প্ৰধান মন্ত্ৰী নৰেন্দ্ৰ মোদীয়ে কৰ’নাভাইৰাছৰ বিৰুদ্ধে দেওবাৰে বন্তি জ্বলাবলৈ জনোৱা আহ্বানৰ প্ৰতি দেশজুৰি ব্যাপক সঁহাৰি পৰিলক্ষিত হয়।
দেওবাৰে সন্ধিয়া ন বজাত ন মিনিটৰ বাবে কাৰ্য্যতঃ বন্তিময় হৈ উঠে সমগ্ৰ ভাৰত।
গুৱাহাটীতো মহানগৰীৰ লোকসকলে ন বজাৰ লগে লগেই ঘৰৰ লাইট নুমুৱাই চাকি-বন্তি বা মমবাতি জ্বলোৱা পৰিলক্ষিত হয়।
বহুলোকে ম’বাইল ফোনৰ ফ্লেশ্বলাইট অন কৰিও প্ৰধান মন্ত্ৰীৰ আহ্বানলৈ সঁহাৰি জনোৱা পৰিলক্ষিত হয়।
অসমৰ মুখ্য মন্ত্ৰী সৰ্বানন্দ সোণোৱালে তেওঁৰ বাসগৃ্হত মাটিৰ চাকি জ্বলাই প্ৰধান মন্ত্ৰীৰ আহ্বানলৈ সঁহাৰি জনায়।
অসমৰ স্বাস্থ্য মন্ত্ৰী হিমন্ত বিশ্ব শৰ্মা আৰু পিযুশ হাজৰিকাই ম’বাইলৰ ফ্লেশ্ব জ্বলাই প্ৰধান মন্ত্ৰীৰ আহ্বানলৈ সঁহাৰি জনোৱা পৰিলক্ষিত হয়।
শুকুৰবাৰে এটা ভিডিঅ’ বাৰ্তাযোগে প্ৰধান মন্ত্ৰী মোদীয়ে দেশবাসীক এই আহ্বান জনাইছিল।
ভিডিঅ’টোত প্ৰধান মন্ত্ৰীয়ে ভাৰতবৰ্ষৰ সকলো নাগৰিকক তথা পৰিয়ালক ৫ এপ্ৰিল ৰবিবাৰে নিশা ৯ বজাত ৯ মিনিটৰ বাবে ঘৰৰ লাইট বন্ধ কৰি ঘৰৰ চৌহদত অথবা বেলকনিত মমবাতি, চাকি, টৰ্চ লাইট অথবা মোবাইলৰ ফ্লাচ জ্বলাবলৈ আহ্বান জনায়।
দেশৰ ১৩০ কোটি ভাৰতীয়ই এনেদৰে মমবাতি, চাকি অথবা টৰ্চ লাইট জ্বলাই ক’ৰ’নাক পৰাস্ত কৰি একেলগে আগবাঢ়ি যোৱাৰ বাবে সংকল্পবদ্ধ হোৱাৰ বাবে আহ্বান জনাইছিল প্ৰধান মন্ত্ৰী গৰাকীয়ে।
মমবাতি অথবা চাকি জ্বলোৱাৰ সময়ত নাগৰিক সকল কোনোকাৰণতে যাতে ঘৰৰ বাহিৰলৈ ওলাই নাহে তাৰ বাবেও মোদীয়ে অনুৰোধ কৰিছিল।
‘‘আজি সমগ্ৰ বিশ্বই ক’ৰ’নাৰ বিৰুদ্ধে ভাৰতৰ ১৩০ কোটি নাগৰিকৰ অব্যাহত থকা সংগ্ৰামৰ শলাগ লৈছে। জনতা কাৰ্ফিউৰ পৰা ল’কডাউনলৈ ভাৰতৰ জনসাধাৰণৰ ক’ৰ’নাক পৰাস্ত কৰাৰ একাগ্ৰতা বিশ্বই প্ৰত্যক্ষ কৰিছে,’’ প্ৰধান মন্ত্ৰী গৰাকীয়ে লগতে কৈছিল।
