আমেৰিকাৰ ৰাষ্ট্ৰপতি ড’নাল্ড ট্ৰাম্পে ৰাছিয়াৰ পৰা তেল ক্ৰয়ৰ বাবে দিয়া নতুন ভাবুকিৰ পিছত ভাৰতে তীব্ৰ প্ৰতিক্ৰিয়া প্ৰকাশ কৰিছে। বৈদেশিক পৰিক্ৰমা মন্ত্ৰালয়ে কয় যে ৰাছিয়াৰ পৰা তেল আমদানি কৰাটো ভুল নহয়, বৰঞ্চ দেশখনৰ অৰ্থনৈতিক অৱস্থা বজাই ৰাখিবলৈ এই সিদ্ধান্ত নিতান্তই প্ৰয়োজনীয়।
বৈদেশিক পৰিক্ৰমা মন্ত্ৰালয়ে জনোৱা মতে, ইউক্ৰেইন যুদ্ধ আৰম্ভ হোৱাৰ পিছত পশ্চিমীয়া দেশসমূহে বিশেষকৈ ইউৰোপীয় ইউনিয়নে ৰাছিয়াৰ পৰা বৃহৎ হাৰত সামগ্ৰী আৰু শক্তি আমদানি কৰি আহিছে। এনে পৰিস্থিতিত কেৱল ভাৰতক লক্ষ্য কৰি লোৱাটো অযুক্তিকৰ আৰু পক্ষপাতদুষ্ট।
নতুন দিল্লীৰ বিবৃতিত কোৱা হৈছে যে যুদ্ধৰ সময়ত ভাৰতৰ পৰম্পৰাগত তেল যোগানকাৰী সংস্থাসমূহ ইউৰোপমুখী হোৱাৰ বাবে ৰাছিয়াৰ সস্তীয়া তেলৰ দিশে মুখ কৰিবলগীয়া হৈছিল। সেই সময়ত আনকি আমেৰিকাই ভাৰতক উৎসাহিত কৰিছিল যাতে বিশ্ব বজাৰত ইন্ধনৰ দাম নিয়ন্ত্ৰণত থাকে।
ইপিনে, চৰকাৰী পৰিসংখ্যাৰ উদ্ধৃতি দি বৈদেশিক পৰিক্ৰমা মন্ত্ৰালয়ে আৰু কয় যে ২০২৪ চনত ইউৰোপীয় ইউনিয়নৰ সৈতে ৰাছিয়াৰ দ্বিপাক্ষিক বাণিজ্য আছিল ৬৭.৫ বিলিয়ন ইউৰো (সামগ্ৰী) আৰু ১৭.২ বিলিয়ন ইউৰো (সেৱা)। আনহাতে, ২০২৪ চনত ইউৰোপে ৰাছিয়াৰ পৰা ১ কোটি ৬৫ লাখ টন এল এন জি আমদানি কৰিছিল, যিয়ে ২০২২ চনৰ অভিলেখ অতিক্ৰম কৰিছিল।
আমেৰিকাই এতিয়াও ৰাছিয়াৰ পৰা ইউৰেনিয়াম হেক্সাফ্ল’ৰাইড, পেলেডিয়াম, সাৰ আৰু বিভিন্ন ৰাসায়নিক পদাৰ্থ আমদানি কৰি আছে। ইয়াৰ পিছতো কেৱল ভাৰতক লক্ষ্য কৰি লোৱাৰ যুক্তিযুক্ততাৰ ওপৰত প্ৰশ্ন উত্থাপন কৰিছে দিল্লীয়ে।
বৈদেশিক পৰিক্ৰমা মন্ত্ৰালয়ে কয়, “ভাৰতেও দায়িত্বশীল অৰ্থনীতিৰ দৰে ৰাষ্ট্ৰীয় স্বাৰ্থ আৰু অৰ্থনৈতিক নিৰাপত্তাৰ প্ৰতি লক্ষ্য ৰাখি কাম কৰে। বিশ্ব বাণিজ্যৰ বাস্তৱতাক বিবেচনা নকৰাকৈ ভাৰতক পৃথকভাৱে দোষাৰোপ কৰাটো অযুক্তিকৰ।”
উল্লেখ্য যে ড’নাল্ড ট্ৰাম্পে দাবী কৰিছে যে ভাৰতে ৰাছিয়াৰ পৰা তেল ক্ৰয় কৰি তাৰ পিছত মুকলি বজাৰত অধিক মূল্যত বিক্ৰী কৰিছে। ইয়াৰ বাবে ভাৰতৰ ওপৰত শুল্ক বৃদ্ধি কৰা হ’ব।
কিন্তু চৰকাৰী সূত্ৰই কয় যে ভাৰতীয় অৰ্থনীতিত এই শুল্ক বৃদ্ধিৰ প্ৰভাৱ প্ৰায় নগণ্য, আৰু জিডিপিৰ ওপৰত ইয়াৰ প্ৰভাৱ ০.২ শতাংশতকৈ অধিক নহ’ব। মুঠতে ট্ৰাম্পৰ ভাবুকিলৈ নতুন দিল্লীয়ে ভয় কৰা নাই।
