বাংলাদেশত সংখ্যালঘু হিন্দুৰ ওপৰত হোৱা নিৰ্যাতনৰ প্ৰতিবাদ কৰিবলৈ গৈ ত্ৰিপুৰাত বাংলাদেশৰ দূতাবাসত আক্ৰমণ! সোমবাৰে আগৰতলাত ত্ৰিপুৰেশ্বৰী সনাতন মন্ত্ৰ আৰু হিন্দু সংঘৰ্ষ সমিতি নামৰ দুটা হিন্দুত্ববাদী সংগঠনে বাংলাদেশৰ বিষয়টোক লৈ ব্যাপক প্ৰতিবাদ সাব্যস্ত কৰে। অভিযোগ অনুসৰি প্ৰতিবাদৰ সময়ত আগৰতলাত থকা বাংলাদেশৰ দূতাবাসত আক্ৰমণ কৰা হয়।
সোমবাৰে পুৱা ত্ৰিপুৰেশ্বৰী সনাতন মন্ত্ৰ আৰু হিন্দু সংঘৰ্ষ সমিতি নামৰ দুটা সংগঠনে দীৰ্ঘসময় ধৰি বাংলাদেশৰ সহকাৰী উচ্চায়ুক্তৰ কাৰ্যালয় ঘেৰাও কৰে। সুদীৰ্ঘ সময় ধৰি এই অৱৰোধ চলিছিল। অৱশেষত আৰক্ষীয়ে গৈ অৱৰোধ মুকলি কৰে। অভিযোগ অনুসৰি তাত বাংলাদেশৰ পতাকা জ্বলাই দিয়া হৈছিল।
দৰাচলতে বাংলাদেশত ভাৰতীয় বাছত আক্ৰমণ কৰাৰ পিছতে সমগ্ৰ ত্ৰিপুৰাত এই ক্ষোভ বিয়পি পৰে। ৰাজ্যখনৰ ব্যক্তিগত চিকিৎসালয়সমূহে বাংলাদেশীক চিকিৎসা নকৰাৰ সিদ্ধান্ত লৈছে। একেদৰে হোটেলসমূহেও কোনো বাংলাদেশীক আশ্ৰয় নিদিয়ে বুলি কৈছে। মুখ্যমন্ত্রী ড০ মাণিক সাহাই কয় যে পৰিস্থিতি নিৰীক্ষণ কৰা হৈছে৷ কেন্দ্ৰীয় চৰকাৰৰ নিৰ্দেশ অনুসৰি প্ৰয়োজনীয় পদক্ষেপ গ্ৰহণ কৰা হ’ব।
দূতাবাসৰ ওপৰত কৰা এই আক্ৰমণক তীব্ৰ গৰিহণা দিয়ে ঢাকাই। বাংলাদেশৰ তৰফৰ পৰা এক বিবৃতিত কোৱা হৈছে, ‘’আগৰতলাত বাংলাদেশৰ সহকাৰী উচ্চায়ুক্ত চৌহদত হিন্দু সংঘৰ্ষ সমিতিৰ এক বৃহৎ প্ৰতিবাদকাৰীৰ দলে কৰা হিংসাত্মক প্ৰতিবাদ আৰু আক্ৰমণত বাংলাদেশ চৰকাৰ গভীৰভাৱে ক্ষুব্ধ। পৰিস্থিতিৰ পৰিৱৰ্তনে প্ৰমাণ কৰে যে প্ৰতিবাদকাৰীসকলক বাংলাদেশ সহকাৰী উচ্চায়ুক্তৰ মূল গেট ভাঙি চৌহদ আক্ৰমণ কৰিবলৈ পদ্ধতিগতভাৱে অনুমতি দিয়া হৈছিল। চৌহদত পহৰা দিয়াৰ দায়িত্বত থকা স্থানীয় আৰক্ষী জোৱানসকল আৰম্ভণিৰে পৰা নিষ্ক্ৰিয় হৈ আছিল।”
নতুন দিল্লীয়েও এই ঘটনাক গৰিহণা দিয়ে। দিল্লীৰ বিবৃতিত কোৱা হৈছে যে ‘কূটনৈতিক আৰু কনছুলাৰ বিষয়ক সম্পত্তি কোনো কাৰণতে লক্ষ্য কৰি লোৱা উচিত নহয়।‘ বিবৃতিটোত এই স্পষ্ট বাৰ্তা দিয়া হৈছে। দিল্লীত থকা বাংলাদেশ উচ্চায়ুক্তৰ কাৰ্যালয় আৰু দেশৰ বিভিন্ন প্ৰান্তত অৱস্থিত বাংলাদেশৰ সহকাৰী উচ্চায়ুক্তৰ কাৰ্যালয়ত নিৰাপত্তা বৃদ্ধি কৰা হৈছে।
