মহাকাশ গৱেষণাৰ ক্ষেত্ৰত এঢাপ আগুৱাই ভাৰতে উত্তৰাখণ্ডৰ দেৱাস্থলত প্ৰথমবাৰৰ বাবে ‘লিকুইড মিৰ’ৰ টেলিস্কোপ’ স্থাপন কৰিছে। এছিয়াৰ সৰ্ববৃহৎ আন্তৰ্জাতিক লিকুইড মিৰ’ৰ টেলিস্কোপটো ২৪৫০ মিটাৰ উচ্চতাত স্থাপন কৰা হৈছে।
আৰ্যভট্ট গৱেষণা পৰ্যৱেক্ষণ বিজ্ঞান প্ৰতিষ্ঠানৰ (এআৰআইএছ) অধীনত এই টেলিস্কোপ স্থাপন কৰা হৈছে৷
এয়াই হৈছে বিশ্বৰ প্ৰথম তৰল-দাপোন টেলিস্কোপ। দূৰবীণটো পৃথিৱীৰ কাষত থকা ছায়াপথ আৰু অন্যান্য জ্যোতিৰ্বৈজ্ঞানিক উপাদানবোৰ পৰ্যবেক্ষণ কৰিবলৈ ব্যৱহাৰ কৰা হ’ব।
পেৰাবোলইড আকৃতিৰ প্ৰতিফলিত পৃষ্ঠই টেলিস্কোপটোত আইনা হিচাপে কাম কৰিব। ৪ মিটাৰ ডায়েমিটাৰৰ এই পৃষ্ঠটোৱে পোহৰ কেন্দ্ৰীভূত কৰি মহাকাশৰ গৱেষণাত সহায় কৰিব৷
বেলজিয়াম, কানাডা, পোলেণ্ড আৰু উজবেকিস্তানৰ সহযোগত ভাৰতে স্থাপন কৰা লিকুইড মিৰ’ৰ টেলিস্কোপটো বেলজিয়ামৰ এডভান্সড মেকানিকেল এণ্ড অপ্টিকেল চিষ্টেমচ কৰ্পোৰেচনৰ উদ্যোগত নিৰ্মাণ কৰা হৈছিল।
ই হিমালয়ৰ ২৪৫০ মিটাৰ উচ্চতাত স্থাপন কৰা এই টেলিস্কোপে ভাৰতৰ লগতে বিদেশৰ মহাকাশ বিজ্ঞানীসকলকো মহাকাশ গৱেষণাৰ ক্ষেত্ৰত বিশেষ ভাবে সহায় কৰিব পাৰিব বুলি আশা কৰা হৈছে।
