অৰুণাচল প্ৰদেশৰ টাৱাং সীমান্তৰ প্ৰায় ৫ কিলোমিটাৰ ভাৰতীয় ভূখণ্ডলৈ সোমাই অহাৰ পিছতে চীনা-সেনাৰ সৈতে ভাৰতীয় সেনাৰ সংঘৰ্ষ হৈছিল।
অৰুণাচল প্ৰদেশৰ সীমান্তৰ প্ৰকৃত নিয়ন্ত্ৰণ ৰেখাৰ ভাৰতীয় ভূখণ্ডৰ নিকট অঞ্চলত চীনৰ প্ৰায় ২০০ সেনা জোৱান আহি উপস্থিত হয়।
ভাৰতীয় সেনাই চীনৰ সেনা দলক সীমান্ত অতিক্ৰম কৰি ভাৰতৰ ভূমিত প্ৰৱেশ কৰাত বাধা দিয়ে। অৱশ্যে দুয়োখন দেশৰ সেনাৰ মাজত সংঘৰ্ষ নহৈ আলোচনাৰে বিবাদ নিষ্পত্তি কৰা বুলি কোৱা হৈছে।
উল্লেখ্য যে ইয়াৰ পূৰ্বে যোৱা বছৰ পূব লাডাখত ভাৰত-চীন সেনা সীমান্ত বিবাদত জড়িত হৈ পৰিছিল। সেই সংঘৰ্ষত ভাৰতৰ ২০ সেনাজোৱান শ্বহীদ হোৱাৰ বিপৰীতে চীনৰো প্ৰায় ৪০জন সেনা হতাহত হোৱাৰ খৱৰ পোৱা গৈছিল।
যোৱা ৩০ আগষ্টত চীনৰ সেনাই পুনৰ উত্তৰাখণ্ডৰ সীমান্ত অতিক্ৰম কৰি ভাৰতীয় ভূখণ্ডত প্ৰৱেশ কৰা বুলি জানিব পৰা গৈছিল। ভাৰতীয় সেনা উপস্থিতি হোৱাৰ পূৰ্বে অৱশ্যে তেওঁলোক তাৰপৰা আঁতৰি গৈছিল।
এনে ঘটনাৰ প্ৰতিক্ৰিয়াৰ মাজতে কাইলৈ অৰ্থাৎ দেওবাৰে পুনৰ ভাৰত আৰু চীনৰ সামৰিক বিষয়াৰ মাজত সীমান্তৰ চুচুলত অনুষ্ঠিত হ’ব সীমা বিবাদ সম্পৰ্কীয় আলোচনা। ইতিমধ্যে ভাৰত আৰু চীনৰ মাজত দ্বাদশ লানি আলোচনা অনুষ্ঠিত হৈ গৈছে। কিন্তু এনে আলোচনাসমূহ মুঠেও ফলপ্ৰসূ হৈ উঠা নাই।
চীন আৰু ভাৰতৰ মাজত ইতিমধ্যে বহু লানি আলোচনা হোৱাৰ পিছতো লডাখৰ পৰা সম্পূৰ্ণ ৰূপে আঁতৰি যোৱা নাই চীনৰ সেনা।
৯ এপ্ৰিলত ভাৰত আৰু চীনৰ মাজত একাদশ লানি আলোচনা অনুষ্ঠিত হৈছিল।
কাইলৈৰ আলোচনাত মূলতঃ ডেপচাং আৰু ডোগ্ৰাৰ পৰা চীনৰ সেনা আঁতৰ কৰাৰ বিষয়ত ভাৰতে চীনৰ ওপৰত হেঁচা প্ৰয়োগ কৰিব বুলি জানিব পৰা গৈছে।
কিছুদিন পূৰ্বে মলডো অঞ্চলত অনুষ্ঠিত আলোচনাত চীন-ভাৰত দুয়োখন দেশে দোপচাঙৰ লগতে লাডাখৰ অন্যান্য প্ৰান্তৰ পৰা সেনা অপসাৰণ কৰিব বুলি সহমত ব্যক্ত কৰিছিল যদিও আজিলৈকে চীনে লাডাখৰ পৰা বায়ু সেনা বাহিনীক অপসাৰণ কৰা নাই।
ফলত নিৰাপত্তাৰ খাতিৰত ভাৰতেও লাডাখৰ পৰা দেশ খনৰ বায়ু সেনা বাহিনী অপসাৰৰণ কৰিব পৰা নাই।
শেহতীয়া আলোচনাত দুয়ো খন দেশৰ সেনাৰ শীৰ্ষ বিষয়াই অংশগ্ৰহণ কৰিছিল। আলোচনাত পাংগং হ্ৰদৰ উত্তৰ আৰু দক্ষিণ দিশৰ পৰা সেনা অপসাৰণৰ বিষয়টো খৰচি মাৰি আলোচনা কৰা হৈছিল।
বিশেষকৈ ডেপচাং উপত্যকা আৰু গোগ্ৰা হটস্প্ৰীং অঞ্চলত থকা চীনা সেনা আঁতৰাই নিয়াৰ বাবে ভাৰতে চীনক হেঁচা দিছিল আৰু চীনে সেয়া মানিও লৈছিল।
সেই সময়ত অনুষ্ঠিত আলোচনাত ভাৰতৰ পক্ষৰ হৈ উপস্থিত আছিল ভাৰতীয় সেনাৰ ১৪ কৰ্পৰ কমাণ্ডাৰ লেফটেণ্ট জেনেৰেল পিজিকে মেনন আৰু চীনৰ হৈ উপস্থিত আছিল দক্ষিণ জিনজিয়াং অঞ্চলৰ সামৰিক কমাণ্ডাৰ লিউ লিন।
ভাৰতৰ বৈদেশিক পৰিক্ৰমা দপ্তৰৰ যুটী সচিব নবীন শ্ৰীবাস্তৱো আলোচনাত উপস্থিত থকা বুলি ভাৰত চৰকাৰৰ এগৰাকী মুখপাত্ৰই প্ৰকাশ কৰিছিল।
