এডিলেইডত অষ্ট্ৰেলিয়াৰ হাতত অপ্ৰত্যাশিত পৰাজয়ে ভাৰতীয় ক্ৰিকেট অনুৰাগীসকলৰ শেষ আশাও ভংগ কৰিলে। আজি এডিলেইড অৱেলত অনুষ্ঠিত মেচত ভাৰতে ২৬৪ ৰানৰ লক্ষ্য বান্ধি দিয়াৰ পিছটো অষ্ট্ৰেলিয়াই ২টা উইকেটত জয় লাভ কৰে। যাৰ ফলত ভাৰতে এই শৃংখলা হেৰুৱায়।
পাৰ্থত হোৱা প্ৰথম মেচত প্ৰত্যাৱৰ্তনকাৰী দুই অভিজ্ঞ তাৰকা ৰোহিত শৰ্মা আৰু বিৰাট কোহলীৰ ব্যৰ্থতাৰ ফলত ভাৰতীয় দলটোৱে পৰাজয় স্বীকাৰ কৰিছিল। নতুন অধিনায়ক শুভমন গিলৰ নেতৃত্বত এইবাৰ শৃংখলাত প্ৰত্যাৱৰ্তন হ’ব বুলি অনুৰাগীসকলে আশা কৰিছিল। কিন্তু এডিলেইডত আজি এই আশাও চূৰ্ণ হৈ গৈছে।
মেচখনত অষ্ট্ৰেলিয়াৰ অধিনায়ক মিচেল মাৰ্চে টছ জিকি ভাৰতক প্ৰথমে বেটিংৰ বাবে আগবঢ়াই দিয়ে। ভাৰতে প্ৰথমে বেটিং কৰি ৫০ অভাৰত ৯ উইকেট হেৰুৱাই ২৬৪ ৰান সংগ্ৰহ কৰিছিল। ৰোহিত শৰ্মাই দললৈ সৰ্বাধিক ৭৩ ৰানৰ অৱদান দিলেও কোহলী পুনৰবাৰ ব্যৰ্থ হয়। কোনো ৰান সংগ্ৰহ নকৰাকৈ আউট হয়। ইয়াৰ বিপৰিতে গিলে মাত্ৰ ৯ ৰানৰ অৱদান আগবঢ়ায়। শ্ৰেয়স আয়াৰে ৬১ আৰু অক্ষৰ পটেলে ৪৪ ৰানৰ গুৰুত্বপূৰ্ণ ইনিংছ খেলে। শেষলৈ হৰ্ষিত ৰানাই ২৪ ৰানৰ সৈতে দলৰ ইনিংছ ২৬৪ লৈ আগুৱাই নিয়ে।
ইফালে জয়ৰ বাবে অষ্ট্ৰেলিয়াই যুঁজিব লগীয়া হয় যদিও জয় লাভ কৰে আৰু মেচখনত দৰ্শনীয় বলিঙৰ বাবে জাম্পা মেচৰ শ্ৰেষ্ঠ খেলুৱৈ বিবেচিত হয়। অষ্ট্ৰেলিয়াৰ এই জয়ে ভাৰতৰ প্ৰত্যাৱৰ্তনৰ সপোন ভংগ কৰিছে। ৰোহিত-কোহলীৰ অভিজ্ঞতা আৰু গিলৰ নেতৃত্বত শৃংখলাত পুৰাপুৰি প্ৰত্যাৱৰ্তন হ’ব বুলি আশা কৰা হৈছিল, কিন্তু দুই মেচতো ব্যৰ্থতাৰ বাবে দলটোৱে শৃংখলা হেৰুৱাই। শৃংখলাৰ অন্তিমখন মেচ অহা ২৫ অক্টোবৰত ছিডনীত অনুষ্ঠিত হ’ব।
