নিউজিলেণ্ডৰ বিৰুদ্ধে ঘৰৰ মাটিত টেষ্ট ছিৰিজত শোচনীয় পৰাজয়ৰ পিছত দক্ষিণ আফ্ৰিকাত টি-২০ ছিৰিজত ভাৰতে একপ্ৰকাৰ দমনীয় প্ৰদৰ্শন আগবঢ়ালে। সূৰ্য কুমাৰ যাদৱৰ নেতৃত্বত টিম ইণ্ডিয়াৰ যথাৰ্থতে সূৰ্যোদয় ঘটিছে।
শুকুৰবাৰে নিশা দক্ষিণ আফ্ৰিকাৰ বিৰুদ্ধে চতুৰ্থ টি-২০ত ভাৰতে সহজেই জয়লাভ কৰে। জয় যে সহজেই আহিব সেয়া প্ৰথম ইনিংছৰ পিছত মোটামুটি নিশ্চিত হৈছিল। ৱাণ্ডাৰ্ছত প্ৰথমে টিম ইণ্ডিয়াই ২৮৩ ৰান সংগ্ৰহ কৰে। যিটো টি-২০ত ভাৰতৰ দ্বিতীয় সৰ্বাধিক ৰান।
এই বিশাল ৰানৰ বোজাৰ সৈতে দক্ষিণ আফ্ৰিকাই কিমান দূৰ যুঁজিব পাৰিব সেয়াহে লক্ষ্যণীয় আছিল। শেষত তেওঁলোকে ১৪৮ ৰানত স্তব্ধ হৈ পৰে। চতুৰ্থ টি-২০ত ভাৰতে ১৩৫ ৰানত জয়লাভ কৰে। লগতে সূৰ্যকুমাৰ বাহিনীয়ে ৩-১ ব্যৱধানত শৃংখলাটো জয় কৰে।
লগতে পঢ়কঃ ক্ষমতাত মত্ত আৰক্ষী বিষয়াৰ কাণ্ড! নিৰ্মমভাৱে ছাত্ৰক প্ৰহাৰ কৰি নিলম্বিত ভাৰ্গৱ বৰবৰা
টছত জয়ী হৈ সূৰ্য্যই প্ৰথমে বেটিং কৰাৰ সিদ্ধান্ত লয়। সৰু খেলপথাৰ, অনায়াসে বেটলৈ বল আহিছিল। অৰ্থাৎ বেটছমেনৰ স্বৰ্গ। আৰু তাতেই তিলক-সঞ্জুই অতি বিস্ফোৰক বেটিং কৰিলে। ইতিমধ্যে ভাৰতে ২-১ ব্যৱধানত শৃংখলাত আগবাঢ়ি আছিল। ফলত শৃংখলা হেৰুৱাৰ কোনো চাপ নাছিল। ইয়াৰ বিপৰীতে ভাৰতীয় বেটছমেনে প্ৰটিয়াছ বলাৰক দিশহাৰা কৰে।
আৰম্ভ কৰিছিল অভিষেক শৰ্মাই। ১৮টা বলত ৩৬ ৰান সংগ্ৰহ কৰি আউট হৈ আহিছিল যদিও ধুমুহাৰ আগজাননী দিয়া হৈ গৈছিল। ই যে মাৰাত্মক ঘূৰ্ণীবতাহলৈ পৰিণত হ’ব সেয়া তেতিয়াও অনুভৱ হোৱা নাছিল। তিলক-সঞ্জুৱে তেনেকুৱাই কৰিলে। বাংলাদেশৰ বিৰুদ্ধে শৃংখলাৰ অন্তিমখন খেলত সঞ্জুৱে শতক অৰ্জন কৰিছিল। এই ছিৰিজৰ প্ৰথমখন মেচতো শতক অৰ্জন কৰিছিল। লগতে তেওঁ শতকৰে ছিৰিজটো সমাপ্ত কৰিলে। তেওঁ ৫৬টা বলত ১০৯ ৰান সংগ্ৰহ কৰে। তেওঁৰ ইনিংছটোত আছিল ৬টা চাৰি, ৯টা ছয়।
লগতে পঢ়কঃ ৰঞ্জী ট্ৰফীৰ এটা ইনিংছত ১০ উইকেট দখলেৰে অভিলেখ গঢ়িলে হাৰিয়ানাৰ যুৱ পেচাৰ অংশুলে
আনহাতে, পূর্বৰ মেচত শতক অর্জন কৰাৰ পাছত পুনৰ শতক অর্জন কৰে তিলক ভার্মাই৷ দুয়োৰে ভিতৰত তেওঁ আছিল অধিক আক্ৰমণাত্মক। তেওঁ মাত্ৰ ৪৭টা বলত ১২০ ৰান সংগ্ৰহ কৰে। ৯টা চাৰি আৰু ১০টা ছয় মাৰে। এসময়ত এনে লাগিছিল যে ভাৰতীয়ৰ ভিতৰত তেওঁ সৰ্বাধিক দ্ৰুত শতক অৰ্জনৰ অভিলেখ কৰিব। অৱশ্যে সেয়া নহ’ল। কিন্তু তেওঁ সঞ্জুৰ সৈতে অংশীদাৰিত্বৰে ২১০ ৰান সংগ্ৰহ কৰে। যি এক ৰেকৰ্ড। শেষত ভাৰতৰ ইনিংছ ২৮৩ ৰানত শেষ হৈ পৰে।
প্ৰত্যুত্তৰত অৰ্শদীপ সিঙৰ দুৰ্দান্ত ছুইংয়ে দক্ষিণ আফ্ৰিকাক আৰম্ভণিৰে পৰাই চাপত পেলাইছিল। বলিং কৰি থাকোঁতে সঞ্জু-তিলকৰ শক্তিৰ সন্মুখত তেওঁলোকক অসহায় যেন লাগিছিল। বেটিঙৰ সময়তো একেখন ছবিয়েই ধৰা পৰিছিল। প্ৰথম অভাৰত অৰ্শদীপে ৰেজা হেণ্ড্ৰিক্সক বোল্ড কৰে। দ্বিতীয় অভাৰত হাৰ্ডিকৰ বলত উভতি যায় ৰিয়ান ৰিকেলটন। অধিনায়ক আইডেন মাৰ্কৰাম ৮ ৰানত আউট হয়। ইয়াৰ পিছত অৰ্শদীপে হেনৰিক ক্লাচেনক ঘূৰাই পঠিয়ায়। শেষত হেট্ৰিক নহ’লেও প্ৰটিয়াছৰ বেটিঙৰ মেৰুদণ্ড তাতেই ভাঙি গ’ল।
লগতে পঢ়কঃবিপদত তামিলনাডুৰ লটাৰী সম্রাট : ৰাজনৈতিক দলক সৰ্বাধিক চান্দা দিয়া মাৰ্টিনৰ ঘৰত ইডি
অৱশ্যে ট্ৰিষ্টান ষ্টাবছ আৰু ডেভিদ মিলাৰে মিলি এই পৰাজয় ৰোধৰ চেষ্টা কৰে। কিন্তু তেতিয়ালৈকে মেচখন প্ৰায় হাতৰ পৰা ওলাই গৈছিল। ইপিনে, ৰবি বিষ্ণোই আৰু বৰুণ চক্ৰৱৰ্তীৰ স্পিন মেজিকত তেওঁলোক ঘূৰি অহাৰ পিছত ভাৰতৰ মেচ জয় আছিল মাথোঁ সময়ৰ অপেক্ষা। শেষত দক্ষিণ আফ্ৰিকাৰ ইনিংছ ১৪৮ ৰানত স্তব্ধ হৈ পৰে। ১৩৫ ৰানত জয়লাভ কৰাৰ উপৰিও ভাৰতে এই শৃংখলাত ৩-১ ব্যৱধানত জয়লাভ কৰে।
