিযোগিতাৰ নকআউট পৰ্যায়ত অষ্ট্ৰেলিয়া মানেই এক দুঃস্বপ্ন। ২০২৩ চনৰ বিশ্বকাপৰ ফাইনেলত ভাৰতে সেই আতংক সহ্য কৰিবলগীয়া হৈছিল।
মঙলবাৰে টিম ইণ্ডিয়াই অষ্ট্ৰেলিয়াৰ অহংকাৰ ভংগ কৰি চেম্পিয়নছ ট্ৰফীৰ ফাইনেলত প্ৰৱেশ কৰাৰ প্ৰত্যাহ্বানৰ সন্মুখীন হৈছিল। তাৰ লগতে অষ্ট্ৰেলিয়াৰ অভেদ্য মিথটোও ভাঙি পেলোৱাৰ প্ৰত্যাহ্বান। ডুবাইত একেলগে সেই দুটা প্ৰত্যাহ্বানৰ সন্মুখীন হৈছিল টিম ইণ্ডিয়াই।
২০২৩ চনৰ বিশ্বকাপত পৰাজয়ৰ মধুৰ প্ৰতিশোধ লৈ চেম্পিয়নছ ট্ৰফীৰ ফাইনেলত প্ৰৱেশ কৰিলে ৰোহিতৰ ব্ৰিগেডে। ভাৰতে ৪ উইকেটত জয়লাভ কৰে। তাকো সেই বিৰাট কোহলীৰ সৌজন্যত।
ভাৰতৰ বাবে লক্ষ্য আছিল ২৬৫ৰান। ডুবাইৰ স্লো টাৰ্নাৰ পিচত কামটো একেবাৰেই সহজ নাছিল। টিম ইণ্ডিয়াৰ আৰম্ভণিও আছিল অস্বস্তিকৰ। ৩০ ৰানত প্ৰথম উইকেটৰ পতন। অধিনায়ক ৰোহিত শৰ্মাই দলৰ ৪৩ ৰানত পেভলিয়নলৈ ৰাওনা হয়। সেয়ে চাপ পৰিল দলৰ ওপৰত। সেই চাপৰ সন্মুখীন হৈ বিৰাটে আকৌ এবাৰ নিজৰ স্বাভাৱিক শৈলীত যুঁজিবলৈ আৰম্ভ কৰিলে।
প্ৰথমতে সংগী শ্ৰেয়াছ আয়াৰ। শ্ৰেয়াস-কোহলীৰ ৯০ ৰানৰ পাৰ্টনাৰশ্বিপে ভাৰতক পুনৰ মেচলৈ ঘুৰাই আনে। হঠাতে ৪৫ ৰানত আউট হয় শ্ৰেয়াছ। তাৰ পিছত আকৌ যেতিয়া যুটী বন্ধাটো একেবাৰে প্ৰয়োজনীয়, এইবাৰ অক্ষৰৰ লগত আৰম্ভ কৰিলে বিৰাটে। ৪৪ ৰানৰ দ্ৰুতগতিৰ পাৰ্টনাৰশ্বিপ। ইফালে বিৰাটে অৰ্ধশতক অতিক্ৰম কৰে।
অক্ষৰ আউট হোৱাৰ পিছত তেওঁ পুনৰ ৰাহুলৰ সৈতে যুটী বান্ধিলে। তেওঁ দলৰ স্ক’ৰ ২২৫ ৰানলৈ বৃদ্ধি কৰে। ৯৮টা বলত ৮৪ ৰান সংগ্ৰহ কৰি যেতিয়া কোহলী উভতি আহিছিল, তেতিয়া দলটো যে জয়ী হ’ব তাত কোনো সন্দেহ নাছিল। বাকী কামখিনি কে এল ৰাহুল আৰু হাৰ্দিক পাণ্ডিয়াই কৰিছিল।
ইয়াৰ পূৰ্বে প্ৰথমে বেটিং কৰি অষ্ট্ৰেলিয়াই ২৬৪ ৰান সংগ্ৰহ কৰে। অষ্ট্ৰেলিয়াৰ বাবে দিনটোৰ আৰম্ভণি ভাল নাছিল। মেচখনৰ তৃতীয় অভাৰত ছামীয়ে যুৱ অ’পেনাৰ কুপাৰক ঘূৰাই পঠিয়ায়। কিন্তু প্ৰথম উইকেটৰ পিছতে ট্ৰেভিছ হেডে আক্ৰমণাত্মক ভূমিকা গ্ৰহণ কৰে। কিন্তু বৰুণ চক্ৰৱৰ্তীয়ে বহু ক্ষতি কৰাৰ আগতেই হেডক ঘূৰাই পঠালে। যদিও হেডে ৩৯ ৰানত আউট হৈছিল, স্মিথ-লাবুশ্বেনৰ পাৰ্টনাৰশ্বিপে ভাৰতৰ মূৰৰ কামোৰণি সৃষ্টি কৰিছিল।
অষ্ট্ৰেলিয়াৰ স্ক’ৰ যেতিয়া ১১০ ৰান হয়, তেতিয়া ৰবীন্দ্ৰ জাদেজাই লাবুশ্বানক ঘূৰাই পঠিয়ায়। জাডেজাই ক্ষিপ্ৰতাৰে ইংলিছকো (১১) ঘুৰাই পঠালে। ইফালে স্মিথে অৰ্ধশতক অৰ্জন কৰে। তাৰ পিছত কেৰীৰ সৈতে ৰানৰ গতি বৃদ্ধি কৰিবলৈ ধৰে। যেতিয়া স্মিথ ৭৩ ৰানত আউট হৈছিল, তেতিয়া অষ্ট্ৰেলিয়াৰ স্ক’ৰ আছিল ৫ উইকেটত ১৯৮ ৰান।
তাৰ পাছত অক্ষৰ পেটেলে সোনকালেই মেক্সৱেলক ঘূৰাই পঠিয়ালে। মেক্সৱেল আৰু স্মিথ আউট হোৱাৰ লগে লগে ৰান ৰেট অলপ লেহেমীয়া হ’ল। কিন্তু এলেক্স কেৰীয়ে এটা মূৰৰ পৰা যুঁজ দি থাকিল। শেষত ৫৭টা বলত ৬১ ৰান সংগ্ৰহ কৰি তেওঁ ৰান আউট হয়। কেৰীৰ ইনিংছে অষ্ট্ৰেলিয়ান দলটোক ২৫০ ৰানৰ সীমালৈ লৈ যায়। অৱশ্যে কেৰী আউট হোৱাৰ পাছত অষ্ট্ৰেলিয়াই বেছি ৰান সংগ্ৰহ কৰিব নোৱাৰিলে। শেষত ৪৯ অভাৰ আৰু ৩ বলত ২৬৪ ৰানত তেওঁলোকৰ ইনিংছ শেষ হয়।
চেম্পিয়নছ ট্ৰফীৰ নকআউটৰ দৰে মেচত এই ৰান সংগ্ৰহ কৰাটো সহজ কাম নাছিল। কিন্তু সেই লক্ষ্যত উপনীত হ’বলৈ টিম ইণ্ডিয়াই বিশেষ সংগ্ৰাম কৰিব নালাগিল৷ ভাৰতৰ বিজয়ৰ স্থপতি নিঃসন্দেহে বিৰাট কোহলী। কিন্তু মহম্মদ ছামী, শ্ৰেয়াছ আয়াৰ, অক্ষৰ পেটেল আৰু ৰবীন্দ্ৰ জাদেজাৰ অৱদানক কোনোপধ্যে আওকাণ কৰিব নোৱাৰি।
সংক্ষিপ্ত স্কোৰঃ
অষ্ট্ৰেলিয়া: ২৬৪ (স্মিথ ৭৩, কেৰী ৬১, ছামী ৩-৪৮)
ভাৰতঃ ২৬৭-৬ (কোহলী ৮৪, শ্ৰেয়াছ আয়াৰ ৪৫)
ভাৰতে ৪ উইকেটত জয়লাভ কৰে।
