জলদস্যু বিচৰাৰ অচিলালৈ ভাৰত মহাসাগৰৰ বুকুত ঘূৰি ফুৰিছে ‘ড্ৰেগনে’।
সেয়ে ‘ড্ৰেগন’ক প্ৰতিহত কৰিবলৈ বুদ্ধি পাঙিছে ভাৰতে।
‘ড্ৰেগন’ অৰ্থাৎ চীনৰ যুদ্ধ জাহাজে প্ৰায়ে ভাৰত মহাসাগৰত প্ৰৱেশ কৰি ভাৰতৰ নিৰাপত্তাৰ প্ৰতি ভাবুকি কঢ়িয়াই আনিছে।
জলদস্যুৰ বিৰুদ্ধে অভিযান চলোৱাৰ নামত চীনৰ যুদ্ধ জাহাজে পাকিস্তানৰ গডৰ আৰু লোহিত সাগৰৰ জিবৌতি নৌঘাটিৰ পৰা ভাৰত মহাসাগৰত প্ৰৱেশ কৰি আহিছে।
জলদস্যুৰ বিৰুদ্ধে অভিযান চলোৱাটো চীনৰ বাহানাহে।
প্ৰকৃত উদ্দেশ্য পিছে ভাৰতৰ ওপৰত চকু ৰখাহে।
এই কথাৰ গম গতি ধৰিব পাৰি ভাৰতে সেয়ে চীনৰ যুদ্ধ জাহাজ ধ্বংস কৰিব পৰা চাৰি খনকৈ পি-৮ আই যুদ্ধ বিমান ক্ৰয় কৰিব আমেৰিকাৰ পৰা।
এই যুদ্ধ বিমানত আছে ৫০ কিলোমিটাৰ দূৰৈৰ পৰাই ছাবমেৰিন ধ্বংস কৰিব পৰা হাৰপুন ব্লক ২।
ইয়াত আছে শক্তিশালী ৰেডিঅ’ ট্ৰেন্সমিটাৰ যাৰ সহায়ত বহু দূৰৰ পৰাই শত্ৰু পক্ষৰ যুদ্ধ জাহাজৰ অৱস্থিতি ধৰা পেলাব পৰা যাব।
ভাৰতৰ তামিলনাডুৰ ৰাজালিৰ নৌসেনাৰ ঘাটিত এনে বিমান আছে যদিও চীনৰ আগ্ৰাসী মনোভাৱৰ বাবেই ভাৰতে আৰু অধিক পি-৮ আই যুদ্ধ বিমান আমেৰিকাৰ পৰা ক্ৰয় কৰাৰ সিদ্ধান্ত লৈছে।
এনে বিমান শীঘ্ৰে ভাৰত আহি পোৱাৰ সম্ভাৱনা আছে।
২০২১ চনত ভাৰতে আমেৰিকাৰ পৰা অতিৰিক্ত ৬ খন এনে বিমান ক্ৰয় কৰিব বুলি জনা গৈছে।
