বছৰৰ শেষত দেশবাসীৰ বাবে এটা সুখবৰ। জাপানক পিছ পেলাই ভাৰতে এতিয়া বিশ্বৰ চতুৰ্থ বৃহত্তম অৰ্থনীতি হিচাপে স্বীকৃতি লাভ কৰিছে। কেন্দ্ৰীয় চৰকাৰৰ সূত্ৰ অনুসৰি বৰ্তমান ভাৰতীয় অৰ্থনীতিৰ মুঠ মূল্য ৪.১৮ ট্ৰিলিয়ন মাৰ্কিন ডলাৰত উপনীত হৈছে আৰু এই তালিকাত ভাৰতৰ আগত কেৱল আমেৰিকা যুক্তৰাষ্ট্ৰ, চীন আৰু জাৰ্মানীহে আছে।
বিত্ত মন্ত্ৰালয়ৰ এক বিবৃতিত দাবী কৰা হৈছে যে ভাৰত বৰ্তমান বিশ্বৰ দ্ৰুততম গতিৰে আগবঢ়া বৃহৎ অৰ্থনীতি আৰু যি হাৰত এই বিকাশ অব্যাহত আছে সেই অনুসৰি ২০৩০ চনৰ ভিতৰত ভাৰতৰ অৰ্থনীতিৰ মূল্য ৭.৩ ট্ৰিলিয়ন ডলাৰ হ’বগৈ।
২০২২ চনত ভাৰতৰ জিডিপি আছিল ৩.৫ ট্ৰিলিয়ন মাৰ্কিন ডলাৰ যিটো ইতিমধ্যে প্ৰায় দুগুণলৈ বৃদ্ধি পাইছে আৰু এই দশকৰ শেষৰ ফালে ই জাৰ্মানীকো অতিক্ৰম কৰি বিশ্বৰ তৃতীয় বৃহত্তম অৰ্থনীতিৰ মৰ্যাদা দখল কৰিব বুলি আশা কৰা হৈছে।
প্ৰথম অৱস্থাত মোদী চৰকাৰে ২০২৭ চনৰ ভিতৰত ভাৰতক ৫ ট্ৰিলিয়ন ডলাৰৰ অৰ্থনীতি হিচাপে গঢ়ি তোলাৰ লক্ষ্য নিৰ্ধাৰণ কৰিছিল আৰু বেঙ্কিং বিনিয়োগ সংস্থা জেফ্ৰিছৰ প্ৰতিবেদন অনুসৰি ভাৰতে নিৰ্ধাৰিত সময়ৰ ভিতৰতে এই লক্ষ্যত উপনীত হ’বলৈ সক্ষম হ’ব।
কেন্দ্ৰীয় চৰকাৰে ২০২৯ চনৰ লোকসভা নিৰ্বাচনৰ পূৰ্বেই ভাৰতক তৃতীয় স্থানলৈ উন্নীত কৰাৰ যি পৰিকল্পনা কৰিছে সেয়া বাস্তৱায়িত হ’লে নিৰ্বাচনৰ ক্ষেত্ৰত গেৰুৱা শিবিৰে এক ডাঙৰ সুবিধা লাভ কৰিব পাৰে।
আনহাতে বিৰোধী দলসমূহৰ মতে কেৱল চৰকাৰে নিজৰ এজেণ্ডা পূৰণত ব্যস্ত থকাৰ অভিযোগ উত্থাপন কৰি আহিছে আৰু এই বিকাশৰ আঁৰত কেৱল কেইজনমান উদ্যোগপতিৰহে লাভ হোৱা বুলি দাবী কৰিছে তথাপিও এনে চমকপ্ৰদ আৰ্থিক বৃদ্ধিয়ে চৰকাৰক বিৰোধীৰ সমালোচনাৰ উচিত প্ৰত্যুত্তৰ দিয়াৰ এক শক্তিশালী অস্ত্ৰ প্ৰদান কৰিছে।
