ক’ৰ’না মহামাৰীৰ ময়তে ভাৰতীয় ক্ৰীড়া ক্ষেত্ৰলৈ আহিছে এটা ভাল খবৰ। ২০১৮ এছিয়ান গেইমছত ভাৰতীয় ৪x৪০০ মিটাৰ মিক্সড ৰীলে দলে পোৱা ৰূপৰ পদক স্বৰ্ণলৈ উন্নীত হৈছে৷
পূর্বৰ বিজয়ী বাহৰেইনৰ এগৰাকী দৌৰবিদ ড’পিঙৰ বাবে নিষেধাজ্ঞাৰ সন্মুখীন হোৱাত দ্বিতীয় স্থানত থকা ভাৰতে চেম্পিয়নৰ সন্মান লাভ কৰে৷
৪x৪০০ মিটাৰ মিক্সড ৰীলেৰ ফাইনেলত প্রথম স্থানত থকা বাহৰেইনৰ কেমী এডেকুৱাই ডপ পৰীক্ষাত ব্যর্থ হোৱাৰ পাছত এথলেটিকছ ইনটিগ্রিটি য়ুনিটে (এ আই ইউ) খেলুৱৈগৰাকীক ৪ বছৰলৈ নিষিদ্ধ ঘোষিত কৰে৷
মহম্মদ আনাছ, এম আৰ পোভাম্মা, হিমা দাস আৰু আৰোকিয়া ৰাজীৱৰে গঠিত ভাৰতীয় দলটোৱে ৩ঃ১৫ঃ৭১ ছেকেণ্ড সময়মানেৰে বাহৰেইনৰ (৩ঃ১১ঃ৮৯) পাছত থাকি ৰূপৰ পদক পাইছিল৷
ইয়াৰ উপৰি মহিলাৰ ৪০০ মিটাৰ হার্ডলছত চতুর্থ স্থানত ৰোৱা অনু ৰামবনে ব্রঞ্জৰ পদক লাভ কৰে৷ বাহৰেইনৰ এডেকুৱাই খিতাপ জয় কৰিছিল যদিও এ আই য়ুয়ে সেই পদক নাকচ কৰাত অনুৱে তৃতীয় স্থান পায়৷
