দেশৰ সাধাৰণ জনতাই ক’ৰ’ণা ভাইৰাছৰ সংক্ৰমণৰ ভয়ত ঘৰৰ বাহিৰ ওলাব পৰা নাই।
একাধিক লকডাউনৰ পিছতে চৰকাৰে নানান কঠোৰ নীতি নিৰ্দেশনা ঘোষণা কৰিছে।
ফলত স্তিমিত হৈ পৰিছে ‘কা’ বিৰোধী আন্দোলন।
ক’ৰ’ণা ভাইৰাছৰ সংক্ৰমণৰ পূৰ্বে দেশৰ ৰাজ্যই ৰাজ্যই নাগৰিকত্ব সংশোধনী আইনৰ বিৰুদ্ধে ব্যাপক প্ৰতিবাদ হৈছিল যদিও কেন্দ্ৰীয় চৰকাৰে যি কোনো মূল্যৰ বিনিময়তে ‘কা’ ৰুপায়ণ কৰাৰ পদক্ষেপ হাতত লৈছে।
সেই মৰ্মে বিদেশত ধৰ্মীয় নিৰ্যাতনৰ বলি হোৱা বহুলোকক ক’ৰ’ণাতংকৰ মাজতে ভাৰত চৰকাৰে দেশলৈ ঘূৰাই অনাৰ পদক্ষেপ গ্ৰহণ কৰিছে।
‘কা’ ৰুপায়ণৰ পদক্ষেপ হিচাবে চৰকাৰে যোৱা ২৬ জুলাইত আফগানিস্তানৰ পৰা ১১ জন শিখ লোকক দিল্লীলৈ ওভতাই আনিছে।
আফগানিস্তানৰ পৰা ওভতাই অনা শিখ লোক সকলক বিমান বন্দৰৰ পৰা আদৰি আনে দিল্লী বিজেপিৰ নেতা চৰ্দাৰ আৰ পি সিঙে ।
নেতা গৰাকীয়ে প্ৰকাশ কৰা মতে ওভতাই অনা শিখ লোক কেইজনক দিল্লীৰ গুৰুদ্বাৰ এটাত আশ্ৰয় প্ৰদান কৰা হৈছে।
ইপিনে অতি কম দিনৰ ভিতৰতে আৰু ৭০০ শিখ লোকক দেশলৈ ওভতাই অনাৰ প্ৰস্তুতি সম্পূৰ্ণ কৰি তুলিছে ভাৰতে।
আফগানিস্তানত বাস কৰা উক্ত শিখ লোক সকল ধৰ্মীয় নিৰ্যাতনৰ বলি হোৱা বুলি কোৱা হৈছে।
