দীৰ্ঘদিন বিৰতিৰ অন্তত ৬ জুনত দেশৰ বিৰোধী মিত্ৰজোঁট ইণ্ডিয়া বৈঠকত মিলিত হ’ব। সূত্ৰই জনাইছে যে দেশৰ সাম্প্ৰতিক ৰাজনৈতিক পৰিস্থিতি আৰু বিৰোধী ৰাজনীতিৰ ভৱিষ্যত ৰূপৰেখা এই বৈঠকত আলোচনাৰ মূল বিষয় হ’ব।
বিৰোধী শিবিৰৰ এটা অংশৰ মতে, পাৰস্পৰিক সমন্বয়ৰ অভাৱৰ সুযোগ লৈ বিজেপি ক্ৰমান্বয়ে ৰাজনৈতিকভাৱে শক্তিশালী হৈ উঠিছে। ইয়াৰ সমান্তৰালকৈ বিভিন্ন ৰাজ্যত আঞ্চলিক দলৰ প্রভাৱও শেহতীয়াকৈ ক্ষীণ হৈ পৰা বুলি ধাৰণা কৰা হৈছে৷ এনে পৰিপ্ৰেক্ষিতত বিৰোধী দলসমূহৰ মাজত ঐক্য আৰু অধিক শক্তিশালী কৰাৰ বিষয়টোৱে বৈঠকত গুৰুত্ব লাভ কৰিব পাৰে।
সূত্ৰসমূহে দাবী কৰিছে যে এই বৈঠকত ৰাজ্যসমূহত নিৰ্বাচনৰ পূৰ্বে বিশেষ নিবিড় পুনৰীক্ষণ (SIR) সম্পৰ্কেও আলোচনা হ’ব পাৰে। শেহতীয়াকৈ পশ্চিমবংগ বিধানসভাৰ নিৰ্বাচনৰ ফলাফল ঘোষণা হোৱাৰ পিছতে কংগ্ৰেছ নেতা ৰাহুল গান্ধীয়ে নিৰ্বাচনী প্ৰক্ৰিয়াক লৈ প্ৰশ্ন উত্থাপন কৰে।
নিৰ্বাচন অনুষ্ঠিত কৰাৰ পদ্ধতিৰ প্ৰতি দেশবাসীয়ে সাৱধান হ’ব লাগে বুলি তেওঁ দাবী কৰে। একে সময়তে পশ্চিম বংগৰ নিৰ্বাচনত বিজেপিয়ে ‘ভোট চুৰি’ কৰা বুলিও উল্লেখ কৰে।
তেতিয়াৰ পৰাই বিৰোধী দলসমূহৰ বৈঠকৰ বাবে মমতাই নিজেই উদ্যোগ লৈ আহিছে। বিধানসভা নিৰ্বাচনত পৰাজিত হোৱাৰ পিছত ২০২৯ চনত লোকসভা নিৰ্বাচনত প্ৰতিদ্বন্দ্বিতা কৰাৰ বাৰ্তা দিছে।
ইণ্ডিয়া মিত্ৰজোঁটৰ কাষত থিয় দিয়াৰ বাৰ্তাও দিছে, যদিও তৃণমূল কংগ্ৰেছে বিগত সময়ত কেইবাটাও বিষয়ত স্বতন্ত্ৰ স্থিতি গ্ৰহণ কৰিছিল। ইয়াৰ সমান্তৰালকৈ ৰাহুল গান্ধীয়েও শেহতীয়াকৈ কৈছে যে বিৰোধী দলসমূহে নিজৰ মতানৈক্য পাহৰি গণতন্ত্ৰ ৰক্ষাৰ বাবে একেলগে কাম কৰাটো প্ৰয়োজনীয়।
আগন্তুক বৈঠকত ডি এম কেৰ ভূমিকা বিশেষভাৱে দৃষ্টি আকৰ্ষণকাৰী হ’ব পাৰে। ইণ্ডিয়া মিত্ৰজোঁটৰ অন্যতম গুৰুত্বপূৰ্ণ অংশীদাৰ যদিও শেহতীয়াকৈ তামিলনাডুৰ কংগ্ৰেছে ডি এম কেৰ সৈতে সম্পৰ্ক বিচ্ছিন্ন কৰি অভিনেতা বিজয়ৰ দল টিভিকেৰ সৈতে ৰাজনৈতিক আপোচৰ পথত আগবাঢ়িছে।
সৰ্বভাৰতীয় সংবাদ মাধ্যমৰ সূত্ৰ অনুসৰি অহা ৬ জুনত মমতাই নিজেও এই বৈঠকত উপস্থিত থাকিব পাৰে। জানিব পৰা গৈছে যে শেহতীয়াকৈ তৃণমূল নেত্ৰীগৰাকীয়ে ৰাহুল গান্ধীৰ সৈতে ফোনত দীঘলীয়া বাৰ্তালাপ কৰিছিল।
