ভাৰতৰ ধৰ্মীয় স্বাধীনতাক লৈ আকৌ এবাৰ আমেৰিকাই মুখ খুলিছে। অৱশ্যে জো বাইডেন প্ৰশাসনে ভাৰতৰ ধৰ্মীয় অহিষ্ণুতাক প্ৰত্যক্ষভাৱে সমালোচনা কৰি মন্তব্য প্ৰকাশ কৰা নাই। জো বাইডেন প্ৰশাসনৰ শীৰ্ষ বিষয়া ষ্টেট ডিপাৰ্টমেণ্টৰ মুখপাত্ৰ নেড প্ৰাইছে সন্তুলন ৰক্ষা কৰি চাতুৰ্যতাৰে কয় যে, “ভাৰতত বিভিন্ন ধৰণৰ ধৰ্মীয় লোকৰ বাসস্থান। বাইডেন প্ৰশাসনে ভাৰত চৰকাৰক সেই দেশত বসবাস কৰা প্ৰতিজন ব্যক্তিৰ ধৰ্মীয় স্বাধীনতা ৰক্ষাৰ প্ৰতিশ্ৰুতি বজাই ৰাখিবলৈ উৎসাহিত কৰি যাব।”
যোৱা সপ্তাহত আমেৰিকাৰ বিদেশ মন্ত্ৰী এণ্টনি ব্লিংকেনে ধৰ্মীয় স্বাধীনতাৰ বাবে ১২ খন দেশক ‘কন্ট্ৰীজ অৱ পাৰ্টিকুলাৰ কনচাৰ্ণ’ হিচাপে তালিকাভুক্ত কৰিছিল। য’ত চীন, পাকিস্তান, ম্যানমাৰ আদি দেশৰ নাম অন্তৰ্ভুক্ত কৰা হৈছে।
ব্লিংকেনে কয়, “গোটেই বিশ্বতে এনে চৰকাৰ আৰু ৰাষ্ট্ৰবৰ্হিভূত শক্তি আছে যিয়ে কিছুমান বিশেষ ধৰ্মৰ লোকক অহৰহ অত্যাচাৰ, ভীতি প্ৰদৰ্শন কৰি কাৰাগাৰত বন্দী বা হত্যা কৰি আহিছে।”
বুধবাৰে সংবাদমেলত আমেৰিকাৰ বৈদেশিক সচিবগৰাকীয়ে এইদৰে কোৱাৰ পাছতে নেড প্ৰাইছে ভাৰতক একপ্ৰকাৰে প্ৰচ্ছন্নভাৱে প্ৰশংসা কৰি কয় যে ভাৰত বিশ্বৰ সৰ্ববৃহৎ গণতান্ত্ৰিক দেশ আৰু তাত বিভিন্ন ধৰ্মীয় বিশ্বাসৰ লোক বাস কৰে। তেওঁৰ ভাষাত, “আন্তঃৰাষ্ট্ৰীয় ধৰ্মীয় স্বাধীনতা সম্পৰ্কে আমাৰ বাৰ্ষিক প্ৰতিবেদনত আমি ভাৰতৰ কিছুমান চিন্তনীয় পৰিস্থিতি লক্ষ্য কৰিছোঁ। ভাৰতকে ধৰি প্ৰতিখন দেশতে ধৰ্মীয় স্বাধীনতাৰ ওপৰত আমি তীক্ষ্ণ দৃষ্টি ৰাখোঁ।”
কিন্তু একে সময়তে প্ৰাইছে কয় যে বৈদেশিক সচিবগৰাকীয়ে পৰ্যালোচনা কৰি লক্ষ্য কৰিছে যে ভাৰতৰ পৰিস্থিতি আন ১২খন দেশৰ দৰে আতংকজনক নহয়। ইয়াৰ পিছত তেওঁ কয় যে আমেৰিকাই ভাৰতক নিজৰ নাগৰিকৰ ধৰ্মীয় স্বাধীনতা আৰু অধিকাৰ ৰক্ষাৰ প্ৰতিশ্ৰুতি বজাই ৰাখিবলৈ উৎসাহিত কৰি যাব।
