বিশ্বব্যাপী সন্ত্ৰাসৰ সৃষ্টি কৰা ক’ৰ’না ভাইৰাছৰ ফলত ৰাজস্থানত আজি এজন ইটালিৰ লোকৰ মৃত্যু হয়। ইয়াৰ লগে লগে ভাৰতত এই ভাইৰাছৰ ফলত মৃত্যু হোৱা লোকৰ সংখ্যা পাঁচৰ ঘৰ পালে।
ইয়াৰ পূৰ্বে কৰ্ণাটকৰ কলবুৰ্গীত, দিল্লীত, মহাৰাষ্ট্ৰ আৰু বৃহস্পতিবাৰে পঞ্জাৱত একোজনকৈ লোকৰ এই ভাইৰাছবিধৰ ফলত মৃত্যু হৈছিল।
উল্লেখ্য যে ভাৰতত এই পৰ্যন্ত ২০০ৰো অধিক লোক এই ভয়াবহ ভাইৰাছ বিধৰ কৱলত পৰিছে। ইয়াৰে ২০ গৰাকী লোক সুস্থ হোৱা বুলি জানিব পৰা গৈছে।
আনহাতে শুকুৰবাৰে লক্ষ্ণৌত নতুনকৈ চাৰিজন লোক ক’ৰ’নাত আক্ৰান্ত হৈছে। লক্ষ্ণৌৰ কে জি এম য়ু চিকিৎসালয়ত ৯ গৰাকী লোকক চিকিৎসা প্ৰদান কৰি থকা হৈছে।
ক’ৰ’না ভাইৰাছৰ কৱলত ভাৰতৰ মুঠ ২০ খন ৰাজ্য আক্ৰান্ত হৈছে আৰু ইয়াৰ ভিতৰত সৰ্বাধিক আক্ৰান্তৰ সংখ্যা হৈছে মহাৰাষ্ট্ৰ।
জানিব পৰা মতে মহাৰাষ্ট্ৰত সৰ্বাধিক ৪৯ গৰাকী লোক এই ভাইৰাছ বিধত আক্ৰান্ত হৈছে। উত্তৰ প্ৰদেশত ২৩ গৰাকী লোকৰ দেহত এই ভাইৰাছবিধ ধৰা পৰিছে।
আনহাতে দিল্লীত ১২ গৰাকী, কৰ্ণাটকত ১৫ গৰাকী, কেৰালাত ২৮ গৰাকী, লাডাখত ৮ গৰাকী, জম্মু-কাশ্মীৰত ৪ গৰাকী, তেলেংগানাত ১৬ গৰাকী, ৰাজস্থানত ৯ গৰাকী, তামিলনাডু, উত্তৰাখণ্ড আৰু অন্ধ্ৰপ্ৰদেশত ৩ গৰাকী, পাঞ্জাৱত এজন, ওড়িষা, গুজৰাট আৰু পশ্চিমবংগত ২ জন, চণ্ডিগড়, পদুচেৰি আৰু ছত্তিষগড়ত এজনকৈ লোক এই ভাইৰাছত আক্ৰান্ত হোৱা বুলি জানিব পৰা যায়।