আজি (সোমবাৰে) পুৱা ১১:৩০ বজাত বিৰোধী মিত্ৰজোঁট ইণ্ডিয়া ব্লকৰ প্ৰায় ৩০০ সাংসদে সংসদ ভৱনৰ পৰা নিৰ্বাচন আয়োগৰ কাৰ্যালয়লৈ পদযাত্ৰা কৰিব। বিজেপিৰ সুবিধাৰ বাবে ভোটাৰ তালিকাৰ জালিয়াতি আৰু বিভিন্ন প্ৰৱঞ্চনাৰ জৰিয়তে আয়োগে ‘ভোট চুৰি’ কৰি থকা বুলি অভিযোগ উত্থাপন হৈছে। লোকসভাৰ বিৰোধী দলপতি ৰাহুল গান্ধীয়ে নেতৃত্ব দিব এই পদযাত্ৰাৰ।
মূলতঃ নিৰ্বাচনমুখী বিহাৰত চলি থকা বিশেষ নিবিড় পুনৰীক্ষণ প্ৰক্ৰিয়াত (এছআইআৰ) ভোটাৰ তালিকা পুনৰীক্ষণৰ ক্ষেত্ৰত বিৰোধীৰ আপত্তিকে কেন্দ্ৰ কৰি এই প্ৰতিবাদ। ভোটাৰ তালিকাত ইচ্ছাকৃতভাৱে একাংশ লোকক ভোটাধিকাৰ বঞ্চিত কৰাৰ লগতে ভুৱা নাম সংযোজন কৰাৰ অভিযোগ উত্থাপন কৰিছে।
কংগ্ৰেছে দাবী কৰিছে যে ২০২৪ চনৰ লোকসভা নিৰ্বাচনকে ধৰি কেইবাটাও নিৰ্বাচনত বিজেপিয়ে এই ভোটাৰ তালিকাৰ জালিয়াতিৰ জৰিয়তে জয়লাভ কৰিছে।
অৱশ্যে দিল্লী আৰক্ষীয়ে জনোৱা মতে, দেওবাৰলৈকে এই পদযাত্ৰাৰ বাবে ইণ্ডিয়া ব্লকৰ পৰা কোনো অনুমতিৰ আৱেদন লাভ কৰা নাই। সংসদ ভৱন আৰু নিৰ্বাচন আয়োগৰ মুখ্য কাৰ্যালয় ‘নিৰ্ৱাচন সদন’ৰ মাজৰ দূৰত্ব প্ৰায় দুই কিলোমিটাৰ। বিগত বৰ্ষৰ লোকসভা নিৰ্বাচনৰ পিছত সংসদৰ বাহিৰত বিৰোধীৰ এয়া প্ৰথম যৌথ কাৰ্যসূচী।
ৰাহুল গান্ধীয়ে টুইটাৰত লিখিছে, “ভোট চুৰি হৈছে ‘এজন ব্যক্তি, এজন ভোট’ৰ মৌলিক ধাৰণাটোৰ ওপৰত আক্ৰমণ। এটা নিকা আৰু নিৰপেক্ষ নিৰ্বাচনৰ বাবে সঠিক ভোটাৰ তালিকা অতি প্ৰয়োজনীয়। আমাৰ দাবী স্পষ্ট – নিৰ্বাচন আয়োগে স্বচ্ছভাৱে ডিজিটেল ভোটাৰ তালিকা প্ৰকাশ কৰিব লাগে, যাতে দল আৰু সাধাৰণ মানুহে ইয়াক পৰীক্ষা কৰিব পাৰে।”
ইতিমধ্যে কংগ্ৰেছে ‘ভোট চুৰি’ৰ বিৰুদ্ধে অনলাইন অভিযান আৰম্ভ কৰিছে, য’ত সাধাৰণ মানুহক নিৰ্দিষ্ট পৰ্টেল আৰু ফোন নম্বৰৰ জৰিয়তে যোগদান কৰিবলৈ আহ্বান জনোৱা হৈছে।
ইপিনে, কৰ্ণাটকৰ মুখ্য নিৰ্বাচনী বিষয়াই ৰাহুল গান্ধীলৈ পত্ৰ লিখি বিগত বৰ্ষৰ লোকসভা নিৰ্বাচনত এজন ভোটাৰে দুগুণ ভোটদান কৰাৰ অভিযোগৰ প্ৰমাণ দাখিল কৰিবলৈ অনুৰোধ জনাইছে। শেহতীয়াকৈ গান্ধীয়ে সংবাদমেলযোগে দাবী কৰিছিল যে বেংগালুৰু কেন্দ্ৰীয় মহাদেৱপুৰা সমষ্টিৰ ভোটাৰ শকুন ৰাণীয়ে দুবাৰকৈ ভোটদান কৰাৰ লগতে ভোটাৰ আইডি কাৰ্ডত ভোটগ্ৰহণ কেন্দ্ৰৰ কৰ্মচাৰীৰ পৰা টিক মাৰ্ক আছে।
ৰাহুল গান্ধীয়ে অভিযোগ কৰে যে সেই সমষ্টিটোত মুঠ ৬.৫ লাখ ভোটৰ ভিতৰত এক লাখতকৈ অধিক ভোট ভুৱা। কংগ্ৰেছৰ এক আভ্যন্তৰীণ সমীক্ষাত ১১,৯৬৫ জন দ্বৈত ভোটাৰ, ৪০,০০৯ জনৰ ভুৱা বা অবৈধ ঠিকনা, ১০,৪৫২ জন ‘বাল্ক ভোটাৰ’ একে ঠিকনাতে, ৪,১৩২ জন অবৈধ ফটো আৰু ৩৩,৬৯২ জন ভোটাৰে ফৰ্ম-৬ৰ অপব্যৱহাৰ কৰি নতুনকৈ নাম পঞ্জীয়ন কৰিছে।
সোমবাৰৰ এই পদযাত্ৰাক কেন্দ্ৰ কৰি ৰাজনৈতিক মহলত তীব্ৰ উত্তেজনাৰ সৃষ্টি হৈছে। বিজেপি আৰু আয়োগক পোনপটীয়াকৈ আক্ৰমণ কৰি বিৰোধীৰ বাৰ্তা হৈছে “এই যুঁজখন গণতন্ত্ৰক ৰক্ষা কৰা।”
