অৰ্থনৈতিক সংকটত বিধ্বস্ত শ্ৰীলংকালৈ খাদ্য সাহায্য হিচাপে চাউল যোগান ভাৰতৰ
বৈদেশিক মুদ্ৰাৰ অভাৱৰ ফলত এক অভূতপূৰ্ব অৰ্থনৈতিক আৰু শক্তি সংকটৰ সন্মুখীন হোৱা শ্ৰীলংকাক সাময়িক সকাহ যোগাইছে ভাৰতে। ভাৰতীয় ব্যৱসায়ীসকলে প্ৰথম মুখ্য খাদ্য সাহায্য হিচাপে শ্ৰীলংকালৈ তাৎক্ষণিকভাৱে ৪০,০০০ টন চাউল প্ৰেৰণ কৰিবলৈ সাজু হৈছে।
ইতিপূৰ্বে ভাৰতে প্ৰেৰণ কৰা ৪০,০০০ মেট্ৰিক টন ডিজেল ইন্ধন সাহায্য শনিবাৰে দ্বীপৰাষ্ট্ৰখনত উপস্থিত হৈছে।
শ্ৰীলংকাত যোৱা দুবছৰত বৈদেশিক মুদ্ৰাৰ ভাণ্ডাৰ ৭০ শতাংশ হ্ৰাস পাইছে। দেশখনত তীব্ৰ অৰ্থনৈতিক সংকটে দেখা দিয়াৰ পিছত অত্যাৱশ্যকীয় আমদানিৰ বাবে পৰিশোধ কৰাৰ ক্ষেত্ৰত বিপদৰ সন্মুখীন হৈছে।
বিদেশী ঋণ পৰিশোধ কৰাৰ সামৰ্থ্যক লৈ সৃষ্টি হোৱা উদ্বেগৰ মাজতে শ্ৰীলংকাৰ চৰকাৰে আন্তৰ্জাতিক মুদ্ৰা নিধিৰ সৈতে আলোচনাৰ বাবে প্ৰস্তুতি চলাইছে।
ইতিমধ্যে ইন্ধন, ৰন্ধন গেছ, অত্যাৱশ্যকীয় সামগ্ৰীৰ কম যোগান আৰু দীঘলীয়া সময়ৰ বিদ্যুৎ কৰ্তনৰ বাবে দ্বীপৰাষ্ট্ৰখনত প্ৰতিবাদৰ সৃষ্টি হৈছে। তীব্ৰ অৰ্থনৈতিক সংকটত ভোগা শ্ৰীলংকাৰ জনতাৰ বিক্ষোভত একপ্ৰকাৰ দিশহাৰা হৈ পৰিছে দেশখনৰ চৰকাৰ।
দ্বীপৰাষ্ট্ৰখনত অৰ্থনৈতিক সংকটক লৈ হোৱা প্ৰতিবাদৰ মাজতে শনিবাৰে সন্ধিয়া ৬ বজাৰ পৰা সোমবাৰে পুৱা ৬ বজালৈ শ্ৰীলংকাত ৩৬ ঘণ্টাৰ কাৰফিউ জাৰি কৰা হৈছে।