মোডীৰ আমেৰিকা ভ্ৰমণৰ পিছতেই আমেৰিকাৰ প্ৰাক্তন ৰাষ্ট্ৰপতি বাৰাক ওবামাই ভাৰতৰ সম্পৰ্কে প্ৰদান কৰিছে এক বিস্ফোৰক মন্তব্য।
বিজেপি চৰকাৰৰ দিনত ভাৰতত সংখ্যালঘু সম্প্ৰদায়ৰ ওপৰত হোৱা অত্যাচাৰৰ বিৰোধিতা কৰি মন্তব্য প্ৰদান কৰিছে প্ৰাক্তন আমেৰিকান ৰাষ্ট্ৰপতিগৰাকীয়ে।
ওবামাৰ মতে, হিন্দু প্ৰধান ভাৰত চৰকাৰে সংখ্যালঘু মুছলমানক সুৰক্ষা দিয়াৰ ক্ষেত্ৰত সচেতন হোৱা উচিত। অন্যথা যিকোনো সময়তে ভাৰতৰ পতন ঘটিব পাৰে।
উল্লেখ্য যে কিছুদিন পূৰ্বে প্ৰধানমন্ত্ৰী নৰেন্দ্ৰ মোডীয়ে আমেৰিকা ভ্ৰমণও কৰিছিল। হোৱাইট হাউছৰ পৰা আমেৰিকাৰ কংগ্ৰেছলৈ উষ্ম আদৰণি জনাই লৈ যোৱা হৈছিল তেওঁক। ভ্ৰমণকালত আমেৰিকাৰ ৰাষ্ট্ৰপতি জো বাইডেনৰ সৈতে ভালেমান বিষয়ত কথা পাতিছিল নৰেন্দ্ৰ মোডীয়ে।
কিন্তু মোডীৰ ভ্ৰমণৰ সময়ত ভাৰতৰ মানৱ অধিকাৰৰ বিষয়টোৱে চৰ্চা লাভ কৰিছিল আমেৰিকাতো। আমেৰিকাৰ চেনেট আৰু কংগ্ৰেছৰ ৭৫ জন সদস্যই ভাৰতৰ গণতন্ত্ৰ আৰু ধৰ্মীয় স্বাধীনতাক লৈ প্ৰশ্ন উত্থাপন কৰি বাইডেনলৈ এখন পত্ৰ লিখিছিল। অৱশ্যে বাইডেনে কৈছিল যে ভাৰত আৰু আমেৰিকাৰ এটা মিল আছে, সেইটো হৈছে – ধৰ্মীয় বৈচিত্ৰ্য।
মোডীৰ ভ্ৰমণৰ সময়ত এটা সাক্ষাৎকাৰত বাৰাক ওবামাই কৈছিল – “মই মোডীক ভালদৰে চিনি পাওঁ। এতিয়া যদি তেওঁৰ লগত মই কথা পাতো তেন্তে ভাৰতত সংখ্যালঘুৰ অধিকাৰৰ বিষয়ে আলোচনা কৰিম। মোডীৰ চৰকাৰে যদি এতিয়া সংখ্যালঘুৰ অধিকাৰ সুৰক্ষিত নকৰে তেন্তে ভাৰতবৰ্ষ যিকোনো সময়তে দুভাগত ভাঙি পৰিব পাৰে। দেশৰ ভিতৰত এনে বিভাজনৰ ফল কি হ’ব পাৰে সেয়া কল্পনা কৰিব পাৰি। ভাৰতৰ জাতীয় স্বাৰ্থ ৰক্ষাৰ বাবে সংখ্যালঘুৰ অধিকাৰ ৰক্ষা কৰিব লাগিব।”
উল্লেখ্য যে আমেৰিকাৰ প্ৰাক্তন ৰাষ্ট্ৰপতিগৰাকীৰ কাৰ্যকালতো মোদীয়ে আমেৰিকা ভ্ৰমণ কৰিছিল। তেওঁ ওবামাক নিজৰ ‘বন্ধু বাৰাক’ বুলি চিনাকি কৰাই দিছিল।
সেয়েহে, ওবামাই প্ৰদান কৰা সাক্ষাৎকাৰৰ ভিডিঅ’টো টুইট কৰি কংগ্ৰেছৰ মুখপাত্ৰ সুপ্ৰিয়া শ্ৰীনাটে লিখিছে, ‘মোডীৰ বন্ধু বাৰাকৰ এটা বিশেষ বাৰ্তা আছে। গতিকে মই ধৰি লৈছোঁনে যে আন্তঃৰাষ্ট্ৰীয় সমাজেও মোডীজীৰ বিৰুদ্ধে ষড়যন্ত্ৰ কৰিছে? অনুৰাগীয়ে নিশ্চয় সেইটো দাবী কৰিব।
আন এটা গুৰুত্বপূৰ্ণ কথা হ’ল যে মোদীয়ে আমেৰিকাৰ কংগ্ৰেছতো বিৰোধিতাৰ সন্মুখীন হৈছে। মুছলমানকে ধৰি ভাৰতৰ ধৰ্মীয় সংখ্যালঘুসকলৰ ওপৰত চলি থকা অত্যাচাৰৰ প্ৰতিবাদত মোডীৰ ভাষণ বৰ্জন কৰিছে আমেৰিকাৰ কংগ্ৰেছৰ দুগৰাকী মুছলমান মহিলা প্ৰতিনিধিয়ে।
