ঘৰুৱা খেলপথাৰত দমন অব্যাহত ৰাখি ৰোহিত শৰ্মাৰ নেতৃত্বত টীম ইণ্ডিয়াই ৱেষ্ট ইণ্ডিজক ৬ উইকেট পৰাজিত কৰিলে। আঘাতৰ পিছত অধিনায়ক হিচাপে দললৈ প্ৰত্যাৱৰ্তন কৰা ৰোহিত শৰ্মাৰ সেই চিনাকি ছন্দও দেখা গ’ল তেওঁৰ খেলত।
দেওবাৰে আহমেদাবাদত টছত জিকি ৰোহিত শৰ্মাই প্ৰথমে ৱেষ্ট ইণ্ডিজক বেটিং কৰিবলৈ পঠিয়ায়। কিন্তু ভাৰীয় বলিঙৰ সন্মুখত তিষ্ঠিব নোৱাৰি এটাৰ পিছত উইকেট হেৰুৱাই শলঠেকত পৰে কেৰিবিয়ান দলটো।
দলৰ হৈ একমাত্ৰ জেছন হোল্ডাৰে প্ৰতিৰোধ গঢ়ি তুলি ৫৭ৰাণৰ এক আকৰ্ষণীয় ইনিংছ খেলে। হোল্ডাৰে এলেনৰ সৈতে যুটী বান্ধি অষ্টম উইকেটৰ যুটীত দলক ৭৯ৰাণৰ পৰা ডেৰশৰ সীমা অতিক্ৰম কৰায়।
লগতে পঢ়ক: যোৰহাটৰ নিমাতি ঘাটত পুনৰ এক অঘটন; কন্যাসহ আত্মহত্যাৰ চেষ্টা মাতৃৰ
অৱশ্যে ভাৰতীয় পেচ আৰু স্পীনৰ দমনীয় প্ৰদৰ্শনৰ আগত বৃহৎ স্ক’ৰ থিয় কৰাত ব্যৰ্থ হয় পোলাৰ্ড বাহিনী। দলটো ভাৰতৰ সন্মুখত মাত্ৰ ১৭৬ৰাণৰ লক্ষ্যহে নিৰ্দ্ধাৰণ কৰি দিবলৈ সক্ষম হয়।
ভাৰতৰ হৈ চাহালে অকলেই ৪৯ৰাণত ৪টা উইকেট দখল কৰে। সুন্দৰে লাভ কৰে ৩টা উইকেট। প্ৰসিদ্ধ কৃষ্ণাই দুটা আৰু মহম্মদ ছিৰাজে এটা উইকেট লাভ কৰে।
প্ৰত্যুত্তৰত ঈশান কিষানৰ সৈতে অ’পেনাৰ হিচাপে নামি অধিনায়ক ৰোহিতে ৬০ৰাণৰ দৰ্শনীয় ইনিংছেৰে দলৰ ভেটি মজবুত কৰি থৈ যায়। অ’পেনাৰ হিচাপে সুযোগ পোৱা ঈশানে ২৮ৰাণ কৰে।
ইপিনে, পুনৰ ব্যৰ্থ হয় বিৰাট কোহলি। ৰাণ কৰাত যেন সমস্যাৰ সন্মুখীন হৈছে বিৰাট। অনাহক হুক শ্বট খেলি কেচ দি মাত্ৰ ৭ ৰাণত বিদায় লয় প্ৰাক্তন অধিনায়ক কোহলি। খেলখনত ঋষভ পন্টো ব্যৰ্থ হয়। ঋষভে মাত্ৰ ১১ৰাণ কৰে।ঋষভৰ আউটৰ পিছত দলক বিজয়ৰ পথলৈ আগবঢ়াই নিয়ে সূৰ্যকুমাৰ যাদব (৩৪) আৰু দীপক হুডা (২৬)ই।
লগতে পঢ়ক: শিৱসাগৰ জতকীয়াৰ চাৰিআলি অ’এন জি চি-জিজিএছত নিশা ভয়ংকৰ অগ্নিকাণ্ড
আহমেদাবাদত খেলিবলগীয়া তিনিখন এদিনীয়াৰ প্ৰথমখনত বিজয় সাৱ্যস্ত কৰি টীম ইণ্ডিয়াই ১-০ৰ অগ্ৰগতি লাভ কৰিলে। ৰোহিতৰ অনুপস্থিতিত দক্ষিণ আফ্ৰিকাত ভাৰতে এদিনীয়া ছিৰিজ হাৰি অহাৰ পিছত এইবাৰ ৰোহিতৰ নেতৃত্বত টীম ইণ্ডিয়াই ৱেষ্ট ইণ্ডিজৰ বিৰুদ্ধে শূন্য সহনশীলতা প্ৰদৰ্শন কৰিব বুলিয়েই আশা কৰিছে টীম ইণ্ডিয়াৰ অনুৰাগীসকলে।
