ইউক্ৰেইন যুদ্ধ সম্পৰ্কত দুমুখীয়া স্থিতি গ্ৰহণ কৰিছে ভাৰতে। এফালে যদি ভাৰতে যুদ্ধ বন্ধ কৰিবলৈ পুটিনক আহ্বান জনাইছে, আনফালে সুসম্পৰ্কও বৰ্তাই ৰাখিছে।
এনেধৰণৰ এক ভাষ্য আগবঢ়াইছে মাৰ্কিন ৰাষ্ট্ৰপতি জ’ বিডেনে।
ৰাষ্ট্ৰপতিগৰাকীয়ে নাটো, ইউৰোপিয়ান ইউনিয়নকে ধৰি আমেৰিকা যুক্তৰাষ্ট্ৰৰ বন্ধু ৰাষ্ট্ৰসমূহক ভূয়সী প্ৰশংসা কৰে। কিন্তু কয় যে এইসমূহৰ ভিতৰত ভাৰতে অস্পষ্ট ভূমিকা লৈছে।
উল্লেখযোগ্য যে ৰাছিয়াৰ ওপৰত পশ্চিমীয়া দেশসমূহে ব্যাপক হাৰত অৰ্থনৈতিক নিষেধাজ্ঞা আৰোপ কৰিছে। আমেৰিকা যুক্তৰাষ্ট্ৰৰ বন্ধু ৰাষ্ট্ৰ জাপান আৰু অষ্ট্ৰেলিয়াই এইক্ষেত্ৰত অগ্ৰণী ভূমিকা লৈছে।
ৱাশ্চিংটনত অনুষ্ঠিত এখনি বৈঠকত ৰাষ্ট্ৰপতি বিডেনে কয় যে জাপান আৰু অষ্ট্ৰেলিয়াই ইউক্ৰেইন যুদ্ধ সম্পৰ্কত শক্তিশালী ভূমিকা লৈছে।
কিন্তু ভাৰতে এতিয়াও ৰাছিয়াৰ সৈতে অৰ্থনৈতিক সম্পৰ্ক ৰক্ষা কৰি আহিছে। ৰাছিয়াৰ তেল ক্ৰয় কৰি অহাৰ উপৰিও ৰাষ্ট্ৰসংঘতো অস্পষ্ট ভূমিকা গ্ৰহণ কৰিছে।
ৰাষ্ট্ৰসংঘত ৰাছিয়াৰ বিৰুদ্ধে ভোটদানৰ পৰা বিৰত আছে ভাৰত। বিডেনৰ এই বক্তব্যই সেয়ে ব্যাপক চৰ্চা লাভ কৰা দেখা গৈছে।
