ৰাষ্ট্ৰীয় স্বয়ংসেৱক সংঘ (RSS)-ৰ মুৰব্বী মোহন ভাগৱতে গুৱাহাটীত এক বিশেষ মন্তব্য প্ৰকাশ কৰিছে। তেওঁ স্পষ্ট কৰিছে যে ভাৰতক আনুষ্ঠানিকভাৱে ‘হিন্দু ৰাষ্ট্ৰ’ হিচাপে ঘোষণা কৰাৰ কোনো প্ৰয়োজন নাই, কিয়নো ইয়াৰ সভ্যতাকেন্দ্ৰিক প্ৰকৃতিয়ে ইতিমধ্যে এই সত্য প্ৰতিফলিত কৰিছে।
“ভাৰত আৰু হিন্দু সমাৰ্থক। যিজন ব্যক্তিয়ে ভাৰতক লৈ গৌৰৱ অনুভৱ কৰে তেওঁ হৈছে হিন্দু,” বুলি মন্তব্য কৰে ভাগৱতে।
বিশিষ্ট ব্যক্তিসকলৰ সৈতে হোৱা মত বিনিময়ৰ সময়ত তেওঁ ‘হিন্দু’ শব্দটোক কেৱল এক ধৰ্মীয় পৰিচয় হিচাপে নহয়, বৰঞ্চ হাজাৰ হাজাৰ বছৰৰ সাংস্কৃতিক ধাৰাবাহিকতাৰ শিপাই থকা এক সভ্যতাৰ পৰিচয় হিচাপে ব্যাখ্যা কৰে।
ভাগৱতে দৃঢ়তাৰে কয় যে আৰ এছ এছৰ মূল লক্ষ্য হৈছে চৰিত্ৰ গঠনত মনোনিৱেশ কৰি ভাৰতক বিশ্বৰ নেতা হিচাপে গঢ়ি তোলাত অৰিহণা যোগোৱা। তেওঁ কয়, “বৈচিত্ৰ্যৰ মাজত ভাৰতক একত্ৰিত কৰাৰ পদ্ধতিক আৰ এছ এছ বুলি কোৱা হয়।” তেওঁ লগতে স্পষ্ট কৰে যে সংঘ কাৰো বিৰোধিতা বা ক্ষতি কৰিবলৈ সৃষ্টি হোৱা নাই।
তেওঁ অসমৰ “জনগাঁথনিগত পৰিৱৰ্তন”ৰ উদ্বেগৰ বিষয়ে কয় আৰু সকলোকে নিজৰ মাটি তথা পৰিচয় ধৰি ৰাখিবলৈ আহ্বান জনায়। ইয়াৰ লগতে, অবৈধ অনুপ্ৰৱেশ, আৰু সুষম জনসংখ্যা নীতিৰ প্ৰয়োজনীয়তাৰ ওপৰত আলোকপাত কৰে। হিন্দুসকলৰ বাবে তিনিটা সন্তানৰ নিয়ম আৰু বিভাজনকাৰী ধৰ্মান্তৰকৰণৰ বিৰোধিতা কৰাৰ গুৰুত্বকো তেওঁ উল্লেখ কৰে।
RSS মুৰব্বীগৰাকীয়ে বিশেষকৈ যুৱক-যুৱতীসকলৰ মাজত ছ’চিয়েল মিডিয়াৰ দায়িত্বশীল ব্যৱহাৰৰ পোষকতা কৰে।
উত্তৰ-পূৰ্বাঞ্চলক বৈচিত্ৰ্যৰ ক্ষেত্ৰত ভাৰতৰ ঐক্যৰ এক উজ্জ্বল উদাহৰণ বুলি অভিহিত কৰি তেওঁ লাচিত বৰফুকন আৰু শ্ৰীমন্ত শংকৰদেৱৰ দৰে ব্যক্তিৰ ৰাষ্ট্ৰীয় গুৰুত্বৰ বিষয়ে কয়, যিসকলে সকলো ভাৰতীয়কে অনুপ্ৰাণিত কৰে। তেওঁ সমাজৰ সকলো শ্ৰেণীকে নিস্বাৰ্থভাৱে জাতি নিৰ্মাণৰ বাবে কাম কৰিবলৈ আহ্বান জনায়।
সোমবাৰে তিনিদিনীয়া ভ্ৰমণসূচীৰে অসমত উপস্থিত হোৱা মোহন ভাগৱতে আজি, বুধবাৰে, যুৱ সভাত ভাষণ দিয়াৰ কথা আছে। ইয়াৰ পাছতে ২০ নৱেম্বৰত তেওঁ মণিপুৰলৈ ৰাওনা হ’ব।
