কেন্দ্ৰ তথা ৰাজ্য চৰকাৰ সমূহক চিন্তিত কৰি দেশৰ ১১ খন ৰাজলৈ বিয়পি পৰিছে কোভিডৰ দক্ষিণ আফ্ৰিকাৰ প্ৰজাতি অমিক্ৰন। আজিৰ দিনটোত এই মুহূৰ্তলৈকে দেশত অমিক্ৰনত আক্ৰান্ত মুঠ লোকৰ সংখ্যা হৈছেগৈ ১০১ গৰাকী।
কেন্দ্ৰীয় স্বাস্থ্য দপ্তৰে প্ৰকাশ কৰা অনুসৰি মহাৰাষ্ট্ৰত ৩২ , দিল্লীত ২২ ,ৰাজস্থানত ১৭ ,কৰ্ণাটক আৰু তেলেংগানাত ৮ জনকৈ,গুজৰাট আৰু কেৰালাত ৫ জনকৈ একেদৰে অন্ধ্ৰ প্ৰদেশ, চণ্ডীগড়,তামিলনাডু তথা পশ্চিমবংগত এজনকৈ লোক অমিক্ৰনত আক্ৰান্ত হৈছে । তেওঁলোকৰ বৰ্তমান চিকিৎসা চলি আছে বুলি স্বাস্থ্য দপ্তৰৰ সচিব লভ আগৰৱালাই প্ৰকাশ কৰিছে।
অমিক্ৰনত আক্ৰান্ত প্ৰায় সংখ্যক লোকেই বিদেশ পৰা আহিছিল বুলি আগৰৱালাই কয়।
অমিক্ৰমনৰ সংক্ৰমণ পূৰ্বৰ ডেল্টা ভাইৰাছতকৈও অধিক দ্ৰুত ভাবে হোৱা বুলি স্বাস্থ্য দপ্তৰৰ সচিবগৰাকীয়ে জানিবলৈ দিয়ে।
আনহাতে ৰাজধানী চহৰ নতুন দিল্লীত কেৱল বৃহস্পতিবাৰৰ দিনটোতে দিল্লীত ১০ গৰাকী লোক অমিক্ৰনত আক্ৰান্ত হোৱা বুলি আজি ৰাজ্য খনৰ স্বাস্থ্য মন্ত্ৰী সত্যেন্দ্ৰ জৈনে জানিবলৈ দিছে।
ভাৰতত এতিয়ালৈকে অমিক্ৰনত আক্ৰান্ত হৈ কোনো লোকৰ মৃত্যু ঘটা নাই।বিশ্বত প্ৰথম গৰাকী অমিক্ৰন আক্ৰান্ত ৰোগীৰ কিছুদিন পূৰ্বে ব্ৰিটেইনত মৃত্যু ঘটিছিল ।
