কাশ্মীৰ উপত্যকাত অশান্তিৰ দাবানল বিয়পাই দিবলৈ অনবৰতে চেষ্টা অব্যাহত ৰখা পাকিস্তানৰ সন্ত্ৰাসবাদীয়ে এতিয়া হেক্স’কপ্তাৰৰ সহায়ত কাশ্মীৰত নিয়োজিত নিৰাপত্তা কৰ্মীৰ ওপৰত গ্ৰেণেড নিক্ষেপ কৰিবলৈ আৰম্ভ কৰিছে।
ভাৰতীয় নিৰাপত্তা বাহিনীৰ জোৱানৰ সম্পূৰ্ণ অগোচৰে হেক্স’কপ্তাৰৰ সহায়ত আকাশৰ পৰা সন্ত্ৰাসবাদীয়ে অনায়াসে গ্ৰেণেড নিক্ষেপ কৰিবলৈ সক্ষম হৈছে বুলি ভাৰতীয় সেনাৰ এগৰাকী মুখপাত্ৰই প্ৰকাশ কৰিছে।
উল্লেখ্য পাকিস্তানে চীনৰ পৰা শেহতীয়াকৈ বহু হেক্স’কপ্তাৰ ক্ৰয় কৰিছে। হেক্স’কপ্তাৰ হৈছে এক ধৰণৰ ড্ৰোন যাৰ সহায়ত কোনো বস্তু ইঠাইৰ পৰা সিঠাইলৈ লৈ যাব পৰা যায়।
এনে ড্ৰোনৰ জৰিয়তে কম ওজনৰ বোমা বা গ্ৰেণেড আদিও তললৈ নিক্ষেপ কৰিব পৰা যায়।
ভৰতীয় চোৰাংচোৱাই বহু দিন পূৰ্বে এই বুলি তথ্য দিছিল যে পাকিস্তানে বাৰতৰ বিৰুদ্ধে অস্ত্ৰ সৰবৰাহ আৰু ড্ৰোন নিক্ষেপৰ বাবে হেক্স’মিটাৰ ব্যৱহাৰ কৰিছে।
পাক সন্ত্ৰাসবাদীৰ এনে কৌশল প্ৰতিহত কৰিবলৈ ভাৰতীয় সেনায়ো সীমান্তত নিয়োজিত জোৱানক ড্ৰোন ধ্বংস কৰাৰ বিশেষ প্ৰশিক্ষণ দিয়া বুলি ভাৰতীয় সেনাৰ মুখপাত্ৰগৰাকীয়ে প্ৰকাশ কৰে।
তেওঁ কয় যে নিয়ন্ত্ৰণ ৰেখাত নিয়োজিত সেনাৰ জোৱান সকলক ড্ৰোন ধ্বংস কৰিব পৰাৰ ১৪ দিনৰ প্ৰশিক্ষণ দিয়া হৈছে।