সংকটত জিমনাষ্ট দীপা কৰ্মকাৰৰ কেৰিয়াৰ
২০১৬ চনৰ ৰিঅ’ অলিম্পিক গেইমছত অলপৰ বাবে পদক অৰ্জনত ব্যৰ্থ হোৱা বিৰল প্ৰতিভাৰ অধিকাৰী জিমনাষ্টিক তাৰকা দীপা কৰ্মকাৰৰ কেৰিয়াৰ এতিয়া সংকটত। দীৰ্ঘদিন ধৰি আঘাতৰ সমস্যাই জুৰুলা কৰা ত্ৰিপুৰাৰ জিমনাষ্ট গৰাকীয়ে আগন্তুক টকিঅ’ অলিম্পিকছত অংশ লোৱাৰ সপোন যেন সপোন হৈয়ে ৰ’ব।
দীপাৰ প্ৰশিক্ষক বিশ্বেশ্বৰ নন্দীয়ে গভীৰ আশংকা প্ৰকাশ কৰি কয়, ‘আঘাতৰ সমস্যাৰ পৰা মুক্ত হ’বলৈ এতিয়াও যুঁজি আছে দীপাই’।
তেওঁ লগতে কয় যে আঘাতৰ সমস্যাৰ বাবেই যোৱা মাহত মংগোলিয়াত অনুষ্ঠিত এছিয়ান চেম্পিয়নশ্বিপত দীপাই অংশ ল’ব নোৱাৰিলে।
‘আমি এই মূহুৰ্তত একো কৰিব নোৱাৰো। চিকিৎসকৰ পৰামৰ্শ মতেহে কাম কৰিব পাৰিম। সম্পূৰ্ণ সুস্থ হৈ নুঠা লৈকে মই একো ৰিক্স নলও। যেতিয়া সুস্থ হৈ উঠিব মই চিকিৎসক আৰু ফিজিঅ’ৰ পৰামৰ্শ লম’। এই কথা জানিবলৈ দিয়ে প্ৰশিক্ষক নন্দীয়ে।
জাৰ্মানীত অহা ৪ৰ পৰা ১৩ অক্টোবৰলৈ চলিব ৱৰ্ল্ড চেম্পিয়নশ্বিপ। সেই প্ৰতিযোগিতাখনেই হ’ব টকিঅ’ অলিম্পিকছৰ যোগ্যতা নিৰ্ধাৰণকাৰী প্ৰতিযোগিতা কিন্তু আঘাতৰ বাবে প্ৰতিযোগিতাখনৰ পৰা আঁতৰি থাকিব লগীয়া হ’ব পাৰে দীপা কৰ্মকাৰ।
অলিম্পিকলৈ এবছৰতকৈও কম দিন থকা সময়ত দীপাৰ অংশ গ্ৰহণ অনিশ্চয়তাৰ বাবে এতিয়া চিন্তিত হৈ পৰিছে ক্ৰীড়া মহল। এই সংক্ৰান্তত প্ৰশিক্ষক গৰাকীয়ে কয়, ‘এই মূহুৰ্তত তেওঁৰ অলিম্পিকত অংশ গ্ৰহণৰ কথা সম্পৰ্কে একো কৰিব নোৱাৰো। এই সংক্ৰান্ত মত ব্যক্ত কৰাটো ঠিক নহ’ব। প্ৰথমে চিকিৎসকৰ সৈতে কথা পাতিব লাগিব’।
উল্লেখ্য যে দীপাই শেষবাৰৰ বাবে যোৱা মাৰ্চ মাহত অনুষ্ঠিত বাকু ৱৰ্ল্ড কাপত অংশ লৈছিল আৰু আঠুত আঘাত পাইছিল। তেতিয়াৰ পৰাই জিমনাষ্টিকৰ পৰা আঁতৰি আছে দীপা।
ৰিঅ’ অলিম্পিকৰ চমৎকাৰী প্ৰদৰ্শনে সকলোকে আচম্বিত কৰি তোলা দীপাই পুনৰ জিমনাষ্টিক ক্ষেত্ৰলৈ ঘূৰি আহিব বুলি প্ৰশিক্ষকৰ লগতে তেওঁৰ অনুৰাগী সকলে আশা প্ৰকাশ কৰিছে।