বাণিজ্যিক ৰন্ধন গেছৰ চিলিণ্ডাৰৰ বিকল্প হিচাপে ইথানল চালিত ষ্ট’ভ অতি সোনকালে বজাৰলৈ আহি আছে। এই নতুন পদক্ষেপে বাণিজ্যিক এল পি জিৰ মূল্য ধাৰাবাহিকভাৱে বৃদ্ধি পোৱাৰ বাবে হোটেল মালিক আৰু অন্যান্য ব্যৱসায়ীসকলে সন্মুখীন হোৱা সমস্যাসমূহৰ পৰা যথেষ্ট সকাহ দিব বুলি আশা কৰা হৈছে। গ্ৰেই ইথানল নিৰ্মাতা সন্থাই ইথানল কুকিং ষ্টোভ নিৰ্মাণৰ কাম চলি থকা বুলি জানিবলৈ দিছে আৰু এই সন্দৰ্ভত চৰকাৰৰ ওচৰত এটা প্ৰস্তাৱ দাখিল কৰা হৈছে।
ইৰাণ যুদ্ধৰ পিছত খাৰুৱা তেলৰ যোগানত যি সংকটৰ সৃষ্টি হৈছে, ইয়াৰ প্ৰত্যক্ষ প্ৰভাৱ পৰিছে বাণিজ্যিক এল পি জি চিলিণ্ডাৰৰ মূল্যত। শেহতীয়াকৈ দিল্লীত বাণিজ্যিক চিলিণ্ডাৰৰ মূল্য ৪২ টকা আৰু কলকাতাত ৫৩.৫০ টকা আৰু গুৱাহাটীত ৫৪ টকা বৃদ্ধি পাইছে। ফলত দিল্লীত ১৯ কেজিৰ কমাৰ্চিয়েল চিলিণ্ডাৰৰ মূল্য ৩১১৩.৫০ টকা আৰু কলকাতাত ৩২৫৫.৫০ টকা আৰু গুৱাহাটীত ৩৩৪৭.০০ টকা হৈছেগৈ।
বাণিজ্যিক চিলিণ্ডাৰৰ এই মূল্যবৃদ্ধিৰ বাবে ৰেষ্টুৰেণ্ট চলোৱাৰ খৰচ যথেষ্ট বৃদ্ধি পাইছে। ফলত বহু ঠাইত মালিকে খাদ্যৰ দাম বৃদ্ধি বা পৰিমাণ হ্ৰাস কৰিবলৈ বাধ্য হৈছে। এই অতিৰিক্ত বোজাৰ বাবে ক্ষুদ্ৰ হোটেল বন্ধৰ সন্মুখীন হৈছে। ফলত কাম হেৰুৱাৰ ভয়ৰ সৃষ্টি হয়। ভাৰতীয় নেশ্যনেল ৰেষ্টুৰেণ্ট এছ’চিয়েশ্যনেও এল পি জিৰ যোগানত বাধা আহিলে পৰিসেৱা ব্যাহত হোৱাৰ আশংকা প্ৰকাশ কৰিছে।
বাণিজ্যিক খণ্ডত যদি এল পি জিৰ সলনি ইথানল ব্যৱহাৰ কৰা হয় তেন্তে খাৰুৱা তেলৰ ওপৰত নিৰ্ভৰশীলতা প্ৰায় ১৫ শতাংশ হ্ৰাস কৰা সম্ভৱ হ’ব। ফলত তেল আমদানিৰ খৰচ বহু পৰিমাণে ৰাহি হ’ব। ভৱিষ্যতে ইন্ধনৰ নাটনি বা খাৰুৱা তেলৰ মূল্য বৃদ্ধিৰ দৰে পৰিস্থিতিৰ সৈতে মোকাবিলা কৰাত ইথানলে গুৰুত্বপূৰ্ণ ভূমিকা গ্ৰহণ কৰিব বুলি আশা কৰা হৈছে।
বাণিজ্যিক ইথানল ষ্ট’ভৰ লগতে ডিজেলত ইথানল মিহলোৱাৰ প্ৰক্ৰিয়াও আগবাঢ়িছে। ভাৰতে অচিৰেই খাৰুৱা তেলৰ আমদানি হ্ৰাস কৰিবলৈ ডিজেলত আইছ’বিউটানল মিহলি কৰাটো বাধ্যতামূলক কৰিব পাৰে। ইয়াৰ বাবে চৰকাৰে এটা পাইলট প্লাণ্ট স্থাপন কৰিছে।
