মঙলবাৰে গুৱাহাটীত অনুষ্ঠিত প্ৰথমখন এদিনীয়াত শ্ৰীলংকাৰ বিৰুদ্ধে ৬৭ ৰাণত জয়লাভ কৰে টীম ইণ্ডিয়াই। বিৰাট কোহলী, ৰোহিত শৰ্মা, শুবমান গিল, উমৰাণ মালিক, মহম্মদ ছিৰাজৰ বেট-বলৰ দ্ৰুত প্ৰদৰ্শনৰ আগত সেও মানিবলগা হয় বিদেশী দলটোৱে।
শ্ৰীলংকাৰ অধিনায়ক দছুন শনাকাই টছত জয়লাভ কৰি ফিল্ডিং কৰাৰ সিদ্ধান্ত লয়।
ফলত শুবমান গিলৰ সৈতে অধিনায়ক ৰোহিত শৰ্মাই ইনিংছ আৰম্ভ কৰে। এফালে ৰোহিতে আগ্ৰাসী বেটিং কৰে, আনফালে শুবমান গিলে শীতল মগজুৰে ইনিংছত নেতৃত্ব দিয়ে। ৰোহিত শৰ্মা আৰু শুবমান গিলে মুঠ ১৪৩ ৰাণ সংগ্ৰহ কৰে। শুবমান গিলে ৭০ ৰাণ আৰু ৰোহিত শৰ্মাই মুঠ ৮৩ ৰান সংগ্ৰহ কৰে।
ইয়াৰ লগতে বিশেষভাবে খেল প্ৰদৰ্শন কৰে বিৰাট কোহলীয়ে। এদিনীয়া ক্ৰিকেটত বিৰাট কোহলীয়ে নিজৰ কেৰিয়াৰৰ ৪৫তম শতক অৰ্জন কৰে এই খেলখনত। ৮৭টা বলত ১১৩ ৰাণৰ সংগ্ৰহ কৰাৰ পাছত বিৰাট কোহলীক আউট কৰে কাছুন ৰাজিতাই। উল্লেখ্য যে কোহলীৰ ইনিংছত ১২টা চাৰি আৰু ১টা ছয় আছিল।
ইয়াৰ উপৰিও ভাৰতৰ হৈ কে এ ৰাহুলে ৩৯ ৰাণ, শ্ৰেয়াছ আয়েৰে ২৮ ৰাণ, হাৰ্দিক পাণ্ডিয়াই ১৪ ৰাণ সংগ্ৰহ কৰে। শেষত ভাৰতে ৫০ অভাৰত ৭টা উইকেট হেৰুৱাই ৩৭৩ ৰাণ সংগ্ৰহ কৰে।
শ্ৰীলংকাৰ হৈ কুশল ৰাজীতাই সৰ্বাধিক ৩ উইকেট দখল কৰে। শ্ৰীলংকাই জয়ৰ লক্ষ্যৰে ৩৭৪ ৰাণ সংগ্ৰহ কৰে।
শ্ৰীলংকাই দসুন শানাকাৰ উজ্জ্বল শতক, পাথুম নিশংকৰৰ ৭২, ধনঞ্জয় দে ছিলভাৰ ৪৭ ৰাণৰ সৌজন্যত সন্মানজনক ইনিংছ অৰ্জন কৰে। শনাকাই সৰ্বাধিক ১০৮ ৰাণ সংগ্ৰহ কৰে। শেষত শ্ৰীলংকাই ৫০ অভাৰত ৮ উইকেটত ৩০৬ ৰাণ সংগ্ৰহ কৰে।