নিটি আয়োগৰ প্ৰতিবেদন : চীনৰ তুলনাত ৫ গুণ বেছি পঢ়াশালি আছে ভাৰতত
স্কুলীয়া শিক্ষাৰ ক্ষেত্ৰত চীনতকৈ আগবাঢ়ি আছে ভাৰতবৰ্ষ। স্কুলীয়া শিক্ষা সন্দৰ্ভত নিটি আয়োগৰ শেহতীয়া প্ৰতিবেদন অনুসৰি ভাৰতত এতিয়া চীনতকৈ পাঁচগুণ বেছি বিদ্যালয় আছে!
শেহতীয়া প্ৰকাশ পোৱা কেইবাটাও খবৰ অনুসৰি চীনত বৰ্তমান ইখনৰ পিছত সিখনকৈ আন্তঃৰাষ্ট্ৰীয় আৰু ব্যক্তিগত বিদ্যালয় বন্ধ হৈ আছে। আনহাতে বিভিন্ন বিদ্যালয় সমূহক একত্ৰিক কৰা হৈছে চীনত।
চীন চৰকাৰৰ কঠোৰ নিয়ম, মহামাৰীৰ পিছৰ অৰ্থনৈতিক মন্দাৱস্থা আৰু বিদেশী ছাত্ৰ-ছাত্ৰীৰ সংখ্যা হ্ৰাস পোৱাৰ বাবেই চীনৰ বিদ্যালয়সমূহ দুৰ্বল হৈ পৰিছে।
উল্লেখ্য যে, ২০২০ চনত চীনত প্ৰায় ১ লাখ ৮০ হাজাৰ ব্যক্তিগত শিক্ষানুষ্ঠান আছিল। চীনৰ মুঠ শিক্ষানুষ্ঠানৰ এক তৃতীয়াংশতকৈও অধিক ব্যক্তিগত প্ৰতিষ্ঠান। ৫ কোটি ৫৬ লাখ ছাত্ৰ-ছাত্ৰীয়ে সেই বছৰ ব্যক্তিগত বিদ্যালয়ত নামভৰ্তি কৰিছিল।
কিন্তু, কোভিড মহামাৰীৰ বাবে এই ছবিখন বহুত সলনি হৈছে। ইয়াৰ সমান্তৰালকৈ টাইৱানৰ সৈতে চীনৰ ভূ-ৰাজনৈতিক উত্তেজনাও ক্ৰমান্বয়ে মহামাৰীৰ পিছত বৃদ্ধি পাইছে। এই দুটা ঘটনাৰ বাবেই বৃহৎ সংখ্যক বিদেশী নাগৰিকে চীন এৰি গৈছে। ফলত তাত আন্তঃৰাষ্ট্ৰীয় বিদ্যালয়ত ছাত্ৰ-ছাত্ৰীৰ সংখ্যা ভয়ংকৰভাৱে হ্ৰাস পাইছে।
নিটি আয়োগৰ প্ৰতিবেদন অনুসৰি বিদ্যালয়ৰ সংখ্যাত চীনক অতিক্ৰম কৰাৰ পিছতো ভাৰতৰ বহু ৰাজ্যৰ বিদ্যালয়ত এতিয়াও ছাত্ৰ-ছাত্ৰীৰ অভাৱ। বহু ৰাজ্যত ৫০ শতাংশতকৈ অধিক প্ৰাথমিক বিদ্যালয়ত ৬০ জনতকৈও কম ছাত্ৰ-ছাত্ৰী আছে।
এই ক্ষেত্ৰত একাধিক শ্ৰেণীৰ পাঠদান, স্থানীয় লোকৰ সহযোগিতাৰ অভাৱ, আন্তঃগাঁথনিৰ অভাৱ, প্ৰধান শিক্ষক বা অধ্যক্ষৰ অভাৱ আদিয়ে মূল কাৰণ হিচাপে আত্মপ্ৰকাশ কৰিছে। ইয়াৰ উপৰিও শিক্ষকসকলে শিক্ষাদান বন্ধ কৰি বিভিন্ন সময়ত প্ৰশাসনিক কৰ্তব্য পালন কৰিবলগীয়া হোৱা কথাটোৱেও ভাৰতৰ স্কুলীয়া শিক্ষা দুৰ্বল কৰি তুলিছে।
এই সমস্যাৰ সমাধান হিচাপে নিটি আয়োগে বিদ্যালয়সমূহ একত্ৰিত কৰাৰ পৰামৰ্শ আগবঢ়াইছে। এইটোৱেই নামভৰ্তিৰ অভাৱৰ সমস্যাৰ অন্যতম ফলপ্ৰসূ সমাধান হ’ব পাৰে বুলি প্ৰতিবেদনত উল্লেখ কৰা হৈছে। ঝাৰখণ্ড, মধ্যপ্ৰদেশ আৰু ওড়িশা ৰাজ্য চৰকাৰ আৰু ভাৰত চৰকাৰে এই ৰাজ্যসমূহৰ সকলো শিশুৱে যাতে উচ্চমানৰ শিক্ষা লাভ কৰে তাৰ বাবে যৌথ উদ্যোগ লৈছে। প্ৰতিবেদনত ৰাজ্যসমূহক বৃহৎ আৰু সংহত দ্বাদশ শ্ৰেণীৰ বিদ্যালয় স্থাপনৰ পৰামৰ্শ দিয়া হৈছে।