বিশাখাপট্টনমত ভাৰত আৰু দক্ষিণ আফ্ৰিকাৰ মাজত চলি থকা পেটিএম ফ্ৰীডম ট্ৰফী টেষ্ট শৃংখলাৰ প্রথমখন টেষ্টত ভাৰতীয় ক্ৰিকেট দলে দক্ষিণ আফ্ৰিকাৰ বিৰুদ্ধে সহজ জয় সাব্যস্ত কৰিছে ।
এই জয়েৰে ভাৰতে ৩খনীয়া টেষ্ট শৃংখলাটোত দক্ষিণ আফ্ৰিকাৰ বিৰুদ্ধে ১-০ ব্যৱধানত অগ্ৰগতি লাভ কৰে। প্ৰথমখন টেষ্টত ভাৰতে ২০৩ ৰাণৰ ব্যৱধানত জয়লাভ কৰে।
প্ৰথম ইনিংছত ভাৰতে ৭ উইকেটত ৫০২ ৰাণ সংগ্ৰহ কৰি ইনিংছ ঘোষণা কৰিছিল যাৰ প্ৰত্যুত্তৰত দক্ষিণ আফ্ৰিকাই প্ৰথম ইনিংছত সংগ্ৰহ কৰে ৪৩১ ৰাণ।
উল্লেখযোগ্য যে, বিশাখাপট্টনম টেষ্টত ভাৰতৰ হৈ ৰোহিত শৰ্মাই প্ৰথমবাৰৰ বাবে টেষ্টত ইনিংছ মুকলি কৰি দৰ্শনীয় শতৰাণ অৰ্জন কৰিছিল। ৰোহিতে ১৭৬ ৰাণ কৰাৰ বিপৰীতে আনজন অপেনাৰ মায়াংক আগৰৱালে কেৰিয়াৰ প্ৰথমটো দ্বিশতৰাণ(২১৫)অৰ্জন কৰে।
প্ৰথমটো ইনিংছৰ অগ্ৰগতিৰ পিছত ভাৰতীয় দলে দ্বিতীয়টো ইনিংছত ৩২৩ ৰাণ সংগ্ৰহ কৰি ইনিংছ ঘোষণা কৰে, ইয়াৰ প্ৰত্যুত্তৰত দক্ষিণ আফ্ৰিকাৰ দলটোৱে ভাৰতীয় বলাৰৰ সন্মুখত তিষ্টিব নোৱাৰি মাত্ৰ ১৯১ ৰাণতে নিজৰ ইনিংছ সামৰিবলৈ বাধ্য হয়।
ভাৰতৰ পেচ বলাৰ মহম্মদ ছামিয়ে ৫ টা উইকেট দখল কৰাৰ বিপৰীতে স্পিনাৰ ৰবিন্দ্ৰ জাডেজাই দখল কৰে ৪ টা উইকেট৷ আনহাতে দুয়োটা ইনিংছতে শতক অৰ্জন কৰা ৰোহিত শৰ্মাই লাভ কৰে ‘প্লেয়াৰ অব দা মেচ’ সন্মান।