হাৰাৰেত অনুষ্ঠিত হোৱা ১৯ বছৰ অনুৰ্ধ বিশ্বকাপ ২০২৬ৰ ফাইনেলত ভাৰতীয় দলে এক অভূতপূৰ্ব সফলতা অৰ্জন কৰিছে। শুকুৰবাৰে অনুষ্ঠিত হোৱা এই খেলখনত ইংলেণ্ডক ১০০ ৰানৰ বিশাল ব্যৱধানত পৰাস্ত কৰি ভাৰতে ষষ্ঠবাৰৰ বাবে বিশ্বকাপৰ ট্ৰফী নিজৰ দখললৈ আনে। আয়ুষ মাত্ৰেৰ নেতৃত্বত খেলা ভাৰতীয় দলটোৱে এই জয়ৰ জৰিয়তে এক নতুন বিশ্ব অভিলেখ গঢ়িবলৈ সক্ষম হয়। ১৯ বছৰ অনুৰ্ধ বিশ্বকাপৰ ইতিহাসত ফাইনেল খেলত ৰানৰ হিচাপত এয়া আটাইতকৈ ডাঙৰ জয় হিচাপে পৰিগণিত হৈছে।
এই ঐতিহাসিক জয়ৰ অন্যতম নায়ক আছিল মাত্ৰ ১৪ বছৰীয়া উদীয়মান তাৰকা বৈভৱ সূৰ্যবংশী। তেওঁ ইংলেণ্ডৰ বলাৰসকলক তচনচ কৰি মাত্ৰ ৮০ টা বলত ১৭৫ ৰানৰ এক বিধ্বংসী ইনিংছ উপহাৰ দিয়ে। বৈভৱৰ এই চমকপ্ৰদ বেটিঙৰ ওপৰত ভিত্তি কৰিয়েই ভাৰতে নিৰ্ধাৰিত ৫০ অভাৰত ৯ টা উইকেট হেৰুৱাই ৪১১ ৰানৰ এক বিশাল লক্ষ্য থিয় কৰায়। বৈভৱৰ এই ইনিংছটোৱে খেলখনৰ গতিপথ সম্পূৰ্ণৰূপে ভাৰতৰ ফালে ঢাল খুৱাই দিয়ে।
বিশাল লক্ষ্য অনুসৰণ কৰিবলৈ নামি ইংলেণ্ডৰ দলটোৱে যুঁজ দিছিল যদিও জয়ৰ পৰা বহু দূৰত ৰৈ যায়। ইংলেণ্ডৰ হৈ কেলেব ফেলকনাৰে সুন্দৰ প্ৰদৰ্শন কৰি ৬৭ টা বলত ১১৫ ৰান সংগ্ৰহ কৰে। তেওঁৰ এই দ্ৰুত ইনিংছটোৱে ইংলেণ্ডৰ আশা কিছু সময়ৰ বাবে জীয়াই ৰাখিছিল যদিও ভাৰতীয় বলাৰৰ নিয়ন্ত্ৰিত আক্ৰমণৰ সন্মুখত তেওঁলোক বেছি সময় টিকি থাকিব নোৱাৰিলে। শেষ পৰ্যায়ত ইংলেণ্ডৰ বেটিং লাইনআপ খহি পৰে আৰু ভাৰতে ১০০ ৰানৰ ব্যৱধানত এক স্মৰণীয় জয় সাব্যস্ত কৰে।
